រាជធានីភ្នំពេញ ៖ កាលពីព្រឹកថ្ងៃទី០៩ ខែឧសភា ឆ្នាំ២០១៨ នេះចៅក្រមតុលាការកំពូលលោក គង់ ស្រ៊ីម ប្រធានក្រុមប្រឹក្សាជំនុំជម្រះនឹងតំណាងមហាអយ្យការលោកជុំ សំបាន គ្រោង និងបើកសវនាការលើសំណុំរឿងលោក សម រង្ស៊ី ពាក់ព័ន្ធនឹងបទល្មើសចំនួនបី តែសវនាការនេះត្រូវបានលើកពេលវិញ ដោយសារតែអវត្តមានលោក សំ សុគង់ មេធាវីការពារក្តីឲ្យលោក សម រង្ស៊ីនៅពេលសវនាការ ។
លោក សម រង្ស៊ីអតីតប្រធានគណបក្សសង្គ្រោះជាតិជាប់ចោទពីបទសមគំនិតក្នុងអំពើក្លែងបន្លំឯកសារសាធារណៈប្រើប្រាស់ឯកសារសាធារណៈក្លែង និងញុះញង់បង្កឲ្យមានភាពវឹកវរធ្ងន់ធ្ងរដល់សន្តិសុខសង្គមប្រព្រឹត្តទៅកាលពីថ្ងៃទី១២ ,១៣ ខែសីហា ឆ្នាំ២០១៥ បទបញ្ញាត្តិដែលមានចែងតាមមាត្រា២៩, ៦២៩, ៦៣០ និងមាត្រា៤៥៩ នៃក្រមព្រហ្មទណ្ឌ ។
សូមជម្រាបថា កាលពីព្រឹកថ្ងៃទី២៧ ខែធ្នូ ឆ្នាំ២០១៦ ប្រធានក្រុមប្រឹក្សាជំនុំជម្រះនៃសាលាដំបូងរាជធានីភ្នំពេញលោក លាង សំណាត់ បានប្រកាសសាលក្រមថា ផ្ដន្ទាទោសលោក សម រង្ស៊ី ដាក់ពន្ធនាគារកំណត់ រយៈពេល៥ឆ្នាំ ជុំវិញបទចោទខាងលើ ។
គួរបញ្ចាក់ថា លោកសម រង្ស៊ីត្រូវបានចោទប្រកាន់សមគំនិតបទក្លែងឯកសារសាធារណៈ ប្រើឯកសាក្លែង ករណីដែលលោកហុង សុខហួរបានប្រើប្រាស់គណនេយ្យឈ្មោះសម រង្ស៊ីបង្ហោះឯកសារពាក់ព័ន្ធនឹងផែនទីព្រំដែនកម្ពុជាវៀតណាម ៕
ចែករំលែកព័តមាននេះ