ខេត្តកំពត ៖ កុមារាកុមារីជាសិស្សសាលាបឋមសិក្សាហ៊ុនសែនអូតូច បីនាក់បានលង់ទឹកអណ្តូងជីក នៅជិតសាលាស្លាប់យ៉ាងអណោចអធម៌ និងគួរឲ្យសង្វេកជាពន់ពេកណាស់ សម្រាប់អាណាព្យាបាលរបស់កុមារទាំងបីនាក់ ។ ហេតុការដ៏គួរឲ្យរន្ធត់នេះ បានកើតឡើងកាលពីវេលា១២និង៣០នាទីថ្ងៃត្រង់ថ្ងៃទី១២ ខែឧសភា ឆ្នាំ២០១៨ ស្ថិតនៅភូមិអូតូច សង្កាត់អណ្តូងខ្មែរ ក្រុងកំពត ។
ប្រភពព័ត៌មានពីប៉ុស្តិ៍រដ្ឋបាលសង្កាត់អណ្តូងខ្មែរបានឲ្យដឹងថា មុនពេលកើតហេតុនៅវេលាម៉ោង១២ថ្ងៃត្រង់ថ្ងៃទី១២ ខែឧសភា ឆ្នាំ២០១៨ កុមាររងគ្រោះទាំងបីនាក់បានចេញពីផ្ទះទៅសាលា លុះពេលទៅដល់សាលា ពួកគេទាំងបីនាក់បាននាំគ្នាទៅងូតទឹកដូចសព្វដង ។ ប្រភពបានបន្តទៀតថា នៅពេលទៅងូតទឹកនោះមានគ្នា៤នាក់ ដែលស្រី២នាក់ ហើយស្រះទឹកដែលងូតនោះ ជាស្រះជីកមានទទឹងប្រវែង២០ម៉ែត្រ បណ្តោយប្រវែង៤០ម៉ែត្រ និងជម្រៅ៤ម៉ែត្រ នៅពេលទៅដល់កុមារី២នាក់ និងកុមារាម្នាក់បានចុះងូត ស្រាប់តែរអិលជើងលេចក្នុងទឹក ភ្លាមៗនោះកុមារម្នាក់ដែលមិនទាន់ចុះងូតឃើញសភាពដូច្នេះ ភ័យក៏រត់ទៅដល់សាលា ដើម្បីប្រាប់គ្រូ ពេលនោះក៏មានការភ្ញាក់ផ្អើលទាំងលោកគ្រូ ទាំងប្រពលរដ្ឋដែលនៅក្បែរសាលានាំគ្នារត់ទៅកន្លែងកើតហេតុដែលមានចម្ងាយពីសាលាប្រមាណជិត៥០០ម៉ែត្រ ។
ប្រភពដដែលឲ្យដឹងទៀតថា ពេលទៅដល់ដំបូងពុំឃើញសពអណ្តែតទេ បងប្អូនចុះរាវមុជរកខ្លះបង់សំណាញ់ទើបឃើញម្តងមួយៗ រហូតឃើញសពកុមារទាំងបី ប៉ុន្តែជាអកុសលកុមារទាំងបីបានស្លាប់បាត់បង់ជីវិតគួរឲ្យអណោចអធម៌បាត់អស់ទៅហើយ ។
សពកុមារាទាំងបីមានឈ្មោះទី១- ឈ្មោះ ញ៉ែត ចាន់ស្រីនីត ភេទស្រី អាយុ៨ឆ្នាំ មានទីលំនៅភូមិអូតូច សង្កាត់អណ្តូងខ្មែរ ក្រុងកំពត ។ ទី២ – ឈ្មោះ លី ផាន់រី ភេទស្រី អាយុ១០ឆ្នាំ មានទីលំនៅភូមិអូតូច សង្កាត់អណ្តូងខ្មែរ ក្រុងកំពត ។ ទី៣- ឈ្មោះ សេង ផានិត ភេទប្រុស អាយុ៧ឆ្នាំ មានទីលំនៅភូមិទ្វីខាងជើង សង្កាត់អណ្តូងខ្មែរ ក្រុងកំពត ខេត្តកំពត ។
សពក្រោយពីសមត្ថកិច្ចចុះទៅពិនិត្យដល់កន្លែងកើតហេតុ ឃើញថា កុមារាកុមារីទាំងបីនាក់ពិតជាលង់ទឹកស្លាប់ពិតប្រាកដមែន រួចប្រគល់ឲ្យក្រុមគ្រួសារអាណាព្យាបាល ដើម្បីយកទៅរៀបចំធ្វើបុណ្យទៅតាប្រពៃណី ។ ជាមួយគ្នានេះដែរនៅកន្លែងកើតហេតុគេឃើញ និងឮតែសំឡេងស្រែកទ្រហ៊ោរយំពីសំណាស់អាណាព្យាបាល ក្រុមគ្រួសារសាច់ញាតិកុមាររងគ្រោះ សោកស្តាយពីការស្លាប់បាត់បង់ជីវិតកូនជាទីស្រឡាញ់ស្មើ នឹងកែវភ្នែករបស់ខ្លួនម្នាក់យ៉ាងសង្វេគ ៕
ចែករំលែកព័តមាននេះ