ខេត្តប៉ៃលិន ៖ រហូតមកដល់បច្ចុប្បន្ននេះ គេសង្កេតឃើញមានការបើកហាងលក់ម្ហូបសាច់សត្វព្រៃរីកដុះដាលជាច្រើនគួរឱ្យកត់សម្គាល់ ខណៈហាងមួយចំនួនមានលក់ម្ហូបសាច់សត្វព្រៃដែលព្រានបាននាំគ្នាលួចចូលទៅដាក់អន្ទាក់ចាប់នៅក្នុងតំបន់អភិរក្ស ។ ជាក់ស្តែងកាលពីជាង១ខែមុន ក្រុមមន្ត្រីអភិរក្សបានចុះល្បាត ស្រាប់តែប្រទះឃើញអន្ទាក់ និងសត្វព្រៃដែលជាប់អន្ទាក់ងាប់…
ខេត្តប៉ៃលិន ៖ រហូតមកដល់បច្ចុប្បន្ននេះ គេសង្កេតឃើញមានការបើកហាងលក់ម្ហូបសាច់សត្វព្រៃរីកដុះដាលជាច្រើនគួរឱ្យកត់សម្គាល់ ខណៈហាងមួយចំនួនមានលក់ម្ហូបសាច់សត្វព្រៃដែលព្រានបាននាំគ្នាលួចចូលទៅដាក់អន្ទាក់ចាប់នៅក្នុងតំបន់អភិរក្ស ។
ជាក់ស្តែងកាលពីជាង១ខែមុន ក្រុមមន្ត្រីអភិរក្សបានចុះល្បាត ស្រាប់តែប្រទះឃើញអន្ទាក់ និងសត្វព្រៃដែលជាប់អន្ទាក់ងាប់ និងរស់ជាច្រើនក្បាល ។ ទោះបីជាមានការចុះរុះរើអន្ទាក់យកទៅដុតចោល ក៏ក្រុមជនល្មើសនៅតែបន្តសកម្មភាពលួចដាក់ក្នុងព្រៃហាមឃាត់ដដែល ។
ប្រភពព័ត៌មានពីប្រជាពលរដ្ឋរស់នៅក្នុងក្រុងប៉ៃលិនបានឱ្យដឹងថា ពួកគាត់ពិតជាមានការព្រួយបារម្ភយ៉ាងខ្លាំងចំពោះសត្វព្រៃដែលមានសេសសល់នៅក្នុងដែនតំបន់អភិរក្ស ខណៈហាងលក់ម្ហូបអាហារតូច-ធំជាច្រើនមានលក់សាច់សត្វព្រៃដែលក្រុមឈ្នួញបានទិញពីព្រានដែលលួចចូលទៅបរបាញ់ ឬដាក់អន្ទាក់ខុសច្បាប់នៅក្នុងតំបន់អភិរក្សភ្នំខៀវ ។
សាច់សត្វដែលគេឧស្សាហ៍ប្រទះឃើញលក់នៅក្នុងហាងមានដូចជា សត្វខ្លាឃ្មុំ ខ្លាត្រី ខ្ទីង ប្រើស ឈ្លូស ក្តាន់ ជ្រូកព្រៃ សំពោច ពស់ ស្ការ អណ្តើក ត្រកួត និងសត្វព្រៃផ្សេងៗមួយចំនួនទៀត ។
ប្រភពបន្តទៀតថា សត្វព្រៃដ៏កម្រដែលជិតផុតពូជអស់ទៅហើយនោះត្រូវបានគេបន្តលួចដាក់អន្ទាក់ក្នុងតំបន់ហាមឃាត់ចាប់យកទៅលក់នៅតាមហាងក្នុងក្រុងប៉ៃលិន ។ មិនត្រឹមតែប៉ុណ្ណោះ អ្នកខ្លះទៀតលួចដឹកតាមម៉ូតូ ឬរថយន្តយកទៅលក់រហូតដល់ខេត្តបាត់ដំបង ដែលឆ្លងដែនតាមច្រកភូមិក្រចាប់ សង្កាត់អូរតាវ៉ៅ ក្រុងប៉ៃលិន តាមផ្លូវជាតិលេខ៥៧ ហើយគេក៏ធ្លាប់ឃើញសមត្ថកិច្ចខាងក្រសួងចុះមកបង្ក្រាបចាប់យូរៗម្តងដែរ ។ តែក្រុមឈ្មួញ និងម្ចាស់ហាងដែលលក់ដូរសាច់សត្វព្រៃទាំងនោះហាក់ដូចជាមិនមានការរាងចាលអ្វីនោះទេ ពោលគឺនៅតែបន្តលួចលាក់លក់សាច់សត្វព្រៃឱ្យភ្ញៀវទិញហូបរៀងរាល់ថ្ងៃ ។
លើសពីនេះ ក្រុមជនខិលខូចមិនត្រឹមតែលួចចាប់សត្វព្រៃក្នុងដែនអភិរក្សប៉ុណ្ណោះទេ អ្នកខ្លះឆ្លងដែនទៅចាប់នៅទឹកដីប្រទេសថៃថែមទៀត ដែលអាចប្រឈមនឹងគ្រោះថ្នាក់ដល់អាយុជីវិត ពេលសមត្ថកិច្ចថៃឃើញគេ ចាប់ ឬបាញ់សម្លាប់នៅទីនោះតែម្តង ៕
ចែករំលែកព័តមាននេះ