រាជធានីភ្នំពេញ ៖ ជនសង្ស័យចំនួន៤នាក់ បានធ្វើសកម្មភាពឆក់កាបូបពីស្ត្រីម្នាក់ដែលជាប្រពន្ធ របស់សន្តិសុខសាលាខណ្ឌដង្កោម្នាក់បានសម្រេច បន្ទាប់មកបានព្យាយាមជិះម៉ូតូគេចខ្លួន។ ប៉ុន្តែត្រូវបានជនរងគ្រោះស្រែថាចោរៗ បង្កការភ្ញាក់ផ្អើល ហើយត្រូវបានកម្លាំងនគរបាលខណ្ឌដង្កោ កំពុងល្បាតប្រទះឃើញដេញតាមប៉ផាប់ចាប់ពភីង ហើយចាប់ខ្លួនបានទាំង៤នាក់តែម្ដង។ ហេតុការណ៍នោះបានកើតឡើង កាលពីវេលាម៉ោង៤ និង១០នាទីល្ងាច ថ្ងៃទី២៧ ខែឧសភា ឆ្នាំ២០១៨ នៅតាមផ្លូវលេខ២១៧ ហៅផ្លូវចម្ការដូង ត្រង់ចំណុចខាងជើងក្លោងទ្វារវត្តព្រះបាទជាន់ឯក ស្ថិតនៅភូមិជើងឯក សង្កាត់ជើងឯក ខណ្ឌដង្កោ រាជធានីភ្នំពេញ។ នគរបាលបានឲ្យដឹងថា ស្ត្រីដែលជាជនរងគ្រោះឈ្មោះ ឈាន សុដា ភេទស្រី អាយុ២១ឆ្នាំត្រូវជាប្រពន្ធរបស់ឈ្មោះ សំអាង សុបណ្ឌិត អាយុ២២ឆ្នាំ មុខរបរសន្តិសុខសាលាខណ្ឌដង្កោ មានទីលំនៅភូមិកណ្តាល សង្កាត់រលួស ខណ្ឌដង្កោ រាជធានីភ្នំពេញ។
ដោយឡែកជនសង្ស័យមានគ្នាចំនួន៤នាក់ ក្នុងនោះរួមមាន ១-ឈ្មោះ ទី ទេពី អាយុ១៨ឆ្នាំ មុខរបរមិនពិតប្រាកដ ស្នាក់នៅផ្ទះសំណាក់សេះមាស ផ្លូវវេងស្រេង ស្ថិតនៅភូមិដំណាក់ធំ២ សង្កាត់ស្ទឹងមានជ័យ៣ ខណ្ឌមានជ័យ រាជធានីភ្នំពេញ។ ២-ឈ្មោះ អ៊ុច សាវីន អាយុ១៨ឆ្នាំ មុខរបរមិនពិតប្រាកដ មានទីលំនៅក្នុងបុរីចម្ការដូង ស្ថិតនៅភូមិថ្មី សង្កាត់ដង្កោ ខណ្ឌដង្កោ រាជធានីភ្នំពេញ។ ៣-ឈ្មោះ សំ ទិ អាយុ១៨ឆ្នាំ មុខរបរមិនពិតប្រាកដ ៤-ឈ្មោះ ផល អ៊ីណា អាយុ១៨ឆ្នាំ មុខរបរមិនពិតប្រាកដ ទាំង២នាក់នេះមានទីលំនៅភូមិអន្លង់គង សង្កាត់ព្រៃស ខណ្ឌដង្កោ រាជធានីភ្នំពេញ ជាមួយគ្នា។ នគរបាលបានបន្តថា នៅមុនពេលកើតហេតុបុរសជាសន្តិសុខបានជិះម៉ូតូ ១គ្រឿងម៉ាកហុងដាឌ្រីមសេ១២៥ ពណ៌ខ្មៅ ពាក់ស្លាកលេខ ភ្នំពេញ1GY-3526 ឌុបប្រពន្ធ និងម្តាយក្មេកឈ្មោះ សេក ច័ន្ទ អាយុ៦០ឆ្នាំ ចេញពីផ្ទះស្ថិតនៅក្នុងភូមិកណ្តាល សង្កាត់រលួស ខណ្ឌដង្កោ រាជធានីភ្នំពេញ ឆ្ពោះទៅកាន់ខេត្តកំពង់ឆ្នាំង។ ដោយបើកម៉ូតូធ្វើដំណើរក្នុងទិសដៅ ពីត្បូងទៅជើង លុះពេលទៅដល់ត្រង់ចំណុចកើតហេតុខាងលើស្រាប់ ជនសង្ស័យទាំង៤នាក់នោះ ជិះម៉ូតូ០២គ្រឿង ក្នុងនោះម៉ាកហុងដាឌ្រីមសេ១២៥ ពណ៌ទឹកប្រាក់ ពាក់ស្លាកលេខ កំពង់ធំ1K-6009 មានលេខតួ និងលេខ ម៉ាស៊ីន5194387 មួយគ្រឿង។
និងម៉ាកហុងដាឌ្រីមសេ១២៥ ពណ៌ខ្មៅ ស៊េរីឆ្នាំ២០១៨ ពាក់ស្លាកលេខភ្នំពេញ1GX-5937 មួយគ្រឿង មានលេខតួ និងលេខម៉ាស៊ីន5236984 ស្របទិសគ្នាតាមពីក្រោយ។ ប្រភពខាងលើបានបន្តថា លុះពេលទៅដល់ទន្ទឹមជនសង្ស័យឈ្មោះ ទី ទេពី និងឈ្មោះ អ៊ុច សាវីន បានជិះម៉ូតូមកអែបខាងឆ្វេងរួចបានធ្វើសកម្មភាពឆក់ យកកាបូបដៃពីជនរងគ្រោះ បានសម្រេចរួចបើកម៉ូតូគេចខ្លួនទៅទិសខាងជើង។ ពេលនោះជនរងគ្រោះក៏បានស្រែកឆោឡោថាចោរៗ បង្កការភ្ញាក់ផ្អើល ខណៈនោះកម្លាំងនគរបាលប៉ុស្តិ៍កំពុងល្បាត តាមផ្លូវលេខ២១៧ ជិតនោះស្រាប់ ក៏បានជួយអន្តរាគមន៍ ដេញតាមចាប់ជនសង្ស័យបានទាំង០៤នាក់ ខាងលើរហូតដល់ត្រង់ចំណុច ខាងមុខសាកលវិទ្យាល័យកសិកម្មចម្ការដូង ស្ថិតនៅក្នុងភូមិខ្វា សង្កាត់ដង្កោ ខណ្ឌដង្កោ រាជធានីភ្នំពេញ ទើបឃាត់បានជាបន្តបន្ទាប់។ ក្រោយចាប់ខ្លួននគរបានបានដកហូតយកបានកាបូបនោះវិញ ហើយនៅក្នុងកាបូបនោះ រួមមានទូរស័ព្ទដៃម៉ាកអាយហ្វូន១គ្រឿង ,ម៉ាកណូគាចុចពិល១គ្រឿង ,លុយចំនួន៣៥,០០០រៀល(បីម៉ឺនប្រាំពាន់រៀល) រួមជាមួយម៉ូតូរបស់ជនសង្ស័យទាំងនោះផងដែរ។ បន្ទាប់មកបាននាំទៅធ្វើការសាកសួរ នៅអធិការដ្ឋាន នគរបាលខណ្ឌដង្កោភ្លាមៗ។ ហើយជនសង្ស័យ បានសារភាពថា ពួកគេទាំង០៤នាក់ខាងលើ ពិតជាបានធ្វើសកម្មភាពឆក់កាបូប ដៃរបស់ជនរងគ្រោះប្រាកដមែន៕
ចែករំលែកព័តមាននេះ