រាជធានីភ្នំពេញ ៖ សមាជិកព្រឹទ្ធសភាបារាំងមួយរូបបានស្នើដល់ស្ថាប័នរដ្ឋសភាបង្កើនការនិយាយភាសាបារាំងបន្ថែមទៀត ។ ការស្នើសុំនេះធ្វើឡើងក្នុងជំនួបរវាងយូហុកគ្រី អនុប្រធានទី១ រដ្ឋសភាកម្ពុជាជាមួយលោកស្រី Catherine Procacia សមាជិកាព្រឹទ្ធសភាបារាំងកាលពីនារសៀលថ្ងៃទី១៦…
រាជធានីភ្នំពេញ ៖ សមាជិកព្រឹទ្ធសភាបារាំងមួយរូបបានស្នើដល់ស្ថាប័នរដ្ឋសភាបង្កើនការនិយាយភាសាបារាំងបន្ថែមទៀត ។ ការស្នើសុំនេះធ្វើឡើងក្នុងជំនួបរវាងយូហុកគ្រី អនុប្រធានទី១ រដ្ឋសភាកម្ពុជាជាមួយលោកស្រី Catherine Procacia សមាជិកាព្រឹទ្ធសភាបារាំងកាលពីនារសៀលថ្ងៃទី១៦ ខែឧសភា ឆ្នាំ២០១៨នេះ នៅវិមានរដ្ឋសភា ខណៈដែលលោកស្រីព្រឹទ្ធសមាជិកត្រូវអញ្ជើញមកធ្វើជាវាគ្មិនក្នុងសិក្ខាសាលាហ្វ្រង់កូហ្វូនី ដែលនឹងត្រូវរៀបចំធ្វើនៅព្រះរាជាណាចក្រកម្ពុជា រយៈពេលពីរថ្ងៃគឺ ថ្ងៃទី១៧ និង១៨ ខែឧសភា ឆ្នាំ២០១៨នេះ ។
នៅក្នុងជំនួបពិភាក្សាការងារនេះលោក យូ ហុកគ្រី បានថ្លែងអំណរគុណដល់សភាប្រទេសបារាំងដែលបានជួយគាំទ្រដល់កម្ពុជា ពិសេសសភាកម្ពុជារៀងរហូតមកទាំងការបណ្តុះបណ្តាលធនធានមនុស្សដល់មន្ត្រីអគ្គលេខាធិការដ្ឋានរដ្ឋសភា និងការពង្រឹងសមត្ថភាពដល់សមាជិកសមាជិការដ្ឋសភា ។ លោកអនុប្រធានទី១ បានគូសបញ្ជាក់ថា សភាកម្ពុជា ពិសេសឯកឧត្តមផ្ទាល់សូមគាំទ្រ និងជំរុញការប្រើប្រាស់ភាសាបារាំងនៅក្នុងកិច្ចការសភា ។
លោកក៏បានលើកឡើងពីការប្រើប្រាស់ភាសាបារាំងនៅកម្ពុជា គឺមានលក្ខណៈជាប្រវត្តិសាស្ត្រដែលបង្ហាញពីទំនាក់ទំនងយ៉ាងជិតស្និទ្ធនៃប្រទេសទាំងពីរ ។ ជាមួយគ្នានេះលោកយូ ហុកគ្រី បានស្នើសុំសភាប្រទេសបារាំងបន្តគាំទ្រដល់សភាកម្ពុជាបន្តទៀត ដើម្បីលើកកម្ពស់ប្រសិទ្ធិភាពការងាររដ្ឋបាល និងបច្ចេកទេសរបស់សភាឆ្លើយតបការរីកចម្រើនរបស់សង្គមជាតិ ។
លោកអនុប្រធានទី១ រដ្ឋសភាក៏បានលើកឡើងក្នុងជំនួបលោកស្រីសមាជិកព្រឹទ្ធសភាបារាំងក៏បានស្នើដល់ស្ថាប័នរដ្ឋសភាបង្កើនការនិយាយភាសាបារាំងឲ្យកាន់ច្រើនបន្ថែម ។
