រាជធានីភ្នំពេញ ៖ រាជរដ្ឋាភិបាលបានចាត់ទុកសហគ្រាសធុនតូច និងមធ្យម(SME)ជាវិស័យមួយកំពុងដើរតួនាទីសំខាន់ក្នុងការគាំទ្រកំណើនសេដ្ឋកិច្ចជាតិ និងចូលរួមកាត់បន្ថយភាពក្រីក្រនៅកម្ពុជា ប៉ុន្ដែវិស័យនេះក៏កំពុងជួបបញ្ហាជាច្រើននៅក្នុងកិច្ចដំណើរការអាជីវកម្មរបស់ខ្លួនដែរ ។ ក្នុងនោះ បញ្ហាសំខាន់ចំនួន៥ត្រូវបានរកឃើញថាប្រឈមខ្លាំងជាងគេ គឺបញ្ហាពន្ធ, ប្រភពទុន, ការចុះបញ្ជី, កង្វះការគាំទ្រ និងខ្វះអ្នកសម្របសម្រួល ។
ដើម្បីដោះស្រាយ និងជួយលើកស្ទួយវិស័យនេះ រាជរដ្ឋាភិបាលបាននិងកំពុងគិតគូរ និងមានគោលនយោបាយលើកទឹកចិត្តជាច្រើន ធ្វើយ៉ាងណា ជួយជ្រោមជ្រែងវិស័យនេះឲ្យក្រោកឈរឡើង និងមានភាពប្រកួតប្រជែងទាំងក្នុងតំបន់ និងលើឆាកអន្តរជាតិ តាមរយៈការបង្កើតSME Bank, មូលនិធិគម្រោងអភិវឌ្ឍសហគ្រិនកម្ពុជា, ការមិនដំឡើងពន្ធ មិនបង្កើតពន្ធ និងការលុបបំបាត់ពន្ធ ជាដើម ។
បន្ថែមលើនេះ សហគ្រាសធុនតូច និងមធ្យម ក៏ដូចជាក្រុមហ៊ុនចាប់ផ្ដើមធុរកិច្ចថ្មី (Start up)ទាំងអស់ នឹងទទួលបានការលើកលែងពន្ធលើប្រាក់ចំណេញរយៈពេល២ឆ្នាំ ប្រសិនទៅចុះបញ្ជីឲ្យបានមុនដំណាច់ឆ្នាំនេះ ។ ដោយឡែក សម្រាប់សហគ្រាសដទៃទៀតដែលធ្វើអាជីវកម្មទទួលបានប្រាក់ចំណេញយូរមកហើយនោះ ក៏មិនត្រូវបានសើរើផងដែរ ប្រសិនបើមកចុះបញ្ជីឲ្យបានមុនដំណាច់ឆ្នាំនេះដូចគ្នា ។
នៅក្នុងវេទិកា ស្ដីពី សហគ្រាសធុនតូច និងមធ្យម និងក្រុមហ៊ុនចាប់ផ្ដើមធុរកិច្ចថ្មីលើវិស័យបច្ចេកវិទ្យា គមនាគមន៍ និងព័ត៌មាន នាព្រឹកថ្ងៃទី៧ ឧសភា លោកជំទាវ ប៊ុន នារី អគ្គនាយករងនៃអគ្គនាយកដ្ឋានពន្ធដារ បានលើកឡើងថា រាជរដ្ឋាភិបាលក្នុងអាណត្តិដែលកំពុងដំណើរការនេះ មានគោលនយោបាយច្បាស់លាស់ក្នុងការលើកទឹកចិត្តជាច្រើនដល់វិស័យSMEs ដូចជា មិនដំឡើងពន្ធ មិនបង្កើតពន្ធថ្មី និងមានការលើកទឹកចិត្តជាច្រើនទៀត ។
