ខេត្តសៀមរាប ៖ ប៉ូលិសបេតិកភណ្ឌ សហការជាមួយមន្ត្រីអាជ្ញាធរអប្សរា ដែលប្រចាំការនៅតាមប្រា សាទអង្គរវត្ត បានសម្រេចឃាត់ខ្លួនជនជាតិចិនចំនួន៤នាក់ ដែលពួកគេបានចូលទៅធ្វើសកម្មភាពយកឧបករណ៍ដែកទៅស្វានថ្មបុរាណ (ថ្មបាយក្រៀម) តាមមាត់កស្សិណនៃប្រាសាទអង្គរវត្ត…
ខេត្តសៀមរាប ៖ ប៉ូលិសបេតិកភណ្ឌ សហការជាមួយមន្ត្រីអាជ្ញាធរអប្សរា ដែលប្រចាំការនៅតាមប្រា សាទអង្គរវត្ត បានសម្រេចឃាត់ខ្លួនជនជាតិចិនចំនួន៤នាក់ ដែលពួកគេបានចូលទៅធ្វើសកម្មភាពយកឧបករណ៍ដែកទៅស្វានថ្មបុរាណ (ថ្មបាយក្រៀម) តាមមាត់កស្សិណនៃប្រាសាទអង្គរវត្ត ។ ការឃាត់ខ្លួនជនជាតិចិនទាំង៤នាក់នោះ ធ្វើឡើងនៅវេលាម៉ោង0៩ព្រឹក ថ្ងៃទី៦ ឧសភា ស្ថិតនៅចំណុចមាត់កស្សិណខាងលិច ខាងមុខអង្គរវត្ត ស្ថិតនៅភូមិត្រពាំងសេះ សង្កាត់គោកចក ក្រុងសៀមរាប។
ជុំវិញករណីខាងលើនោះ កោះសន្តិភាព មិនអាចសុំការបំភ្លឺពីសមត្ថកិច្ចបេតិកភណ្ឌ និងមន្ត្រីអ្នកនាំពាក្យរបស់អាជ្ញាធរបានទេ នៅរសៀលថ្ងៃទី៧ ឧសភានេះ ព្រោះទូរស័ព្ទចូលហើយគ្មានអ្នកលើក ។
បើតាមប្រភពពីប៉ូលិសទេសចរខេត្តបានបញ្ជាក់ច្បាស់នៅរសៀលថ្ងៃទី៧ ឧសភា នេះថា រឿងជនជាតិចិន៤នាក់ ដែលចូលទៅស្វាននៅមុខប្រាសាទអង្គរវត្ត ពិតជាមានការឃាត់ខ្លួនទាំង៤នាក់នោះប្រាកដមែន ប៉ុន្តែក្រោយមក ជនជាតិចិនទាំងនោះត្រូវបានសមត្ថកិច្ចប្រគល់ទៅខាងអាជ្ញាធរអប្សរា ដើម្បីធ្វើការសាកសួរ ។ ប្រភពបានបញ្ជាក់ថា ជនជាតិចិនទាំង៤នាក់នោះត្រូវបានដោះលែងឱ្យមានសេរីភាពវិញហើយ បន្ទាប់ពីធ្វើការអប់រំរួច ។ សមត្ថកិច្ចបានបន្ថែមថា ជនជាតិចិនទាំង៤នាក់នោះ គឺស្វានយកថ្មភក់នៅជាប់មាត់កស្សិណខាងលើ ដើម្បីរាវរករ៉ែមានតម្លៃ ដែលក្រុមនោះសង្ស័យថា នៅទីនោះមានរ៉ែមាស ទើបពួកគេចូលធ្វើសកម្មភាពលួចលាក់បែបនេះ ។
មានការកត់សម្គាល់ថា នៅទីនោះមានមន្ត្រីយាមប្រចាំដែរ ចុះហេតុអ្វីបានជាមិនឃាត់ខ្លួន មុនពួកគេកាន់ដែកស្វានចុះទៅធ្វើសកម្មភាព? នោះមានន័យថា ជនជាតិចិនទាំងនោះចូលមកដល់កម្ពុជា ហើយហ៊ានធ្វើសកម្មភាពទាំងបំពានបែបនេះ គឺមិនមែនជាមនុស្សធម្មតាទេ ៕
ចែករំលែកព័តមាននេះ