រាជធានីភ្នំពេញ ៖ រដ្ឋមន្ត្រីក្រសួងទេសចរណ៍បានបញ្ជាក់ថា កម្ពុជា-ថៃ បានប្ដេជ្ញាជំរុញលំហូរភ្ញៀវទេសចរទៅវិញទៅមក និងរួមគ្នាធ្វើយ៉ាងណា ទាក់ទាញភ្ញៀវទេសចរមកពីប្រទេសទី៣ ឲ្យកាន់តែមានកំណើនថែមទៀត ។ លោក…
រាជធានីភ្នំពេញ ៖ រដ្ឋមន្ត្រីក្រសួងទេសចរណ៍បានបញ្ជាក់ថា កម្ពុជា-ថៃ បានប្ដេជ្ញាជំរុញលំហូរភ្ញៀវទេសចរទៅវិញទៅមក និងរួមគ្នាធ្វើយ៉ាងណា ទាក់ទាញភ្ញៀវទេសចរមកពីប្រទេសទី៣ ឲ្យកាន់តែមានកំណើនថែមទៀត ។
លោក ថោង ខុន រដ្ឋមន្ត្រីក្រសួងទេសចរណ៍បានថ្លែងបែបនេះ បន្ទាប់ពីជំនួបពិភាក្សាជាមួយលោក ប៉ាន់យ៉ារ៉ាក់ ពលទ័ព ឯកអគ្គរាជទូតថៃថ្មីប្រចាំកម្ពុជា កាលពីរសៀលថ្ងៃទី២៨ ខែឧសភា ឆ្នាំ២០១៨នេះ ។
លោករដ្ឋមន្ត្រីបន្ដថា ប្រទេសថៃគឺជាកន្លែងប្រមូលផ្តុំទេសចរបរទេស ដែលក្នុង១ឆ្នាំៗប្រទេសនេះទទួលទេសចរបរទេសជាង៣០លាននាក់ ។ ទន្ទឹមនឹងនេះ ប្រទេសថៃសម្បូរជើងហោះហើរត្រង់ពីប្រទេសនានាក្នុងពិភពលោក ដូចជា មកពីអឺរ៉ុប អាមេរិក អូសេអានី ជប៉ុន កូរ៉េ ចិន ខណៈដែលកម្ពុជាមិនទាន់មានជើងហោះហើរត្រង់ពីប្រទេសឆ្ងាយៗមួយចំនួននៅឡើយ ។ ដូច្នេះហើយ នេះជាឱកាសដែលកម្ពុជាត្រូវសហការជាមួយប្រទេសថៃ ដើម្បីរួមគ្នាទាក់ទាញទេសចរប្រទេសទី៣ឲ្យបានកាន់តែច្រើន ។
លោករដ្ឋមន្ត្រីថ្លែងអះអាងថា នៅឆ្នាំ២០១៧ ទេសចរថៃមកកម្ពុជាមានជិត៤០ម៉ឺននាក់ ប៉ុន្តែទេសចរកម្ពុជាទៅលេងប្រទេសថៃវិញមានជាង៧០ម៉ឺននាក់ ច្រើនជាងទេសចរថៃមកលេង កម្ពុជា ហើយនៅឆ្នាំ២០១៨នេះ ប្រទេសទាំងពីរក៏រំពឹងទុកថា ទេសចរដែលទៅមកប្រទេស រៀងៗខ្លួននឹងបន្តកើនឡើងផងដែរ ប៉ុន្តែត្រូវតែមានការបើកច្រកទ្វារអន្តរជាតិកម្ពុជា-ថៃ ឲ្យបានច្រើនថែមទៀត ។
ថ្វីដ្បិតភាគីទាំងពីរចាំបាច់ត្រូវបើកច្រកទ្វារអន្តរជាតិបន្ថែមក៏ពិតមែន ប៉ុន្តែការសម្រួលការធ្វើដំណើរ និងការដឹកជញ្ជូនទេសចរ ក៏ត្រូវយកចិត្តទុកដាក់ផងដែរ ។ ត្រង់ចំណុចនេះ កម្ពុជាកំពុងពិភាក្សាលើការសម្រួលការដឹកជញ្ជូនទេសចរពីប្រទេសថៃ តាមច្រកទ្វារព្រំដែនអន្តរជាតិទាំងឡាយ ឲ្យភ្ញៀវទេសចរដែលមកពីប្រទេសថៃងាយស្រួលក្នុងការធ្វើដំណើរទៅមក ពិសេស បែបបទចេញចូលសម្រាប់មធ្យោបាយធ្វើដំណើរផ្ទាល់ខ្លួន ឬជាគ្រួសារ ដើម្បីឲ្យស្របទៅនឹងនិន្នាការថ្មី គឺទេសចរណ៍បើកបរដោយខ្លួនឯង ។
លោករដ្ឋមន្ត្រី ថោង ខុន ក៏បានស្នើឲ្យភាគីថៃជួយបណ្ដុះបណ្ដាលធនធានមនុស្សកម្ពុជា ក្នុងវិស័យទេសចរណ៍ផងដែរ ព្រោះថៃមានបទពិសោធន៍ច្រើនឆ្នាំ ក្នុងការអភិវឌ្ឍធនធានមនុស្សលើវិស័យទេសចរណ៍ ក៏ដូចជាការគ្រប់គ្រងរមណីយដ្ឋានទេសចរណ៍ ៕
ចែករំលែកព័តមាននេះ