លោកជំទាវថ្លែងយ៉ាងដូច្នេះ ៖« យើងបានផ្ដល់នូវការអនុគ្រោះជាច្រើនដល់សហគ្រិន និងនិយោជក រួមទាំងសហគ្រាសទាំងអស់ ដូចជា លុបចោលលើពន្ធមធ្យោបាយដឹកជញ្ជូន(ពន្ធលើម៉ូតូ) និងជលយានយន្ដដែលមានកម្លាំងសេសត្រឹម១៥០ចុះក្រោម និងលុបចោលលើពន្ធសត្តឃាត ជាដើម ។ ក្រៅពីនេះ រាជរដ្ឋាភិបាលបានលើកទឹកចិត្តផ្នែកពន្ធតម្លៃបន្ថែម(VAT) ទៅលើម្ហូបអាហារដែលយើងទើបតែអនុវត្តថ្មីៗនេះ និងលើកទឹកចិត្តលើការមិនយកពន្ធVAT ទៅលើការប្រើប្រាស់ទឹក និងភ្លើង ដែលយើងបានចាប់ផ្ដើមអនុវត្តរួចមកហើយ ។ ទន្ទឹមនឹងនេះ រាជរដ្ឋាភិបាលមិនគិតពន្ធទៅលើប្រាក់ខែដែលចាប់ពី៨០ដល់២០០ដុល្លារ ហើយឥឡូវនេះ យើងបានដំឡើងដល់២៥០ដុល្លារថែមទៀត ដែលទាំងអស់នេះ គឺជាគោលនយោបាយដែលរាជរដ្ឋាភិបាលកំពុងតែធ្វើ និងជួយដល់ប្រជាជនកម្ពុជាទាំងអស់ » ។
លោកជំទាវក៏បានប្រកាសយ៉ាងឱឡារិកផងដែរពីការលើកទឹកចិត្តដល់សហគ្រាសធុនតូច និងមធ្យម ក៏ដូចក្រុមហ៊ុនបង្កើតថ្មីទាំងអស់ដែលកំពុងដំណើរការអាជីវកម្ម ឬមានបំណងដំណើរការអាជីវកម្មរបស់ខ្លួន ហើយស្ម័គ្រចិត្តមកចុះបញ្ជីចាប់ពីថ្ងៃទី១ ខែមករា ២០១៧ រហូតដល់ថ្ងៃទី៣១ ខែធ្នូ ឆ្នាំ២០១៨នេះ សហគ្រាសទាំងអស់នឹងបានការលើកទឹកចិត្តលើកលែងពន្ធរយៈពេល២ឆ្នាំ ។
លោកជំទាវបញ្ជាក់យ៉ាងដូច្នេះថា ៖« សម្រាប់សហគ្រាសថ្មី ប្រសិនបើប្រញាប់ប្រញាល់ទៅចុះបញ្ជីឲ្យបានមុនថ្ងៃទី៣១ ខែធ្នូ ឆ្នាំ២០១៨នេះ ពន្ធលើប្រាក់ចំណេញ នឹងត្រូវបានលើកលែងរយៈពេល២ឆ្នាំ ។ នីតិវិធីនៃការលើកលែងពន្ធនេះ មានន័យថា បើសហគ្រាសមួយចុះបញ្ជីនៅឆ្នាំនេះ ហើយនៅឆ្នាំ២០២០ ទើបទទួលបានប្រាក់ចំណេញ នោះចាប់ពីឆ្នាំ២០២០ទៅ ទើបយើងរាប់ថាជាឆ្នាំទី១នៃការលើកលែងពន្ធ ។ ដោយឡែកសម្រាប់សហគ្រាសដទៃទៀតដែលបើករកស៊ីតាំងពីយូរមកហើយនោះ គឺយើងលាងបាបជូនទាំងអស់ មានន័យថា ឲ្យមកចុះបញ្ជីឲ្យបានមុនថ្ងៃទី៣១ ខែធ្នូ ឆ្នាំ២០១៨ ប្រាក់ចំណេញរបស់អ្នកទាំងអស់គ្នា គឺត្រូវគិតចាប់ពីថ្ងៃដែលចុះបញ្ជីហ្នឹងទៅ ព្រោះកន្លងមក ចំណេញច្រើនណាស់ដែលមិនបានបង់ពន្ធឲ្យរដ្ឋ » ។