សូមបញ្ជាក់ថា អគ្គលេខាធិការដ្ឋានសភាកម្ពុជា (អគ្គលេខាធិការដ្ឋានព្រឹទ្ធសភា-រដ្ឋសភា) ក្រោមកិច្ចសហការរៀបចំដោយក្រុមសភា ជាតិ កម្ពុជា នៃសភានិយាយ ភាសាបារាំង និងកម្មវិធីណូរីយ៉ា(Noria-APF) នឹងរៀបចំសិក្ខាសាលាសភាស្តីពី «ហ្វ្រង់កូហ្វូនី ភាសាបារាំង និងការងារសភា» រយៈពេលពីរថ្ងៃគឺថ្ងៃទី១៧ និងថ្ងៃទី១៨ ខែឧសភា ឆ្នាំ២០១៨ នៅសណ្ឋាគារ Raffles Le Royal ក្នុងរាជធានីភ្នំពេញ ។
សិក្ខាសាលានេះ មានគោលបំណងលើកកម្ពស់ការប្រើប្រាស់ភាសាបារាំងនៅកម្ពុជា ពិសេសក្នុងវិស័យសភានេះ ហើយក៏នឹងពិភាក្សាលើប្រធានបទមួយចំនួនដូចជា លំហរនៃប្រទេសនិយាយភាសាបារាំងកាលា-នុវត្តភាព អន្តរជាតិសម្រាប់សភាកម្ពុជា ភាសាបារាំង វ៉ិចទ័រការងារការទូតសភា និងឧបករណ៍នៃការផ្លាស់ប្តូរ ផ្នែកសេដ្ឋកិច្ច ផ្នែកឧត្តមសិក្សា និងផ្នែកវប្បធម៌ កិច្ចសហប្រតិបត្តិការ សេដ្ឋកិច្ចរវាងក្រុមប្រទេសនិយាយភាសាបារាំង និងប្រទេសសមាជិកអាស៊ាន(ASEAN) ភាសាបារាំង មធ្យោបាយការងារសភា ភាសាបារាំង និងការវិវត្តវិជ្ជាជីវៈរបស់មន្ត្រីសភាកម្ពុជា ។
សិក្ខាសាលានេះនឹងមានការចូលរួមពីសមាជិកសមាជិកាព្រឹទ្ធសភារដ្ឋសភា វាគ្មិនជាតិ អន្តរជាតិ តំណាងមកពីក្រសួងអប់រំ យុវជន និងកីឡា ក្រសួងការបរទេស និងសហប្រតិបត្តិការ អន្តរជាតិ វិទ្យាស្ថានបារាំង នៅ កម្ពុជាដេប៉ាតឺម៉ង់ភាសាបារាំងនៃសាកលវិទ្យាល័យភូមិន្ទភ្នំពេញ វិទ្យាស្ថាន បច្ចេកវិទ្យាកម្ពុជាទីភ្នាក់ឧត្តម សិក្សានៃប្រទេសប្រើភាសាបារាំង (AUF) អង្គការអន្តរជាតិ ហ្វ្រង់កូហ្វូនី(OIF) និងមន្ត្រីអគ្គលេខាធិ-ការដ្ឋានព្រឹទ្ធសភា និងរដ្ឋសភាដែលធ្លាប់សិក្សាភាសាបារាំងក្នុងគម្រោងជំនួយរបស់កម្មវិធីណូរីយ៉ា (Noria) នឹងចូលរួមជាវាគ្មិន ចែករំលែកបទពិសោធន៍ និងទទួលយកចំណេះដឹងថ្មីៗពីគ្នាទៅវិញទៅមក ៕
ចែករំលែកព័តមាននេះ