ខេត្តបាត់ដំបង ៖ ស្ត្រីម្នាក់បានប្រទះឃើញព្រះមួយអង្គធ្វើពីកែវពណ៌ខៀវ-បៃតងយ៉ាងល្អប្រណីត ក្នុងខណៈដែលគាត់ទៅជីកទំពាំងក្នុងគុម្ពឫស្សីនៅក្បែរផ្ទះ កាលពីវេលាម៉ោង៨ព្រឹកថ្ងៃទី១១ កុម្ភៈ ឆ្នាំ២០១៣ ស្ថិតក្នុងភូមិព្រៃរកា សង្កាត់អូរម៉ាល់ ក្រុងបាត់ដំបង ។ ការប្រទះឃើញព្រះមួយអង្គនេះ ធ្វើឱ្យអ្នកភូមិមានការភ្ញាក់ផ្អើលយ៉ាងខ្លាំងរហូតមានព្រឹទ្ធាចារ្យក្នុងមូលដ្ឋានខ្លះអះអាងថា ព្រះពុទ្ធរូបនោះមានអាយុកាលច្រើនសតវត្សរ៍ និងកសាងពីកែវមរកតទៀតផង ។
ស្ត្រីវ័យ៤៥ឆ្នាំ ឈ្មោះនឿម សម្បត្តិ ដែលជាអ្នកប្រទះឃើញព្រះពុទ្ធរូបដ៏ល្អប្រណីតនេះនិយាយថា គាត់បានទៅជីកទំពាំងនៅក្នុងគុម្ពឫស្សីក្បែររបងក្នុងដីរបស់គាត់ ហើយប្រទះឃើញព្រះពុទ្ធរូបនោះពេលគាត់ជីកគាស់យកទំពាំង ។ អ្នកស្រីនឿម សម្បត្តិ បានរំលឹកឡើងវិញថា កាលពីខែមុន អ្នកស្រីធ្លាប់ទៅជីកទំពាំងនៅគុម្ពឫស្សីនោះម្តងហើយ ។ គ្រានោះអ្នកស្រីជីកប៉ះវត្ថុរឹងម្យ៉ាង ហើយសង្ស័យថា ជា«គ្រាប់បែក» ទើបមិនហ៊ានប៉ះពាល់និងក៏មិនបាននិយាយប្រាប់គេឯងដែរ លុះនៅព្រឹកថ្ងៃទី១១ កុម្ភៈ អ្នកស្រីក៏ទៅរកជីកទំពាំងនៅកន្លែងដដែលនោះម្តងទៀត ។ អ្នកស្រីបញ្ជាក់ថា គ្រានោះគាត់ឃើញវត្ថុចម្លែកនៅកន្លែងដដែល ក៏ប្រថុយយកដៃបោសលើវាថ្នមៗ លុះបន្តិចក្រោយមកក៏ស្រាប់តែលេចនូវពន្លឺចាំងដូចកញ្ចក់ពណ៌បៃតង។ បន្ទាប់មកគាត់ក៏បោសដីចេញអស់ឃើញច្បាស់គឺជាព្រះអង្គដែលត្រូវឫសឫស្សីហ៊ុមព័ទ្ធជិត ហើយអ្នកស្រីក៏លើកកាន់យកមកផ្ទះបង្ហាញអ្នកភូមិឱ្យឃើញ និងមានការភ្ញាក់ផ្អើលតែម្តង ។
តាមការពិនិត្យជាក់ស្តែងព្រះពុទ្ធរូបនោះ គង់ជាព្រះភ្នែន កម្ពស់ជាង១តឹក មានទម្ងន់ជាង៣ខាំ ធ្វើពីកែវពណ៌ខៀវ-បៃតង តែគ្មានបល័្លង្កទេ។ តាមអ្នកភូមិខ្លះអះអាងថា ព្រះពុទ្ធរូបដ៏ល្អប្រណីតនេះត្រូវគេកសាងពី«កែវមរកត»។ ស្ត្រីវ័យ៧៥ឆ្នាំ ឈ្មោះហ៊ឹម ហ៊ុំ ដែលគាត់អះអាងថា ជាអ្នករស់នៅក្នុងភូមិ-ឃុំ នេះច្រើនជំនាន់ និងតាំងពីតូចក្រូចឆ្មារមកនិយាយថា កាលពីសម័យដើមនៅទីនោះ(កន្លែងឃើញព្រះ)គ្មានផ្ទះអ្នកភូមិទេ តែជាទីទួលមួយដែលមានស្រះទឹកដ៏ធំមួយនៅក្បែរនោះ ។ គាត់បញ្ជាក់ថា ព្រះពុទ្ធរូបនោះអាចត្រូវគេយកទៅកប់ក្នុងអំឡុងសម័យខ្មែរក្រហម ។ លោកយាយហ៊ឹម ហ៊ុំ ក៏ដូចចាស់ព្រឹទ្ធាចារ្យក្នុងភូមិជាច្រើននាក់ទៀត ក៏បានអះអាងស្រដៀងគ្នាដែរថា ព្រះពុទ្ធរូបនេះគឺគេកសាងអំពី«កែវមរកត»ដែលអាចមានអាយុកាលរាប់សតវត្សមកហើយ ។
គេមិនទាន់ឃើញមានមន្ត្រីជំនាញណាម្នាក់ចុះទៅពិនិត្យព្រះពុទ្ធរូបដ៏កម្រនេះទេ ក្រោយពីការប្រទះឃើញនាព្រឹកថ្ងៃទី១១ កុម្ភៈនោះ។ ប៉ុន្តែគេឃើញសមត្ថកិច្ចមូលដ្ឋានបានចុះទៅមើលដែរ ក្រោយពីមានការភ្ញាក់ផ្អើល ហើយមន្ត្រីទាំងនោះបានស្នើសុំព្រះពុទ្ធរូបនោះពីអ្នករកឃើញដោយអះអាងថា យកមករក្សាទុកតែមិនត្រូវបានស្ត្រីជាអ្នកប្រទះឃើញប្រគល់ឱ្យទេ ព្រោះមិនទុកចិត្ត ។ ជាមួយគ្នានេះ អ្នកស្រីនឿម សម្បត្តិ ក៏បានបញ្ជាក់ដែរថា អ្នកស្រីមិនអាចប្រគល់ព្រះពុទ្ធរូបនោះទៅឱ្យអ្នកណាទេ ព្រោះគាត់រកឃើញនៅក្នុងដីភូមិរបស់គាត់ ដូច្នេះគាត់ត្រូវរក្សាទុកក្នុងផ្ទះគាត់ដែលគាត់គិតថា ព្រះពុទ្ធរូបអង្គនេះនឹងជួយឱ្យក្រុមគ្រួសារគាត់ត្រជាក់ត្រជំបានសេចក្តីសុខចម្រើនជាមិនខាន ។
អ្វីដែលគួរឱ្យកត់សម្គាល់ជាងនេះ គឺក្រោយពីគេគាស់យកព្រះពុទ្ធរូបនេះចេញពីគុម្ពឫស្សីមួយសន្ទុះ ស្រាប់តែគេឃើញមនុស្សជាច្រើនមានចាស់ មានក្មេងនាំគ្នាសម្រុកទៅជីកយកគល់ឫស្សីដែលមានឫសចាក់ស្រេះរុំលើព្រះពុទ្ធបដិមានោះមកកាត់ចែកគ្នាទុកឆ្លាក់ធ្វើព្រះ ដែលពួកគេមានជំនឿថា ពូកែទុកសម្រាប់ការពារខ្លួនទៀតផង ៕
ចែករំលែកព័តមាននេះ