រាជធានីភ្នំពេញ ៖ ស្ត្រីអ្នកដើររើសអេតចាយចិញ្ចើមជីវិតម្នាក់ បានខ្យល់.គរស្លាប់ បង្កឱ្យមានការភ្ញាក់ផ្អើលកាលពីវេលាម៉ោង០៩ព្រឹកថ្ងៃទី៦ ឧសភា នៅចិញ្ចើមផ្លូវបេតុងមួយក្នុងភូមិឫស្សី១ សង្កាត់ស្ទឹងមានជ័យទី៣ ខណ្ឌមានជ័យ ។ ស្ត្រីរូបនេះឈ្មេាះ សាំង សារ៉ន អាយុ៤០ឆ្នាំ មានកូនស្រីម្នាក់ឈ្មោះ បូង៉ា អាយុ៨ឆ្នាំ ហើយការរស់នៅរបស់គាត់ គឺយកចិញ្ចើមផ្លូវសាធារណៈជាទីជម្រក គ្មានផ្ទះសម្បែង និងមិនដឹងស្រុកកំណើតឡើយ ព្រោះធំដឹងក្តីនៅតំបន់ខាងលើ ហើយក៏ស្លាប់ទៅវិញនៅកន្លែងដដែលដែរ ។
ប្រភពព័ត៌មានពីអ្នករស់នៅក្បែរកន្លែងកើតហេតុឱ្យដឹងថា ស្ត្រីរងគ្រោះមានកូនប្រុសស្រី៣នាក់ ក្នុងនោះកូនប្រុសច្បងមានអាយុជាង២០ឆ្នាំ បានចាកចោលម្តាយនិងប្អូនៗទៅធ្វើការនៅប្រទេសថៃបាត់ដំណឹងសូន្យឈឹងអស់ជាង១០ឆ្នាំមកហើយ ចំណែកកូនស្រីទី២បានទៅនៅជាមួយឪពុកនៅឯខេត្តបាត់ដំបង ក្រោយពេលម្តាយឪពុកចែកផ្លូវគ្នា ។ ចំណែកឯកូនស្រីតូចដែលបច្ចុប្បន្នទើបមានអាយុ៨ឆ្នាំ នៅជាមួយម្តាយដោយដេកតាមចិញ្ចើមផ្លូវជាមួយគ្នា ស៊ីអត់ស៊ីឃ្លាន ហាលខ្យល់ហាលភ្លៀង មានទាំងក្តៅនិងរងាគួរឱ្យអនិច្ចារកអ្វីផ្ទឹមពំុបានឡើយ ។
ប្រភពដដែលនិយាយទៀតថា ស្ត្រីរងគ្រេាះនិងប្តីបានបែកបាក់គ្នាប្រមាណ២ឆ្នាំមកហើយ ដោយសារបុរសជាប្តីតែងវាយធ្វើបាបប្រពន្ធរៀងរាល់ថ្ងៃ ធ្វើឱ្យទ្រាំពំុបានក៏ចែកផ្លូវគ្នាទៅ ហើយស្ត្រីរូបនេះក៏នាំកូនស្រីដ៏កម្សត់ដើរដេកតាមចិញ្ចើមផ្លូវ ដោយមានតែតង់មួយសម្រាប់ដេក២នាក់ម្តាយកូន ។ កាលពីមុន គាត់ដើររើសអេតចាយចិញ្ចើមកូនស្រី តែក្រោយមកក៏ធ្លាក់ខ្លួនឈឺមិនអាចរកអ្វីបានដើម្បីចិញ្ចើមជីវិតឡើយ ហើយអ្នកស្រុកក្បែរនោះមើលឃើញភាពលំបាក ក៏ចេះតែយកអាសាឱ្យបាយទឹកគាត់ និងកូនស្រីគ្រាន់ហូប ដើម្បី
រស់រានបន្ត ។ លុះប៉ុន្មានខែចុងក្រោយនេះ ស្ត្រីរងគ្រោះហាក់មានបញ្ហាផ្លូវចិត្តជាខ្លាំង ហើយផឹកតែស្រាមិនដែលហូបបាយ ឬនំនែកចំណីអាហារអ្វីឡើយ ជាហេតុធ្វើឱ្យសុខភាពកាន់តែខ្សោយទៅៗរហូតកើតជំងឺខ្យល់គរស្លាប់តែម្តង ។
សូមបញ្ជាក់ថា ក្រោយពីទទួលបានព័ត៌មាននេះ អាជ្ញាធរមូលដ្ឋានបានទៅពិនិត្យនិងជួយទាក់ទងហៅរថយន្តសាមុយដឹកសពយកទៅតម្កល់ធ្វើបុណ្យបូជាតាមប្រពៃណីនៅវត្តសំបួរមាស ក្នុងខណ្ឌដង្កោ ។ នាយប៉ុស្តិ៍នគរបាលស្ទឹងមានជ័យទី៣ លោក ឯម ភារី ឱ្យដឹងថា បច្ចុប្បន្នរូបលោកនិងអាជ្ញាធរសង្កាត់ កំពុងព្យាយាមស្វះស្វែងរកអង្គការកុមារកំព្រា ដើម្បីយកកុមារីជាកូនដ៏កម្សត់បានរស់នៅដោយការគាំពារ និងបានទៅរៀនសូត្រនិងស្នាក់នៅទីនោះតែម្តង ព្រោះនាងគ្មានសាច់ញាតិនឹងទីពឹងទៀតឡើយ ៕
ចែករំលែកព័តមាននេះ