រាជធានីភ្នំពេញ ៖ នគរបាលការិយាល័យព្រហ្មទណ្ឌកម្រិតស្រាលរាជធានីភ្នំពេញ កាលពីរសៀលថ្ងៃទី៧ ឧសភា បានបង្ហាញមុខជនសង្ស័យម្នាក់ ពាក់ព័ន្ធនឹងករណីឆក់កាបូប ដែលនៅពេលចាប់ខ្លួនដកហូតបានកាំភ្លើងខ្លី១ដើម ប្រាក់មួយចំនួន និងសម្ភារពាក់ព័ន្ធមួយចំនួនទៀត ។ ជនសង្ស័យឈ្មោះ លឹម សុខគា ហៅលី ភេទប្រុស អាយុ២៩ឆ្នាំ មុខរបរមិនពិតប្រាកដ ស្នាក់នៅផ្ទះជួលតាមផ្លូវទន្លេសាបភូមិដើមគ សង្កាត់ជ្រោយចង្វា ខណ្ឌជ្រោយចង្វា ។
ក្នុងពេលបង្ហាញមុខជនសង្ស័យ សមត្ថកិច្ចបានឱ្យដឹងថា កាលពីវេលាម៉ោង៩និង១៥នាទីយប់ថ្ងៃទី៦ ឧសភា មានករណីចោរឆក់កាបូបពីបុរសម្នាក់កំពុងធ្វើដំណើរតាមផ្លូវនៅចំណុចកែងរវាងមហាវិថីព្រះមុនីវង្សនិងផ្លូវលេខ១៤៤ ក្នុងសង្កាត់បឹងរាំង ខណ្ឌដូនពេញ ។ ម្ចាស់កាបូបឈ្មោះ ឯក រដ្ឋ អាយុ៤៦ឆ្នាំ ជាប្រធាននាយកដ្ឋានរដ្ឋបាលហិរញ្ញវត្ថុនៃក្រសួងសាធារណការ និងដឹកជញ្ជូន ស្នាក់នៅផ្ទះលេខ១៨ ផ្លូវលេខ១ សង្កាត់គីឡូម៉ែត្រលេខ៦ ខណ្ឌឫស្សីកែវ ។
ក្នុងការធ្វើសកម្មភាពឆក់នោះ ជនសង្ស័យមានតែម្នាក់ឯងទេ ជិះម៉ូតូ១គ្រឿងម៉ាកសុ៊ុយហ្សុ៊យគីណិច ពណ៌សលាយខៀវ ស៊េរីឆ្នាំ២០១៨ ពាក់ផ្លាកលេខ ភ្នំពេញ១GX-៣៥៣០ ។ ក្រោយពីមានហេតុការណ៍នេះកើតឡើង ជនរងគ្រោះបានទៅដាក់ពាក្យបណ្តឹងនៅប៉ុស្តិ៍នគរបាលរដ្ឋបាលបឹងរាំង ដើម្បីឱ្យសមត្ថកិច្ចជួយអន្តរាគមន៍លើករណីនេះ ។
ជនរងគ្រោះបានប្រាប់សមត្ថកិច្ចថា នៅក្នុងកាបូបដែលចោរឆក់យកទៅនោះ មានកាបូបដៃពណ៌ខ្មៅ១ កាំភ្លើងខ្លីម៉ាកឡុក១ដើម បង់២ គ្រាប់ចំនួន១៥គ្រាប់ វិក្កយបត្រប្រេងក្រុមហ៊ុនសូគីម៉ិច១០០លីត្រ វីសាកាត១ ប័ណ្ណសម្គាល់យានយន្តផ្លាកលេខរដ្ឋ ៨៥៦៨ ចំនួន១ អត្តសញ្ញាណប័ណ្ណសញ្ជាតិជាតិខ្មែរ២ សន្លឹក និងប្រាក់មួយចំនួន ។
លុះនៅវេលាម៉ោង១១ថ្ងៃដដែល គឺរំលងបាន២ម៉ោងក្រោយមក កម្លាំងនគរបាលការិយាល័យព្រហ្មទណ្ឌកម្រិតស្រាល បានធ្វើការស្រាវជ្រាវឈានដល់ការឃាត់ខ្លួនជនសង្ស័យជាក់ ស្តែង នៅចំណុចស្ថានីយប្រេងឥន្ធនៈមួយក្នុងសង្កាត់ជ្រោយចង្វា ខណ្ឌជ្រោយចង្វា ព្រមទាំងដកហូតបានកាបូបរបស់ជនរងគ្រោះ ដែលមានសម្ភារដូចរៀបរាប់ខាងលើមកវិញផងដែរ ។ នៅពេលឃាត់ខ្លួនជនសង្ស័យ វត្ថុតាងមួយចំនួនបានប្រគល់ឱ្យទៅជនរងគ្រោះវិញ ឯសម្ភារមួយចំនួនពាក់ព័ន្ធត្រូវបានសមត្ថកិច្ចកសាងសំណុំរឿងបញ្ជូនទៅកាន់សាលាដំបូងរាជធានីភ្នំពេញតាមនីតិវិធី ៕
ចែករំលែកព័តមាននេះ