ទីក្រុងសេអ៊ូល ៖ អចលនទ្រព្យនៅតំបន់Myeongdong នៃទីក្រុងសេអ៊ូល ត្រូវបានចាត់ទុកថាជាអចលនទ្រព្យពាណិជ្ជកម្មដែលមានតម្លៃខ្ពស់ជាងគេបំផុតរបស់ប្រទេសកូរ៉េខាងត្បូងអស់រយៈពេល១៥ឆ្នាំជាប់ៗគ្នាមកហើយ ។ នេះបើយោងតាមទិន្នន័យរបស់រដ្ឋាភិបាលប្រទេសមួយនេះ ។ យោងតាមទិន្នន័យដែលបានចេញដោយក្រសួងដែនដី ហេដ្ឋារចនាសម្ព័ន្ធ…
ទីក្រុងសេអ៊ូល ៖ អចលនទ្រព្យនៅតំបន់Myeongdong នៃទីក្រុងសេអ៊ូល ត្រូវបានចាត់ទុកថាជាអចលនទ្រព្យពាណិជ្ជកម្មដែលមានតម្លៃខ្ពស់ជាងគេបំផុតរបស់ប្រទេសកូរ៉េខាងត្បូងអស់រយៈពេល១៥ឆ្នាំជាប់ៗគ្នាមកហើយ ។ នេះបើយោងតាមទិន្នន័យរបស់រដ្ឋាភិបាលប្រទេសមួយនេះ ។
យោងតាមទិន្នន័យដែលបានចេញដោយក្រសួងដែនដី ហេដ្ឋារចនាសម្ព័ន្ធ និងការដឹកជញ្ជូនបានឲ្យដឹងថា ហាងលក់ទំនិញរបស់ក្រុមហ៊ុនគ្រឿងសម្អាងកូរ៉េ Nature Republic តម្លៃដែលប៉ាន់ស្មានដោយរដ្ឋាភិបាលលើដី និងហាងលក់ទំនិញនេះ បានកើនឡើង៦,១៦% បើធៀបនឹងឆ្នាំមុន មកស្មើ៨៥.០០០ដុល្លារក្នុងមួយម៉ែត្រការ៉េ ។
ចំណែកអចលនទ្រព្យដទៃទៀត ក្នុងតំបន់ Myeongdong ក៏បានជាប់ក្នុងបញ្ជីអចលនទ្រព្យទាំង១០ដែលមានតម្លៃខ្ពស់ជាងគេក្នុងប្រទេសនេះផងដែរ ។
អចលនទ្រព្យរបស់ក្រុមហ៊ុនលក់គ្រឿងអលង្ការ Lloyd និងClue គឺជាអចលនទ្រព្យដែលមានតម្លៃខ្ពស់ជាងគេលេខ២ និងលេខ៣ប្រចាំកូរ៉េខាងត្បូង ដែលមានតម្លៃប៉ាន់ស្មាន ប្រមាណ៨៤.០០០ដុល្លារក្នុងមួយម៉ែត្រការ៉េ ។
អចលនទ្រព្យរបស់អគារ Woori Bank វិញបានធ្លាក់មកចំណាត់ថ្នាក់លេខ៤វិញ ដែលមានតម្លៃប្រមាណ ៨២.០០០ដុល្លារក្នុងមួយម៉ែត្រការ៉េ បន្ទាប់ពីជាប់ចំណាត់ថ្នាក់លេខ២អស់រយៈពេលជាច្រើនឆ្នាំមក ។
តម្លៃដីជាមធ្យមក្នុងមួយម៉ែត្រការ៉េ បានកើនឡើង ៦,២៨%ផងដែរ ដោយមានដីក្នុងតំបន់ Mapo មើលឃើញតម្លៃកើនឡើងខ្លាំងជាងគេប្រមាណ១១,៨៩% ។ រីឯតម្លៃដីនៅតំបន់Seocho កើនឡើងបាន ៨,៧៦% ខណៈដែលតម្លៃដីក្នុង Yongsan និង Seongdong កើនបាន៨,១៤%ដូចគ្នា ។ ជាមួយគ្នានេះ តម្លៃដីក្នុងស្រុកGangnamវិញ ក៏កើនឡើងបាន ៧,៨៥% ផងដែរ ។
ក្រសួងដែនដីប្រទេសនេះក៏បានឲ្យដឹងពីតំបន់ដែលដីមានតម្លៃទាបជាងគេផងដែរ គឺដីនៅក្នុងតំបន់Uljin នៃខេត្ត Gyeongsang ភាគខាងជើង មានតម្លៃប្រមាណតែ១៣សេនប៉ុណ្ណោះក្នុងមួយម៉ែត្រការ៉េ ៕
ចែករំលែកព័តមាននេះ