ខេត្តស្ទឹងត្រែង ៖ ច្បាប់ស្តីពីជលផលបានកំណត់យកថ្ងៃទី០១ ដើមខែមិថុនា គឺជាថ្ងៃដែលត្រូវសម្រេចឲ្យបិទការនេសាទ និងត្រូវបើកឲ្យនេសាទជាធម្មតាវិញ នៅថ្ងៃទី០១ ខែតុលា ឆ្នាំ២០១៨ ក្រោយរដ្ឋបាលជលផលចេញសេចក្តីប្រកាស ។ ការចេញសេចក្តីប្រកាសនោះដោយសារកំឡុងប៉ុន្មានខែខាងលើ ស្ថិតក្នុងរដូវត្រីពងកូន ។ ប៉ុន្តែសេចក្តីប្រកាសដោយឡែកខេត្តស្ទឹងត្រែងបានអនុញ្ញាតិឲ្យបិទមុនច្បាប់កំណត់មួយខែ ចាប់ពីថ្ងៃទី១ដើមខែឧសភានេះ តែប្រជានេសាទមិនទាន់បានចូលរួមគោរពទៅតាមសេចក្តីប្រកាសនោះឲ្យមានប្រសិទ្ធិភាពនៅឡើយទេ ។
នៅដើមខែឧសភានេះត្រីមេពូជស្ទើគ្រប់មុខ ផ្តើមមានពងក្នុងពោះដែលត្រូវគេប្រទះឃើញនៅលើទីផ្សារ ។ ដោយសារតែទន្លេមេគង្គលើ សម្បូរទៅដោយត្រីមេពូជអាចបញ្ចេញពងហូរចុះទៅញាស់នៅទន្លេខាងក្រោម ទើបខេត្តស្ទឹងត្រែងត្រូវបានអនុញ្ញាតិឲ្យបិទនេសាទមុនខេត្តដទៃដែលជាទន្លេបឹងបួរ ។ ការធ្វើដូច្នោះជាជម្រើសមួយអាចរក្សាធនធានត្រីបានខ្ពស់ពីមួយឆ្នាំទៅមួយឆ្នាំបានដោយមានប្រសិទ្ធិភាព បើមានការចូលរួមអភិរក្សដែលមិនមានការប្រើប្រាស់ឧបករណ៍ខុសច្បាប់ជាដើម ។
មន្ត្រីរដ្ឋបាលជលផលឲ្យដឹងថា ដោយសារមានការទប់ស្កាត់រាល់សកម្មភាពនេសាទសុខច្បាប់ និងមានការចុះល្បាតនៅតំបន់អភិរក្សមួយចំនួនផលត្រីមានកំណើនឡើងវិញ ។ ហើយរដ្ឋបាលជលផលនៅតែបន្តអនុវត្តទប់ស្កាត់បទល្មើសនេសាទបន្តដោយមានកម្លាំងសមត្ថកិច្ចទាំងបីប្រភេទអាជ្ញាធរមូលដ្ឋាន ឆ្មាំទន្លេ និងប្រជាការពារចូលរួមសហការ ។
តាមស្ថិតិប៉ាន់ប្រមាណផលនេសាទចាប់ត្រីជាលក្ខណគ្រួសារលោក ទុំ នីរ៉ូ នាយខណ្ឌជលផលថា ចាប់ពីខែមករា រហូតដល់ខែមេសា ឆ្នាំ២០១៨ មានចំនួន៦២៥តោន ដោយមិនទាន់រាប់បញ្ចូលក្នុងឧសភា នៅឡើយទេ ។ ដោយឡែកស្ថិតិបរិមាណផលនេសាទកែច្នៃចាប់ពីដើមខែមករា រហូតដល់ខែមេសា ឆ្នាំ២០១៨នេះ មានប្រមាណជា១៧តោន ក្នុងនោះរួមមានប្រហុកចំនួន០៦តោន ត្រីងៀត០៥តោន និងផ្អកចំនួន០៦តោន ។
បើតាមការសង្កេតរយៈពេលជិតមួយសប្តាហ៍ក្នុងឧសភានេះ ផលត្រីមានកំណើនខ្លាំងលើទីផ្សារ ហើយតម្លៃវិញរួមមានត្រីក្អែកមួយគីឡូក្រាម១ម៉ឺន១ពាន់ទៅ១ម៉ឺន២ពាន់រៀល , ត្រីព្រួលមួយគីឡូក្រាម១ម៉ឺន២ពាន់ដល់១ម៉ឺន៥ពាន់រៀល , ត្រីតាពិនមួយគីឡូក្រាម៨ពាន់រៀល, ត្រីប៉ាភៀនមួយគីឡូ៥ពាន់រៀល, ត្រីកែមួយគីឡូ៧ពាន់ដល់១ម៉ឺន៣ពាន់រៀល, ត្រីក្របីមួយគីឡូ២ម៉ឺនដល់២ម៉ឺន៨ពាន់រៀល, ត្រីពោធិ៍មួយគីឡូ១ម៉ឺន៤ពាន់រៀល, ត្រីប៉ាវ៉ាមុខ១មួយគីឡូ២ម៉ឺន៥ពាន់រៀល , ត្រីប៉ាវ៉ាមុខ២មួយគីឡូ៤ម៉ឺនទៅ៥ម៉ឺនរៀល , ត្រីប៉ាកក ឬត្រីថ្មមួយ គីឡូ១ម៉ឺនរៀល, ចំណែកត្រីប៉ាសេអ៊ីមួយក្បាល ត្រឹម៣ខាំ មួយគីឡូ២ម៉ឺន៥ពាន់រៀល និងមួយក្បាលទម្ងន់៧ទៅ៨ខាំ មួយគីឡូ៧ម៉ឺនរៀល ។
មុនប្រភពទិន្នផលត្រីមានកំណើនខាងលើជំនាញរដ្ឋបាលមាននាយរងខណ្ឌ នាយរងផ្នែក និងមន្ត្រីខណ្ឌរដ្ឋបាលជលផលបានដឹកនាំក្រុមឆ្មាំទន្លេ ទាំងប៉ុស្តិ៍ល្បាតក្នុងតំបន់អភិរក្សសត្វផ្សោត ដោយសហការជាមួយកងកម្លាំងទាំងបីប្រភេទរឹបអូសបានមងប្រវែង៤៤៩៦ម៉ែត្រ សន្ទូចរនងចំនួន៦៦៩៨ផ្លែ ព្រមទាំងបានអប់រំប្រជានេសាទចំនួន៩២នាក់ និងធ្វើកិច្ចសន្យា១៣នាក់ ឲ្យឈប់បន្តការនេសាទក្នុងតំបន់អភិរក្ស និងកន្លែងហាមឃាត់មួយចំនួនទៀតផងដែរ ៕
ចែករំលែកព័តមាននេះ