រាជធានីភ្នំពេញ ៖ បុរសជាសន្តិសុខឯកជនបីនាក់ត្រូវក្រុមអ្នកស្ទាក់ផ្លូវហៅម៉ូយកាក់ឲ្យចូលទៅផឹកស៊ីច្រៀងខារ៉ាអូខេ ក្នុងហាងយីហោម៉ាន់នី KTV ដោយប្រាប់ថា ស្រាបៀរមួយឈុតតម្លៃ២០ដុល្លារ លុះដល់ពេលគិតលុយអស់រហូតដល់ទៅ៥៨ម៉ឺន ក៏ប្តឹងសមត្ថកិច្ចឲ្យជួយអន្តរាគមន៍ បង្កអោយមានការភ្ញាក់ផ្អើលដល់សមត្ថកិច្ចមូលដ្ឋានចុះមកអន្តរាគមន៍ភ្លាមៗកាលពីវេលាម៉ោង១១យប់ថ្ងៃទី១៧ ខែឧសភា ឆ្នាំ២០១៨ ត្រង់ចំណុចហាងខារ៉ាអូខេយីហោ ម៉ាន់នី KTV តាមបណ្តោយផ្លូវ២០០៤ ស្ថិតក្នុងសង្កាត់កាកាបទី១ ខណ្ឌពោធិ៍សែនជ័យ។
បើតាមសម្តីពីបុរសម្នាក់ឈ្មោះ សុខ ជា អាយុ២៣ឆ្នាំ ជាសន្តិសុខឯកជន ស្នាក់នៅម្តុំអាកាសយានដ្ឋានអន្តរជាតិភ្នំពេញ ស្ថិតក្នុងសង្កាត់កាកាបទី១ ខណ្ឌពោធិ៍សែនជ័យ មានស្រុកកំណើតនៅស្រុកអូររាំងឳ ខេត្តត្បូងឃ្មុំ ជាភ្ញៀវម្នាក់ក្នុងចំណោមបីនាក់ខាងលើបានរៀបរាប់ឱ្យដឹងថា នៅមុនពេលកើតហេតុ ពួកគាត់ទាំងបីនាក់បានជិះម៉ូតូមួយគ្រឿងម៉ាក វីវ៉ា ពណ៌ខ្មៅ ពាក់ស្លាកលេខ ភ្នំពេញ ១AC-៤៤២៤ ទើបតែចេញពីកន្លែងធ្វើការនៅម្តុំវិទ្យាល័យសន្ធរម៉ុក គោលបំណងជិះត្រលប់ទៅផ្ទះវិញនៅម្តុំពោធិ៍ចិនតុង បានធ្វើដំណើរតាមបណ្តោយផ្លូវ២០០៤ ក្នុងទិសដៅពីកើតទៅលិច។ លុះពេលមកដល់ចំណុចកើតហេតុស្រាប់តែមានបុរសពីរទៅបីនាក់បានរត់ចេញពីក្នុងហាងមកកាក់ពីខាងមុខម៉ូតូរបស់ពួកគាត់ ហើយបានហៅពួកគាត់ឲ្យចូលទៅផឹកនៅខាងក្នុងហាងខាងលើ ដោយប្រាប់ថា ស្រាបៀរមួយឈុតតម្លៃតែ២៨ដុល្លារ ។ ពេលនោះពួកគាត់ក៏បានប្រកែកមិនព្រមចូលនោះទេ បន្ទាប់មកបុរសដែលបានរត់មកស្ទាក់ពួកគាត់បានបញ្ចុះតម្លៃត្រឹម២៥ដុល្លារ រហូតនៅសល់តែ២០ដុល្លារក្នុងមួយឈុត ក្នុងនោះមានស្រាបៀរមួយកេស និងសាច់ក្លែមបួនមុខ ហើយសាច់ក្លែមបួនមុខនោះមាន សណ្តែកដីមួយចាន ស្វាយក្រឡុកមួយចាន ប្រហិតក្តាមមួយ
ចាន និងសាច់ប៉ាត់តេមួយចាន។
ប្រភពដដែលបន្តថា ពេលនោះដោយពួកគាត់គិតថាតម្លៃថោកគួរសមដែរក៏សម្រេចចិត្តនាំគ្នាចូលទៅផឹកស៊ីច្រៀងលេងកំសាន្តនៅក្នុងហាងកើតហេតុខាងលើ ដោយបានឱ្យនារីបម្រើការនៅក្នុងហាងនោះមកអង្គុយជាមួយចំនួនបីនាក់ផងដែរ។ លុះដល់ពេលផឹកអស់ជិតកន្លះកេស ក៏ស្រាប់តែមានអ្នករត់តុលើកសាច់ក្លែមមកឲ្យពួកគាត់បីទៅបួនចានបន្ថែមទៀត។ ពេលនេះពួកគាត់ក៏បានសួរទៅអ្នករត់តុថាគាត់មិនបានហៅសាច់ក្លែមទាំងនេះទេ ម៉េចក៏យកមក? អ្នករត់តុក៏បានឆ្លើយមកវិញថា អត់អីទេបង គឺសាច់ក្លែមទាំងនេះ Free ទេបង ។ ដោយឃើញសភាពមិនស្រួល ពួកគាត់ក៏បានឲ្យអ្នករត់តុគិតលុយ មួយស្ទុះក្រោយមកអ្នករត់តុក៏បានចេញវិក្កយបត្រមកឲ្យពួកគាត់ គឺអស់រហូតទៅដល់៥៨ម៉ឺនរៀលឯណោះ តែគាត់មិនបានមើលថាគេគិតទៅលើអ្វីខ្លះនោះទេ។ ដោយសារតម្លៃនេះគឺលើសពីតម្លៃដែលពួកគាត់បាននិយាយតថ្លៃគ្នាជាមួយនឹងបុគ្គលិកដែលបម្រើការនៅក្នុងហាងនេះ មុនពេលពួកគាត់ចូលផឹកស៊ី ដោយក្នុងមួយឈុតតម្លៃតែ២០ដុល្លារប៉ុណ្ណោះ។
ប្រភពដដែលបន្តទៀតថា បន្ទាប់មកពួកគាត់ប្រកែកមិនព្រមបង់លុយទៅឲ្យម្ចាស់ហាងនោះទេ ស្រាប់តែមានបុរសបួនទៅប្រាំនាក់បានមកជេរដៀល និងគំរាមវាយទៅលើពួកគាត់ ប្រសិនបើមិនព្រមបង់លុយឲ្យទៅតាមវិក្កយបត្រដែលបានចេញមកហើយនោះ ព្រមទាំងចង់យកម៉ូតូរបស់ពួកគាត់ទៅទុកនៅក្នុងហាងថែមទៀតផង ។ ទោះបីជាពួកគាត់ព្រមសម្រួលបង់លុយឲ្យចំនួន៣០ម៉ឺនរៀលយ៉ាងណាក៏ដោយ ក៏ខាងម្ចាស់ហាងកើតហេតុខាងលើមិនព្រមឲ្យពួកគាត់ចេញទៅដែរ។ ភ្លាមៗនោះពួកគាត់ក៏បានរាយការណ៍ទៅសមត្ថកិច្ចមូលដ្ឋានអោយចុះមកធ្វើការអន្តរាគមន៍តែម្តង។ ខណៈពេលដែលសមត្ថកិច្ចមូលដ្ឋានចុះមកដល់ស្រាប់តែខាងម្ចាស់ហាងបានចេញវិក្កយបត្រថ្មីមួយទៀតដែលអស់តម្លៃតែ៥០ដុល្លារ ក្នុងនោះស្រាបៀរមួយកេសតម្លៃ២០ដុល្លារ និងសាច់ក្លែមបួនចាន់ទៀតអស់ចំនួន៣០ដុល្លារ។ ចំណែកឯខាងភាគីម្ចាស់ហាងកើតហេតុខាងលើមិនបានចេញមុខមកបកស្រាយឱ្យដឹងច្បាស់ជុំវិញករណីខាងលើនេះទេ។
ក្រោយពេលកើតហេតុ សមត្ថកិច្ចមូលដ្ឋានបាននាំបុរសទាំង៣នាក់ខាងលើដែលជាភ្ញៀវរងគ្រោះ និងបុរសម្នាក់ដែលជាបុគ្គលិកបម្រើការនៅក្នុងហាងកើតហេតុខាងលើទៅធ្វើការដោះស្រាយគ្នានៅឯប៉ុស្តិ៍នគរបាលរដ្ឋបាលកាកាបទី១ ទើបភាគីខាងហាងខារ៉ាអូខេកើតហេតុខាងលើព្រមទទួលយកប្រាក់ពីភាគីខាងជនរងគ្រោះដែលជាភ្ញៀវចំនួន២០ដុល្លារដើម្បីបញ្ចប់រឿងនៅប៉ុស្តិ៍សមត្ថកិច្ច ដោយឡែកម្ចាស់ហាងខាងលើត្រូវបានសមត្ថកិច្ចតម្រូវឲ្យធ្វើកិច្ចសន្យាឲ្យឈប់ធ្វើសកម្មភាពបែបនេះទៅលើភ្ញៀវដទៃទៀត បើមិនដូច្នេះសមត្ថកិច្ចនឹងធ្វើការចាត់ការទៅតាមនីតិវិធី ៕
ចែករំលែកព័តមាននេះ