ខេត្តកណ្ដាល ៖ ជនសង្ស័យជួញដូរគ្រឿងញៀន២នាក់ត្រូវបានកម្លាំងនគរបាលស្រុកអង្គស្នួលចាប់ខ្លួន ខណៈពេលកំពុងជិះរថយន្តម៉ាកឡិចស៊ីស RX-៣០០ មួយគ្រឿងគួរឲ្យសង្ស័យ ។ ក្រោយចាប់ខ្លួននគរបាលបានធ្វើការត្រួតពិនិត្យរកឃើញមានថ្នាំញៀនមួយចំនួន រួមជាមួយអាវុធខ្លីម៉ាកកា៥៩មួយដើម និងសម្ភារៈផ្សេងៗទៀតផងដែរ…
ខេត្តកណ្ដាល ៖ ជនសង្ស័យជួញដូរគ្រឿងញៀន២នាក់ត្រូវបានកម្លាំងនគរបាលស្រុកអង្គស្នួលចាប់ខ្លួន
ខណៈពេលកំពុងជិះរថយន្តម៉ាកឡិចស៊ីស RX-៣០០ មួយគ្រឿងគួរឲ្យសង្ស័យ ។ ក្រោយចាប់ខ្លួននគរបាលបានធ្វើការត្រួតពិនិត្យរកឃើញមានថ្នាំញៀនមួយចំនួន រួមជាមួយអាវុធខ្លីម៉ាកកា៥៩មួយដើម និងសម្ភារៈផ្សេងៗទៀតផងដែរ ។ បន្ទាប់មកបាននាំទៅសាកសួរ និងកសាងសំណុំរឿងបញ្ជូនទៅសាលាដំបូងខេត្តកណ្ដាលដើម្បីចាត់ការតាមផ្លូវច្បាប់។
ការចាប់ខ្លួននោះបានធ្វើឡើងកាលពីវេលាម៉ោង១០និង១៥នាទីយប់ថ្ងៃទី១១ ខែឧសភា ឆ្នាំ២០១៨ នៅផ្លូវជាតិលេខ៤ ស្ថិតក្នុងភូមិត្រពាំងរាំង ឃុំព្រៃពួច ស្រុកអង្គស្នួល ខេត្តកណ្តាល ។ តាមប្រភពព័ត៌មានបានឲ្យដឹងថា ជនសង្ស័យដែលត្រូវចាប់ខ្លួនខាងលើនោះម្នាក់ឈ្មោះ ហួត មឿន ហៅប៉ាវ ហៅម៉ន អាយុ៣៤ឆ្នាំ មុខរបរទិញ-លក់ម៉ូតូ មានទីលំនៅក្នុងភូមិចំរើនផល ឃុំពោធិ៍ម្រាល ស្រុកបរសេដ្ឋ ខេត្តកំពង់ស្ពឺនិងម្នាក់ទៀតឈ្មោះ ធឿស សំអាង អាយុ២៨ឆ្នាំ មុខរបរជាងជួសជុលរថយន្ត មានទីលំនៅក្នុងភូមិអង្គមេត្រី ឃុំរលាំងគ្រើល ស្រុកសំរោងទង ខេត្តកំពង់ស្ពឺ។
ក្រោយពេលចាប់ខ្លួន កម្លាំងនគរបាលបានដកហូតបានថ្នាំញៀន១កញ្ចប់, រថយន្តម៉ាកឡិចស៊ីស RX៣០០ ពណ៍ស អត់ស្លាកលេខមួយគ្រឿង , អាវុធខ្លីម៉ា កា៥៩ មួយដើម មានបង់១ និងគ្រាប់ចំនួន៤គ្រាប់, ស្រោមអាវុធខ្លីចំនួន៤ ព្រមទាំងថង់វេចខ្ចប់ថ្នាំញៀនមួយចំនួន ដែកកេះជាច្រើនដែលដាក់នៅក្នុងកាបូបស្ពាយរបស់ឈ្មោះ ហួន មឿន ហៅប៉ាវ។
ប្រភពដដែលបានបន្តទៀតថា នៅមុនពេលចាប់ខ្លួន ជនសង្ស័យរូបនោះបានជិះរថយន្តឡិចស៊ីស RX៣០០ អត់ស្លាកលេខនោះក្នុងទិសដៅពីលិចទៅកើត ឆ្លងកាត់គោលដៅត្រួតពិនិត្យសណ្ដាប់ធ្នាប់ចរាចរណ៍ត្រង់ចំណុចខាលើ ពេលនោះដោយមានការសង្ស័យ ហើយម្យ៉ាងទៀតឃើញរថយន្តនោះអត់មានស្លាកលេខផងកម្លាំងនគរបាលក៏បានឃាត់ធ្វើការឆែកឆេររកឃើញថ្នាំញៀន និងអាវុធខ្លី ទើបចាប់ខ្លួននាំទៅធ្វើការសាកសួរ។
ក្រោយពេលឃាត់ខ្លួន ជនសង្ស័យឈ្មោះ ហួន មឿន បានសារភាពថា ពួកខ្លួនពិតជាអ្នកជួញដូរគ្រឿងញៀនប្រាកដមែន ហើយបានទទួលទិញថ្នាំញៀនពីជនមិនស្គាល់ឈ្មោះម្នាក់នៅភ្នំពេញ ដោយទិញម្តងៗក្នុងតម្លៃចាប់ពី៤០០ដុល្លារទៅ៥០០ដុល្លារ ដើម្បីយកទៅលក់បន្ត ។ ចំណែកអាវុធខ្លីដែលសមត្ថកិច្ចរកឃើញ ជនសង្ស័យបានសារភាពទៀតថា អាវុធខ្លីនេះគឺមានបុរសម្នាក់ឈ្មោះ ថន រស់នៅក្នុងក្រុងតាខ្មៅ ខេត្តកណ្ដាល បានផ្ដល់ឲ្យពួកខ្លួនទុកសម្រាប់ប្រើប្រាស់ក្នុងការជួញដូរគ្រឿងញៀននេះ៕
ចែករំលែកព័តមាននេះ