តើសាំងស៊ុបពែរមិនល្អគ្រប់យានយន្ដទាំងអស់មែនទេ ?

ថ្ងៃទី ០៧ ខែ មិថុនា ឆ្នាំ ២០១៨
ម៉ោង ១០:១២
សុវណ្ណណែត

រាជធានីភ្នំពេញ ៖ នៅក្នុងជីវភាពប្រចាំថ្ងៃពេលបច្ចុប្បន្ននេះ មនុស្សមួយចំនួនតែងតែយល់ខុសថា អ្វីដែលមានតម្លៃខ្ពស់ គឺសុទ្ធតែល្អ តែធាតុពិត វាមិនដូច្នេះគ្រប់កាលៈទេសៈទេ ។ ជាក់ស្ដែង ផលិតផលសាំងស៊ុបពែរ វាមិនមែនល្អសម្រាប់គ្រប់យានយន្តទាំងអស់ទេ មានយានយន្តខ្លះ គេមិនតម្រូវឲ្យចាក់សាំងស៊ុបពែរទេ គឺឲ្យប្រើធម្មតា វាល្អប្រសើរសម្រាប់ម៉ាស៊ីន ។ ទោះបីជាមានការលើកឡើងបែបនេះក្ដី ក៏អ្នកជំនាញមួយចំនួននៅក្នុងវិស័យយានយន្ដយល់ថា សាំងប្រភេទណាក៏ល្អដែរ អ្វីដែលសំខាន់ គឺសាំងនោះសុទ្ធល្អ ។

បើតាមលោក សុខ សុភ័ក្រ អនុរដ្ឋលេខាធិការក្រសួងពាណិជ្ជកម្ម បានលើកឡើងថា តាមពិត គ្រប់រថយន្តទាំងអស់មិនមែនសុទ្ធតែអាចប្រើសាំងស៊ុបពែរបានទេ ព្រោះវាអាចបណ្ដាលឲ្យមានបញ្ហាដល់ដំណើរការម៉ាស៊ីន ធ្វើឲ្យម៉ាស៊ីនឆាប់ក្ដៅ និងធ្វើឲ្យរថយន្ដរត់មិនបានល្អ ជាដើម ។ លោកថា ៖« ការពិត មិនដូចអ្វីដែលយើងគ្រប់គ្នាគិតនោះទេ ។

យានយន្តខ្លះ គេមិនអនុញ្ញាតឲ្យចាក់ប្រេងសាំងស៊ុបពែរទេ វាអាចបណ្ដាលឲ្យម៉ាស៊ីនយានយន្តឆាប់ក្ដៅ និងឆាប់បង្កជាបញ្ហានៅប្រព័ន្ធណាមួយ ។ ជាក់ស្ដែង តាមអ្វីដែលខ្ញុំបានដឹង រថយន្តចេញស៊េរីក្រោយៗមួយចំនួនបានហាមមិនឲ្យចាក់ប្រេងស៊ុបពែរទេ គឺតម្រូវឲ្យចាក់តែប្រេងធម្មតា បើមិនអីចឹងទេ វាអាចបង្កឲ្យមានបញ្ហានៅកន្លែងផ្សេងនៃប្រព័ន្ធរថយន្តនោះ » ។

លោកបន្តថា វាមិនមែនជាការល្អទេ សម្រាប់អ្នកដែលប្រើរថយន្តមួយទឹក និងម៉ូតូមួយទឹក និយាយរួម ប្រើយានយន្តមួយទឹក តែចាក់សាំងស៊ុបពែរ ។ ផ្ទុយទៅវិញ វានឹងធ្វើឲ្យឆាប់ខូចដល់ដំណើរការម៉ាស៊ីនទៅវិញទេ ដូចនេះសូមកុំយល់ច្រឡំថា សាំងស៊ុបពែរជាសាំងល្អសម្រាប់គ្រប់យានយន្តនោះ ។ លោកនិយាយថា ៖« តាមបទពិសោធន៍កន្លងមកដែលក្រសួងបានទទួលពីអ្នកលក់រថយន្ដ នៅពេលដែលរដ្ឋទិញរថយន្ដចែកនៅក្រសួង ខាងអ្នកលក់ ឬម្ចាស់ហ្គារ៉ាសបានប្រាប់ថា កុំសូវចាក់សាំងស៊ុបពែរពេកអី ព្រោះវាមិនល្អសម្រាប់រថយន្តទេ គួរតែចាក់សាំងធម្មតាៗបានហើយ » ។

លោក សុខ សៅរឹទ្ធី អ្នកជំនាញផ្នែករថយន្តមួយរូបបានឲ្យដឹងថា លោកក៏បានដឹងដែរពីមតិជាច្រើនលើកឡើងថា ការប្រើសាំងស៊ុបពែរមិនល្អអីចេះ មិនល្អអីចុះ ឬថាការប្រើប្រាស់សាំងស៊ុបពែរធ្វើឲ្យដំណើរការម៉ាស៊ីនក្តៅ ជាដើម។ លោកថា ៖« ចំពោះបទពិសោធន៍ខ្ញុំផ្ទាល់ បើសិនជារថយន្តខ្ញុំមានសភាពមិនល្អ ខ្ញុំចាក់សាំងស៊ុបពែររួចបញ្ឆេះវាចោល ក្រោយមកឃើញថា វាក៏បានដំណើរការល្អឡើងវិញ ហើយក្រោយមកខ្ញុំប្រើសាំងធម្មតាវិញ ដូចនេះ ខ្ញុំមិនអាចសន្និដ្ឋានថា សាំងស៊ុបពែរក្តៅ ឬមិនល្អចំពោះរថយន្តដូចការលើកឡើងនោះទេ » ។

ចំណែកលោក ហ៊ឺន ចំណាប់ អ្នកគ្រប់គ្រងរោងជាងនៃក្រុមហ៊ុនលក់រថយន្ត Jaguar និង Land Rover បានឲ្យដឹងថា ៖« ខ្ញុំគិតថា សាំងប្រភេទណាក៏ល្អដែរ ឲ្យតែសាំងនោះសុទ្ធល្អ មិនមានលាយសារធាតុផ្សេងៗ មិនថាសាំងធម្មតា និងសាំងស៊ុបពែរទេ » ។

លោកបន្តថា តាមពិតទៅ ម៉ាស៊ីនដំណើរការមិនល្អ មិនពាក់ព័ន្ធទាំងស្រុងទៅលើការប្រើប្រាស់សាំងនោះទេ តែវាក៏ពាក់ព័ន្ធនឹងប្រព័ន្ធប្រេងផ្សេងៗទៀតនៅក្នុងម៉ាស៊ីន ។

ដូចនេះហើយទើបគេតម្រូវឲ្យអ្នកប្រើប្រាស់យានយន្តទាំងអស់ឧស្សាហ៍យកយានយន្តទៅត្រួតពិនិត្យ ហើយចំពោះមតិថា ចាក់សាំងធម្មតាល្អជាងសាំងស៊ុបពែរ ឬចាក់សាំងស៊ុបពែរល្អជាងសាំងធម្មតានោះ លោកមិនហ៊ានចេញជាយោបល់ទេ ក្នុងនាមជាជាងរថយន្តមួយរូបនៅកម្ពុជា តែយ៉ាងណាក៏ដោយ លោកបានផ្ដល់ជាយោបល់ដល់ម្ចាស់យានយន្តទាំងអស់ឲ្យប្រើប្រាស់សាំងណាដែលសុទ្ធល្អ បើអាច គួរប្រើសាំងស៊ុបពែរចំពោះរថយន្តស៊េរីថ្មី និងទំនើប ៕