រាជធានីភ្នំពេញ ៖ ប្រមុខរាជរដ្ឋាភិបាលកម្ពុជាសម្តេចតេជោ ហ៊ុន សែន នាយករដ្ឋមន្ត្រីកម្ពុជាថ្លែងនៅព្រឹកថ្ងៃទី៩ ខែឧសភា ឆ្នាំ២០១៨ ថា អ្នកដែលជេរសម្តេចខ្លាំងបំផុត…
រាជធានីភ្នំពេញ ៖ ប្រមុខរាជរដ្ឋាភិបាលកម្ពុជាសម្តេចតេជោ ហ៊ុន សែន នាយករដ្ឋមន្ត្រីកម្ពុជាថ្លែងនៅព្រឹកថ្ងៃទី៩ ខែឧសភា ឆ្នាំ២០១៨ ថា អ្នកដែលជេរសម្តេចខ្លាំងបំផុត គឺប៉ុល ពត អតីតមេដឹកនាំរបបប្រល័យពូជសាសន៍ ហើយដែលបន្តជេរសម្តេចរាល់ថ្ងៃប្រយ័ត្នត្រូវរន្ទះបាញ់ ដោយសារតែរាសីចាញ់សម្តេច ។
ថ្លែងនៅចំពោះមុខកម្មករ-កម្មការិនីសរុបចំនួនជាង២៨,៥៨៤នាក់មកពីរោងចក្រ សហគ្រាសចំនួន២៦នៅក្នុងក្រុងបាវិត ខេត្តស្វាយរៀង សម្តេចតេជោនាយករដ្ឋមន្ត្រីបានបញ្ជាក់ថា ពេលណាត្រូវសរសើរសម្តេច មានន័យថា សម្តេចកំពុងធ្វើខុស តែពេលណាដែលត្រូវជេរកាន់តែខ្លាំងមានន័យថា សម្តេចកំពុងតែធ្វើត្រូវនេះ គឺជារឿងពិត ។
ដូច្នេះការរិះគន់ ការវាយប្រហារដោយពាក្យសម្តីរបស់បក្សប្រឆាំងកាន់តែខ្លាំង គឺសម្តេចយល់ថា សម្តេចកំពុងដឹកនាំប្រទេសក្នុងផ្លូវដែលត្រឹមត្រូវ ។ សម្តេចតេជោបញ្ជាក់យ៉ាងដូច្នេះថា ៖ «អញ្ចឹងទេ អ្នកឯងជេរកាន់តែខ្លាំង ខ្ញុំយល់ថា ខ្ញុំធ្វើកាន់តែត្រូវ» ។ «អញ្ចឹងសុំអ្នកឯងជេរទៀតមកជេរថែមទៀតមក ។ ប៉ុន្តែជេរមិនស្រួល រាសីមិនដល់រន្ទះបាញ់ងាប់ អានឹងនិយាយពិត ។ ព្រោះរាសីអ្នកឯងមិនដល់ខ្ញុំ អញ្ចឹងជួនកាលវាអាចផ្លូវងងឹង វាអាចគ្រោះថ្នាក់ខ្លួនឯងវិញទេ ។ ព្រោះខ្ញុំដឹងថា អ្នកជេរខ្ញុំទាំងប៉ុន្មានមួយចំនួនវាងាប់បាត់ទៅហើយ ។ វាងាប់ខានជេរ អាហ្នឹងមកពីរាសីវាមិនដល់» ។
សម្តេចបានបញ្ជាក់ថា ខេត្តស្វាយរៀងពីអតីតកាល គឺជាតំបន់រងការគម្រាមគំហែងដោយសង្គ្រាមកាលពីអតីតកាល «ដូច្នេះតម្លៃនៃសន្តិភាពនៅទីនេះវាធំធេងខ្លាំងណាស់ មិនមែនគ្រាន់តែសម្រាប់នរណាម្នាក់ទេ គឺសម្រាប់ទាំងអស់គ្នា ។ បាត់សន្តិភាព គឺបាត់អ្វីៗទាំងអស់» ។ សម្តេចក៏បានរិះគន់សហរដ្ឋអាមេរិក និងអ្នកខ្លះដែលនិយាយសុទ្ធតែប្រជាធិបតេយ្យ និយាយសុទ្ធតែពីសិទ្ធមនុស្ស ក៏ប៉ុន្តែគេបានសួរទេថា នៅពេលដែលអ្នកឯងទម្លាក់គ្រាប់បែកលើក្បាលប្រជាជនខ្ញុំ តើអ្នកឯងមានបានគិតពីសិទ្ធមនុស្ស និងប្រជាធិបតេយ្យទេ? សិទ្ធមនុស្ស និងប្រជាធិបតេយ្យវាបានកើតឡើងតែក្នុងកាលៈទេសៈដែលប្រទេសមានសន្តិភាពតែប៉ុណ្ណោះ»។ សម្តេចបន្ថែមទៀតថា ពួកអ្នកដែលចង់ផ្តួលរំលំ គឺគេខិតខំធ្វើការញុះញ៉ង់គ្រប់វិធីទាំងអស់ ដូច្នេះក្មួយៗត្រូវបន្តការខិតខំ ដើម្បីចូលរួមចំណែកជាមួយនឹងការរក្សាសន្តិភាព ។ សម្តេចតេជោមានប្រសាសន៍បន្ថែមថា៖ «ហើយការរក្សាសន្តិភាពនេះវាងាយធ្វើទៅបាន និងធានាថាធ្វើបាន ប្រសិនបើក្មួយៗ និងក្រុមគ្រួសារបោះឆ្នោតឲ្យគណបក្សប្រជាជនកម្ពុជា ។ មានពូនៅ ពិបាកនឹងបំផ្លាញសន្តិភាពណាស់ ។ អញ្ចឹងហើយបានជាពួកប្រឆាំងទាំងប៉ុន្មានប្រមូលម្តុំ វ៉ៃពូទាំងអស់ ដោយសារពូរារាំងនូវសកម្មភាពបំផ្លាញជាតិរបស់គេ ។
ដូច្នេះពូមិនភ្ញាក់ផ្អើលទេនូវកាលដែលគេជេរពូនោះ ។ គ្មានអ្នកណាជេរពូច្រើនជាប៉ុល ពត ទេ ដោយសារប៉ុល ពតវាចាញ់នៅក្រោមដៃរបស់ពូ ។ ប៉ុន្តែនៅទីបំផុតប៉ុល ពត ស្លាប់រកដីកប់គ្មានផង» ។ សម្តេចនាយករដ្ឋមន្ត្រីមានប្រសាសន៍បន្តថា អ្នកប្រឆាំងទាំងឡាយដែលប៉ុនប៉ងផ្តូលរំលំរាជរដ្ឋាភិបាល និងពូកែជេរថ្នាក់ដឹកនាំត្រូវទទួលស្គាល់បុណ្យ និងបាបផង ។ សម្តេចនាយករដ្ឋមន្ត្រីមានប្រសាសន៍ទម្លាយពីបំណងប្រាថ្នារបស់សម្តេចថា៖ «ព្រោះមិនមែនអ្នកណាក៏ចេះតែធ្វើនាយករដ្ឋមន្ត្រីទេបានទេ ។ ពូមិនដែលនឹកឃើញថា នាយករដ្ឋមន្ត្រីទេ […] ។ បំណងធំរបស់ពូ ត្រឹមតែជាគ្រូបង្រៀនតូចតាចម្នាក់តែប៉ុណ្ណោះ ប៉ុន្តែអត់នឹកស្មានថា ខ្លួនឯងធ្វើនាយករដ្ឋមន្ត្រី ហើយមិនមែនធ្វើមួយឆ្នាំ ឬ២ឆ្នាំទេ ធ្វើ៣៣ឆ្នាំហើយ ហើយថែម១០ឆ្នាំទៀត បើក្មួយៗបោះឆ្នោតឲ្យ» ។
សម្តចតេជោ ហ៊ុន សែនបញ្ជាក់ថា ការបន្តដឹកនាំប្រទេសយូរឆ្នាំនេះ គឺព្រោះមិនមែនជាបញ្ហាការបំបែកឯកត្តកម្មទេ ជាមេដឹកនាំយូរជាងគេនោះទេ «ប៉ុន្តែដរាបណាពួកអ្នកចង់បំផ្លាញជាតិ ចង់បំផ្លាញសន្តិភាព វានៅបន្តបំផ្លាញ ពូនៅតែបន្តធ្វើ ដើម្បីទប់ស្កាត់វា ហើយការពារនូវអាយុជីវិតប្រជាជនកម្ពុជា ការពារនូវការងារធ្វើ និងប្រាក់ចំណូលដែលក្មួយៗមាន» ៕
ចែករំលែកព័តមាននេះ