រាជធានីភ្នំពេញ ៖ ភ្លៀងមួយមេលាយឡំនឹងខ្យល់កន្ត្រាក់បានធ្វើឱ្យដើមលឿងរាជមួយដើមរលំបាក់សង្កត់លើរ៉ឺម៉កម៉ូតូមួយគ្រឿងរងការខូចខាតយ៉ាងដំណំ ។ ហេតុការណ៍នេះបានកើតឡើងកាលពីវេលាម៉ោង៧និង៥០នាទីយប់ថ្ងៃទី១៣ ខែឧសភា ឆ្នាំ២០១៨ តាមបណ្តោយផ្លូវ១៤៤ ត្រង់ចំណុចមុខសាលារៀនបឋមសិក្សាព្រះនរោត្តម ស្ថិតក្នុងសង្កាត់ផ្សារកណ្តាលទី២ ខណ្ឌដូនពេញ។
តាមប្រភពពីបុរសជាម្ចាស់រ៉ឺម៉កម៉ូតូឈ្មោះសួស សារ៉ាត់ ភេទប្រុស អាយុ៣៤ឆ្នាំ មុខរបររត់រ៉ឺម៉កម៉ូតូ ស្នាក់នៅភូមិបឹងក្រចាប់ ឃុំព្រែកតាមាក់ ស្រុកខ្សាច់កណ្តាល ខេត្តកណ្តាល បានឱ្យបានអោយដឹងថា មុនពេលកើតហេតុ គាត់បានដឹកភ្លៀវជនបរទេសពីរនាក់ប្តីប្រពន្ធចេញពីសណ្ឋាគារមួយនៅម្តុំផ្សារអូរឫស្សី ខណៈមកដល់ត្រង់ចំណុចកើតហេតុ ក៏ស្រាប់តែមេឃមានខ្យល់និងភ្លៀង ហើយគាត់បានឈប់រ៉ឺម៉កម៉ូតូ ដើម្បីរ៉ូតរនាំងវាំងននបាំងកុំឱ្យភ្លៀងទទឹកជនបរទេសដែលជិះលើរ៉ឺម៉កម៉ូតូនោះ ស្រាប់តែដើមឈើលឿងរាជបានរលំមកសង្កត់លើដំបូលរ៉ឺម៉ករបស់គាត់បណ្តាលឱ្យរងការខូចខាត តែមិនបណ្តាលឱ្យគ្រោះថ្នាក់ដល់ជនបរទេសទាំងពីរនាក់ប្តីប្រពន្ធដែលកំពុងជិះលើរ៉ឺម៉កម៉ូតូនោះទេ ។
ក្រោយពេលកើតហេតុ សមត្ថកិច្ចបានទំនាក់ទំនងទៅអាជ្ញាធរសង្កាត់ឱ្យមកកាត់ដើមលឿងរាជយកចេញពីផ្លូវចៀសវាងកកស្ទះចរាចរណ៍ និងងាយស្រួលដល់បងប្អូនប្រជាពលរដ្ឋធ្វើដំណើរទៅមក។
បន្ទាប់ពីកាត់ដើមលឿងរួចរាល់ហើយ បុរសជាម្ចាស់រ៉ឺម៉កម៉ូតូបានទៅដាក់ពាក្យបណ្តឹងសុំអោយសាលារាជធានីភ្នំពេញជួយដល់គាត់ផង ពីព្រោះរ៉ឺម៉កម៉ូតូមួយគ្រឿងនេះមិត្តភក្តិគាត់រត់ពេលយប់ ចំណែកពេលថ្ងៃគាត់ជាអ្នករត់ ហើយបានទទូចស្នើសុំសាលាខណ្ឌដូនពេញជួយចេញថ្លៃជួសជុលរ៉ឺម៉កគាត់ផង ព្រោះគាត់គ្មានប្រាក់ទិញថ្មីទេ ៕
ចែករំលែកព័តមាននេះ