ខេត្តបន្ទាយមានជ័យ ៖ រថយន្ត១គ្រឿងដឹកសត្វព្រៃជាង៧០០គីឡូក្រាមនាំចូលពីប្រទេសថៃមកកម្ពុជាតាមច្រករបៀងស្រុកម៉ាឡៃត្រូវបានកម្លាំងនគរបាលចាប់បានប្រគល់ជូនមន្ត្រីរដ្ឋបាលព្រៃនៅព្រឹកថ្ងៃទី២៨ ខែឧសភា ឆ្នាំ២០១៨ នៅស្នងការនគរបាលខេត្តបន្ទាយមានជ័យ ។ លោកឧត្តមសេនីយ៍ត្រី ចាប សុផារិទ្ធិ…
ខេត្តបន្ទាយមានជ័យ ៖ រថយន្ត១គ្រឿងដឹកសត្វព្រៃជាង៧០០គីឡូក្រាមនាំចូលពីប្រទេសថៃមកកម្ពុជាតាមច្រករបៀងស្រុកម៉ាឡៃត្រូវបានកម្លាំងនគរបាលចាប់បានប្រគល់ជូនមន្ត្រីរដ្ឋបាលព្រៃនៅព្រឹកថ្ងៃទី២៨ ខែឧសភា ឆ្នាំ២០១៨ នៅស្នងការនគរបាលខេត្តបន្ទាយមានជ័យ ។
លោកឧត្តមសេនីយ៍ត្រី ចាប សុផារិទ្ធិ ស្នងការរងទទួលផ្នែកប្រឆាំងបទល្មើសសេដ្ឋកិច្ចនៃស្នងការដ្ឋាននគរបាលខេត្តបន្ទាយមានជ័យបានប្រាប់ថា កម្លាំងនគរបាលប្រឆាំងបទល្មើសសេដ្ឋកិច្ចខេត្តបន្ទាយមានជ័យបានធ្វើការស្រាវជ្រាវកំណត់មុខសញ្ញឃាត់រថយន្ត១គ្រឿងពាក់ស្លាកលេខ បន្ទាយមានជ័យ ២A-៧២៨២ ដែលដឹកសត្វព្រៃ២ប្រភេទ ទំងន់៧២១គីឡូក្រាម មានសត្វអន្សងចំនួន៧០ក្បាល ស្មើទំងន់៣៥១គីឡូក្រាម, សត្វអណ្តើក៦១៨ក្បាល ទំងន់៤០៦គីឡូក្រាម និងឃាត់អ្នកបើកបររថយន្តម្នាក់កាលពីវេលាម៉ោង៩និង៣០នាទីយប់ ថ្ងៃទី២៧ ខែឧសភា ឆ្នាំ២០១៨ នៅតាមកំណាត់ផ្លូវជាតិលេខ៥៩ ស្ថិតភូមិថ្មី ឃុំម៉ាឡៃ ស្រុកម៉ាឡៃ ។
លោកបានបញ្ជាក់ថា ក្រោយពេលឃាត់រថយន្ត១គ្រឿងដឹកសត្វព្រៃនេះ និងឃាត់អ្នកបើកបររថយន្តម្នាក់ឈ្មោះ សោម កែវ ភេទប្រុស អាយុ២៤ឆ្នាំ រស់នៅភូមិវាលហាត់ ឃុំម៉ាឡៃ ស្រុកម៉ាឡៃ បានបញ្ជូនទៅកាន់ស្នងការដ្ឋាននគរបាលខេត្តបន្ទាយមានជ័យដើម្បីធ្វើការសាកសួរ ។
តាមចម្លើយសារភាពគឺស៊ីឈ្នួលបើកបររថយន្តដឹកសត្វព្រៃឱ្យឈ្មោះ ជីម និងឈ្មោះ ភ័ណ ជាឈ្មួញសត្វព្រៃរស់នៅភូមិបឹងបេង ឃុំបឹងបេង ស្រុកម៉ាឡៃ ក្នុង១ជើងតំលៃ១០ម៉ឺនរៀល ដែលរកស៊ីរយៈពេលជាង១ឆ្នាំមកហើយ ដឹកនាំមកពីថៃយកចូលកម្ពុជាតាមច្រករបៀង ក្បែរវត្តឡងខង និងច្រករបៀងអរប៉ នៅជិតវត្ត៩៣ និងច្រករបៀងជិតរោងវែង ស្ថិតភូមិសាស្គ្រស្រុកម៉ាឡៃ ក្នុងគោលដៅដឹកចេញពីភូមិសាស្ត្រខេត្តបន្ទាយមានជ័យឆ្លងកាត់ខេត្តបាត់ដំបងឆ្ពោះទៅភ្នំពេញ ។
លោកឧត្តមសេនីយ៍ទោ អាត់ ខែម ស្នងការនគរបាលខេត្តបន្ទាយមានជ័យបានបញ្ជាក់ថា ក្រោយពេលកម្លាំងនគរបាលប្រឆាំងបទល្មើសសេដ្ឋកិច្ចខេត្តបង្ក្រាបចាប់បានរថយន្តដឹកសត្វព្រៃនាំចូលពីថៃមកកម្ពុជាហើយឃាត់អ្នកបើកបរម្នាក់តាមចម្លើយគឺកំពុងស្រាវជ្រាវចាប់ខ្លួនឈ្មួញនាំចូលសត្វព្រៃល្មើសច្បាប់បន្តទៀតដើម្បីចាត់ការតាមច្បាប់ ។
ចំណែកសត្វព្រៃពីរប្រភេទខាងលើត្រូវបានកម្លាំងជំនាញប្រគល់ជូនឱ្យមន្ត្រីនាយខណ្ឌរដ្ឋបាលព្រៃឈើ ខេត្តបន្ទាយមានជ័យ រីឯរថយន្ត១គ្រឿង និងអ្នកបើកបរត្រូវបានបញ្ជូនទៅកាន់សាលាដំបូងខេត្តបន្ទាយមានជ័យចាត់ការតាមច្បាប់ ៕
ចែករំលែកព័តមាននេះ