រាជធានីភ្នំពេញ ៖ ផ្តើមចេញពីការតស៊ូយ៉ាងលំបាកក្នុងជីវិតជាក្មេងកំព្រា ដែលបាត់បង់អ្នកមានគុណ និងចាប់ផ្តើមពីបាតដៃទទេ រហូតក្លាយជាអ្នកជំនួញនាំចូលផលិតផលគ្រឿងរក្សាសម្រស់ អ្នកស្រី ទ្រី ដាណា អគ្គនាយកក្រុមហ៊ុន ដាណាទ្រី ខេមបូឌា ត្រេនដីង ខូលអិលធីឌី បានឲ្យដឹងថា ដោយសារតែអ្នកស្រីធ្លាប់ឆ្លងកាត់ជីវិតក្រលំបាកគ្រប់បែបយ៉ាង ទើបអ្នកស្រីបានផ្តល់សេវាប្រឹក្សាយោបល់ជួយដល់ស្ត្រីកម្ពុជា ដែលគ្មានការងារធ្វើ ឬមុខរបរឲ្យចេះចាប់ផ្តើមជំនួញដំបូង ជាមួយនឹងទុនត្រឹម ៥០ ដុល្លារក៏បាន ។
អ្នកស្រី ទ្រី ដាណា អគ្គនាយកក្រុមហ៊ុន ដាណាទ្រី ខេមបូឌា ត្រេនដីង ខូលអិលធីឌី ដែលនាំចូលផ្តាច់មុខនូវគ្រឿងរក្សាសម្រស់ប្រ៊ែន NNP បានឲ្យដឹងថា ក្រុមហ៊ុនរបស់អ្នកស្រីបានបើកសម្ពោធជាផ្លូវការនៅថ្ងៃអាទិត្យ ទី១៣ ខែឧសភា ឆ្នាំ២០១៨ នេះ ហើយនៅការិយាល័យកណ្ដាលរបស់ក្រុមហ៊ុនផ្ទាល់ ដែលស្ថិតនៅភូមិផ្សារលិច សង្កាត់ព្រែកព្នៅ ខណ្ឌព្រែកព្នៅ រាជធានីភ្នំពេញ។
អ្នកស្រី ទ្រី ដាណា បានបញ្ជាក់ថា នៅថ្ងៃបើកសម្ពោធព្រឹកមិញនេះ គឺបានផ្តល់ឱកាសពិសេសសម្រាប់អ្នកតំណាងចែកចាយទាំងអស់ទូទាំង ២៥ខេត្ត-រាជធានី ក្នុងប្រទេសកម្ពុជា បានជួបជុំគ្នា ចែករំលែកបទពិសោធន៍នៃការលក់ផលិតផលថែរក្សាសម្រស់ ព្រមទាំងថតរូបជុំគ្នាដើម្បីបង្កើនភាពស្និទ្ធស្នាល។ សំខាន់ជាងនេះទៅទៀតនោះ គឺមិត្តៗនារីណាមានបំណងចង់ក្លាយជាតំណាងចែកចាយ ក្រុមហ៊ុននឹងជួយប្រឹក្សាយោបល់ បង្ហាញពីវិធីលក់ ដោយចំណាយដើមទុនតិចបំផុត។
ម្ចាស់ក្រុមហ៊ុនបានឲ្យដឹងផងដែរថា ដើម្បីបំពេញតម្រូវការទីផ្សារដែលចេះតែកើនឡើងជាលំដាប់ ហើយកម្រិតជីវភាពប្រជាពលរដ្ឋកាន់តែប្រសើរជាងមុន តម្រូវការការថែរក្សាសម្រស់ក៏មានច្រើនជាងមុន ជាពិសេសការជ្រើសរើសផលិតផលថែរក្សាសម្រស់ដែលមានគុណភាព គឺពិតជារឿងសំខាន់។
ហេតុដូច្នេះហើយ អ្នកស្រី ទ្រី ដាណា អគ្គនាយកក្រុមហ៊ុន ដាណាទ្រី ខេមបូឌា ត្រេនដីង ខូលអិលធីឌី បានឲ្យដឹងថា ក្រុមហ៊ុនរបស់អ្នកស្រីបាននិងកំពុងនាំចូលផលិតផលថែរក្សាសម្រស់ប្រកបដោយគុណភាពជាច្រើនប្រភេទមកផ្គត់ផ្គង់ និងចែកចាយនៅទីផ្សារកម្ពុជា ។ អគ្គនាយកក្រុមហ៊ុនរូបនេះមានប្រសាសន៍បន្តថា រាល់ផលិតផលទាំងអស់របស់ក្រុមហ៊ុន គឺសុទ្ធតែមានគុណភាពខ្ពស់ និងទទួលស្គាល់ដោយក្រសួងសុខាភិបាលថៃ និងក្រសួងសុខាភិបាលកម្ពុជា ព្រមទាំងបានចុះបញ្ជីយ៉ាងត្រឹមត្រូវនៅក្រសួងពាណិជ្ជកម្ម ដោយមិនបានបន្លំផលិតផលក្លែងក្លាយឡើយ ។
អ្នកស្រី ទ្រី ដាណា បានបញ្ជាក់ឲ្យដឹងថា ក្រុមហ៊ុនអ្នកស្រីការពិតទៅបានចុះបញ្ជីនៅក្រសួងពាណិជ្ជកម្មតាំងពីខែកញ្ញា ឆ្នាំ២០១៧ មកម្ល៉េះ ប៉ុន្តែដោយសារតែពេលវេលាមិនអំណោយផល បូករួមទាំងការមមាញឹកលើមុខជំនួញផង ទើបលើកពេលវេលាសម្ពោធមកថ្ងៃទី ១៣ ខែឧសភា ឆ្នាំ២០១៨ នេះតែម្តង ៕
ចែករំលែកព័តមាននេះ