ខេត្តព្រះសីហនុ ៖ ខេត្តព្រះសីហនុទទួលបានភ្ញៀវទេសចរជិត១លាននាក់ក្នុងរយៈពេលត្រឹម៤ខែដើមឆ្នាំនេះ ។ ជាមួយគ្នានេះ ការភ្ជាប់ជើងហោះហើរក៏បានកើនឡើងគួរឲ្យកត់សម្គាល់ផងដែរ ។
ប្រធានមន្ទីរទេសចរណ៍ខេត្ត លោក តាំង សុចិត្រគ្រឹស្នា បានថ្លែងនៅព្រឹកថ្ងៃទី៨ ឧសភា ថា ក្នុងរយៈពេល៤ខែដើមឆ្នាំ២០១៨ ភ្ញៀវទេសចរដែលមកទស្សនាខេត្តព្រះសីហនុ មានប្រមាណ៩៥៣.១៧១ម៉ឺននាក់ កើនឡើង១៨,៤% ក្នុងនោះមានទេសចរចិនប្រមាណ៥ម៉ឺននាក់ កើនឡើង៣៧% រួមជាមួយទេសចរច្រើនជាតិសាសន៍ដែលកំពុងកើនឡើងផងដែរ ដូចជា រុស្ស៊ី បារាំង អាល្លឺម៉ង់ អង់គ្លេស អូស្ត្រាលី ថៃ វៀតណាម និងម៉ាឡេស៊ី ។ល។
លោកថា ៖« ភ្ញៀវទេសចរដែលទៅទស្សនាតាមបណ្ដាកោះក្នុងខេត្តព្រះសីហនុ ពិសេសកោះរ៉ុង និងកោះរ៉ុងសន្លឹម ជាដើម មានជាង១១ម៉ឺននាក់ កើនឡើងជាង១០%ផងដែរក្នុងត្រីមាសទី១ឆ្នាំនេះ បើធៀបនឹងរយៈពេលដូចគ្នាកាលពីឆ្នាំមុន » ។
លោកគ្រឹះស្នា បានបន្តថា បើគិតត្រឹមរយៈពេល៣ខែ ដើមឆ្នាំ២០១៨ មានជើងហោះហើរមកខេត្តព្រះសីហនុចំនួន២.១៣៥ជើង កើនឡើង៦៦% ធៀបនឹងរយៈពេលដូចគ្នាកាលពីឆ្នាំមុន ក្នុងនោះមានជើងហោះហើរប្រមាណ២០២ជើង មកពីក្រៅប្រទេស និងក្នុងស្រុកមានចំនួន៣៤៨ជើងក្នុង១សប្ដាហ៍ ។
ខេត្តព្រះសីហនុ បច្ចុប្បន្នមានសណ្ឋាគារ៦៩កន្លែង ស្មើនឹង៣.៥២១បន្ទប់, ផ្ទះភ្ញៀវមាន៣១៩កន្លែង ស្មើនឹង៤.០២៩បន្ទប់ និង ភោជនីយដ្ឋាន-អាហារដ្ឋានមាន២៥១កន្លែង ស្មើនឹង៩.៧៧៣កៅអី ។ ហាងម៉ាស្សាមាន៤២កន្លែង ស្មើនឹង៣០០គ្រែ, សេវាកម្សាន្តទេសចរណ៍សម្រាប់មនុស្សពេញវ័យមាន១៧កន្លែង, ទីភ្នាក់ងារទេសចរណ៍៣១កន្លែង និងកីឡាទេសចរណ៍១៧កន្លែង ។
លោក តាំង សុចិត្រគ្រឹះស្នា បានបន្តថា នៅ២ឆ្នាំខាងមុខ នឹងមានសណ្ឋាគារថ្មីៗប្រណីតប្រមាណពី២.០០០-២.៥០០បន្ទប់បន្ថែមទៀតនឹងដាក់ដំណើរការ ដើម្បីស្វាគមន៍ភ្ញៀវទេសចរជាតិ អន្តរជាតិ និងអ្នកវិនិយោគនានា ។
លោក ហូ វណ្ឌី ទីប្រឹក្សាសមាគមទីភ្នាក់ងារទេសចរណ៍កម្ពុជា បានថ្លែងថា ចាប់តាំងពីតំបន់ឆ្នេរសមុទ្ររបស់កម្ពុជា បានដាក់បញ្ចូលជាសមាជិកក្លិបឆ្នេរស្អាតជាងគេនៅក្នុងពិភពលោក និងការរៀបចំហេដ្ឋារចនាសម្ព័ន្ធកាន់តែប្រសើរ ចំនួនភ្ញៀវទេសចរបានកើនឡើងជាប្រចាំនៅតាមតំបន់ឆ្នេរកម្ពុជា ទាំងខេត្តព្រះសីហនុ និងខេត្តជាប់តំបន់ឆ្នេរសំខាន់ៗចំនួន៣ទៀត ។ លោកបន្តថា ការកើនឡើងនូវភ្ញៀវទេសចរ ក៏ធ្វើឲ្យខេត្តជាប់តំបន់ឆ្នេរប្រឈមនឹងបញ្ហាបំពុលបរិស្ថានផងដែរ ដែលទាមទារឲ្យអាជ្ញាធរយកចិត្តទុកដាក់ ដើម្បីឲ្យការអភិវឌ្ឍធ្វើឡើងដោយនិរន្តរភាព ។
លោកបន្តថា ៖« បើយើងអភិវឌ្ឍន៍មិនបានគិតគូរពីនិរន្តរភាពបរិស្ថានទេ នឹងធ្វើឲ្យយើងបាត់បង់ផលប្រយោជន៍ទាំងអស់គ្នានាពេលអនាគត ហេតុនេះ ការអភិវឌ្ឍ និងអភិរក្សត្រូវដើរទន្ទឹមគ្នា » ៕
អត្ថបទសរសេរ ដោយ
អត្ថបទសរសេរ ដោយ
ចែករំលែកព័តមាននេះ