រាជធានីភ្នំពេញ ៖ តារាប្រុសមួយចំនួននិយមហាត់ប្រាណយកសាច់ដុំ និងឱ្យមានរាងស្អាត ។ បើទោះជាមានការនឿយហត់ ឬមមាញឹកនឹងអាជីពបែបណាក្តី តារាទាំងនោះមិនចោលការហាត់ប្រាណរក្សារាងទេ ។ តារាសម្តែងលោកអែត…
រាជធានីភ្នំពេញ ៖ តារាប្រុសមួយចំនួននិយមហាត់ប្រាណយកសាច់ដុំ និងឱ្យមានរាងស្អាត ។ បើទោះជាមានការនឿយហត់ ឬមមាញឹកនឹងអាជីពបែបណាក្តី តារាទាំងនោះមិនចោលការហាត់ប្រាណរក្សារាងទេ ។
តារាសម្តែងលោកអែត វីន បានព្យាយាមហាត់ប្រាណយកសាច់ដុំឱ្យមានមាឌមាំគួរឱ្យចាប់អារម្មណ៍ ពិសេសទាក់ភ្នែកនារី ។ តាំងពីបង្វឹករាងកាយឱ្យមាំមួនមក អេតវីន មានទីផ្សារសម្តែងលូតឡើងស្ទើរតែនាំមុខគ្រងបានតំណែងតួឯកជាបន្តបន្ទាប់ ពេញនិយមសម្រាប់ទីផ្សារភាពយន្តភាគ និងដុំ ។ ក្រៅពីនេះអេតវីនធ្លាប់មានប្រវត្តិជាប់ចំណាត់ថ្នាក់ល្អលើការបង្អួតរាងនៅបរទេសកន្លងមក ហើយ ថ្មីៗកន្លងមកទើបតែទទួលបានពានរង្វាន់មួយនៅប្រទេសកូរ៉េ ។
លោកទេព រិនដារ៉ូ បើទោះជាមានវ័យចំណាស់ក៏ពិតមែន តែលោកនៅតែប្រមូលបានការងារថតភាពយន្តជាបន្តបន្ទាប់ ។ ជាទូទៅលោកទេព រិនដារ៉ូ គឺជាកំពូលអ្នកថែទាំសុខភាព គឺឱ្យតែទំនេរពីថតលោករមែងឆ្លៀតពេលហាត់ប្រាណរក្សារាងឱ្យមាំទាំ ។
លោកឧស្សាហ៍បង្ហោះរូបហាត់ប្រាណជូនអ្នកគាំទ្រ និងធ្វើឱ្យមហាជនលាន់មាត់សរសើរពីការរក្សារាងបានល្អ ។ បើនិយាយពីសាច់ដុំវិញអស់ទាស់ណែនល្អ ។ ភាពមាំទាំរក្សារាងរៅនេះហើយធ្វើឱ្យលោកទេព រិនដារ៉ូ នៅតែបន្តភាពល្បីល្បាញដល់សព្វថ្ងៃ ។
តារាសម្តែងយុទ្ធ ឋានៈដែលលេចមុខមាត់នៅផលិតកម្មមហាហង្ស និងផលិតកម្មដទៃទៀតក៏យកចិត្តទុកដាក់ហាត់ប្រាណបញ្ចេញញើស និងធ្វើឲ្យរាងកាយមាំមួនមើលទៅស្រស់សង្ហា ។ លោកឋានៈ ទទួលបានការចាប់អារម្មណ៍បន្ទាប់ពីការងារសិល្បៈកាន់តែរីកលូតលាស់ជាងមុន។ អាចថាមកពីលោកមានកម្ពស់ និងរាងកាយមាំមួន សាច់ដុំល្អ ទើបផលិតករជ្រើសរើសបន្តពីមួយរឿងទៅមួយរឿង មិនថាតួកាច ឬស្លូតទេ ។
តារាសម្តែងលោកអ៊ុន សិទ្ធា បើនិយាយពីមាឌរបស់លោកវិញមាំមួនល្អ មុខមាត់ក្នុងទម្រង់បែបខ្មែរ ។ កន្លងមកមិនថាតួបុរាណ សម័យទេ លោកអ៊ុន សិទ្ធា បានគ្រងច្រើនរួចមកហើយ ។
តាមហ្វេសប៊ុកលោកអ៊ុន សិទ្ធា ធ្លាប់រំលេចការហាត់ប្រាណទៅតាមក្បួនគ្រូបង្ហាត់ធ្វើឱ្យដងខ្លួនកាន់តែមាំ សាច់ហាប់ ។
តារាសម្តែងភឹម តារាវិបុល មានរាងរៅ សង្ហាដោយលោកព្យាយាមហាត់ប្រាណរំលេចសាច់ដុំ ។ លោកទទួលបានតំណែងសម្តែងនៅក្នុងខ្សែភាពយន្តភាគជាបន្តបន្ទាប់ដូចតារាមួយចំនួនទៀតដែរ ។
លោកភឹម តារាវិបុល បានវិវឌ្ឍខ្លួនយូរមកហើយក្នុងតំណែងតួឯក ពិសេសស្នាដៃនៅក្នុងផលិតកម្មមហាហង្ស ៕
ចែករំលែកព័តមាននេះ