សហគ្រាសធុនតូច ធុនមធ្យម និងសិប្បកម្មនៅកម្ពុជាមានប្រមាណជាង៥០ម៉ឺនមូលដ្ឋាន ដែលបាននិងកំពុងធ្វើអាជីវកម្ម ផ្ដល់ការងារ និងបង្កើតប្រាក់ចំណូលដល់ប្រជាពលរដ្ឋកម្ពុជា ប៉ុន្ដែភាគច្រើនពុំបានចុះបញ្ជីនៅឡើយទេ ដែលធ្វើឲ្យរាជរដ្ឋាភិបាលពិបាកក្នុងការជួយជ្រោមជ្រែង និងចែករំលែងព័ត៌មាន ឬចំណេះដឹងផ្សេងៗ ព្រោះពួកគេស្ថិតនៅក្រៅក្របខ័ណ្ឌច្បាប់។ នេះបើតាមលោកកិត្តិសេដ្ឋាបណ្ឌិត ចម ប្រសិទ្ធ ទេសរដ្ឋមន្ត្រី រដ្ឋមន្ត្រីក្រសួងឧស្សាហកម្ម និងសិប្បកម្ម ។
លោកទេសរដ្ឋមន្ត្រីថ្លែងថា ៖« យើងមានសហគ្រាសធុនតូច ធុនមធ្យម និងសិប្បកម្មជាង៥សែន ក៏ប៉ុន្ដែស្ទើរតែជាង៩៥%នៅមិនទាន់បានចុះបញ្ជីនៅឡើយទេ ដោយសារគាត់ខ្លាចរឿងបង់ពន្ធផង ឬខ្លាចអីគ្រប់សព្វ ។ អីចឹង បើយើងចង់ជួយគាត់ ក៏ពិបាក ដោយសារគាត់មិនទាន់ស្របច្បាប់ ហើយវិធីសាស្ត្ររបស់យើងពេលនេះ គឺធ្វើម៉េចឲ្យគាត់ចុះបញ្ជីសិន ទើបយើងអាចតម្រែតម្រង់គាត់ ហើយបើគាត់មិនចុះបញ្ជីទេ គាត់កើតមក ហើយស្លាប់ទៅវិញ ក៏យើងមិនដឹងដែរ ដោយសារគាត់នៅក្រៅក្របខ័ណ្ឌច្បាប់ » ។
លោកទេសរដ្ឋមន្ត្រីបញ្ជាក់ថា ៖« រាល់ថ្ងៃនេះ យើងលើកទឹកចិត្តថា ឲ្យពួកគាត់មកចុះបញ្ជី សឹងតែមិនគិតថ្លៃទៅហើយ ។ ការចុះបញ្ជីនេះ ដើម្បីដឹងថា នៅភូមិហ្នឹងមាន SMEប៉ុន្មាន0x017d7 កំពុងធ្វើអាជីវកម្មអី ដើម្បីថ្ងៃក្រោយ យើងអាចចែករំលែកចំណេះដឹងដល់ពួកគាត់ ប៉ុន្ដែបើយើងមិនដឹងថា គាត់កើតនៅកន្លែងណាផង តើយើងជួយគាត់តាមរបៀបណា ? កន្លែងហ្នឹងដែលជាការពិបាក ។ អីចឹង ជាវិធីសាស្ត្រ គឺយើងធ្វើម៉េចផ្ដល់សំបុត្រកំណើតដល់ SME ទាំងអស់សិន ទើបយើងអាចជួយគាត់បាន » ៕
ចែករំលែកព័តមាននេះ