រាជធានីភ្នំពេញ ៖ តារាចម្រៀងលោក សុះ ម៉ាច បានប្រកាសរឿងគួរឲ្យភ្ញាក់ផ្អើលជាសាធារណៈ ចង់ចូលរួមក្នុងឆាកនយោបាយនៅក្នុងគណបក្សមួយ ដោយត្រៀមខ្លួនចូលរួមប្រកួតប្រជែងក្នុងការបោះឆ្នោតនាពេលខាងមុខនេះ ។ ការប្រកាសរបស់អតីតប្រធានសមាគមសិល្បករខ្មែររូបនេះធ្វើឡើង…
រាជធានីភ្នំពេញ ៖ តារាចម្រៀងលោក សុះ ម៉ាច បានប្រកាសរឿងគួរឲ្យភ្ញាក់ផ្អើលជាសាធារណៈ ចង់ចូលរួមក្នុងឆាកនយោបាយនៅក្នុងគណបក្សមួយ ដោយត្រៀមខ្លួនចូលរួមប្រកួតប្រជែងក្នុងការបោះឆ្នោតនាពេលខាងមុខនេះ ។
ការប្រកាសរបស់អតីតប្រធានសមាគមសិល្បករខ្មែររូបនេះធ្វើឡើង បន្ទាប់ពីតារាមួយចំនួនក្នុងវ័យស្រករលោកកំពុងតែចូលរួមប្រឡូកក្នុងឆាកនយោបាយ ខណៈពេលដែលពួកគេទាំងនោះបាត់មុខពីសិល្បៈតែម្តង ។
គោលបំណងចូលរួមក្នុងឆាកនយោបាយរបស់លោកសុះ ម៉ាច នាពេលនេះនៅមិនទាន់ច្បាស់មួយរយភាគរយនៅឡើយ ដោយសារតែលោករង់ចាំការផ្តល់មតិយោបល់ពីប្រិយមិត្តគាំទ្រជាមុនសិន ក្នុងពេលដែលកម្រិតជីវភាពរបស់លោកហាក់នៅទន់ខ្សោយនៅឡើយដែរ ។
សំណេររបស់លោកសុះ ម៉ាច ដែលបានបង្ហោះតាមហ្វេសប៊ុកថា «ខ្ញុំសូមមតិយោបល់ពីលោកយាយ លោកតា ពុកម៉ែអ៊ុំ ពូមីងមា មិត្តភក្តិគ្រប់ស្រទាប់វណ្ណៈ រួមទាំងបណ្តាមិត្តសិល្ប:ទាំងអស់ថាបើសិនខ្ញុំចូលប្រឡូកក្នុងឆាកនយោបាយជាតំណាងរាស្ត្រ នៅគណបក្សណាមួយ បងប្អូនគាំទ្រឲ្យខ្ញុំចូលរួមទេ ? ខ្ញុំចង់ចូលរួមបម្រើជាតិទៅតាមចំណេះដឹង និងមនសិការជាតិ រួមទាំងការសិក្សាឈ្វេងយល់របស់ខ្ញុំនៅពេលដែលខ្ញុំចេញទៅបណ្តាប្រទេស ធំៗនានាផងដែរ ។
ខ្ញុំតែងតែស្រមៃចង់បានប្រទេសខ្ញុំរីកចម្រើន ប្រជាពលរដ្ឋខ្មែររស់នៅប្រកបដោយសុខសន្តិភាព ស្ថិរភាព សិទ្ធិសេរីភាព ភាពស្មើភាពគ្នា មានការងារមានប្រាក់ខែខ្ពស់អាចរស់បានស្រួលជាងសព្វថ្ងៃទៅទៀត…។ និយាយរួមក្នុងបំណងរបស់ខ្ញុំនៅពេលដែលជីវភាពគ្រួសាររបស់ខ្ញុំធូរធារ ខ្ញុំចង់ចូលរួមបម្រើជាតិដូចលោកឪពុកខ្ញុំដែរ ទោះនៅក្របខណ្ឌណាក៏ដោយ បក្សណាក៏ដោយ ។ ឥឡូវនេះមិត្តសម្លាញ់របស់ខ្ញុំបានបបួលខ្ញុំចូលរួមបក្សនយោបាយមួយដោយឲ្យឈរឈ្មោះជាតំណាងរាស្ត្រ ។ ខ្ញុំកំពុងតែពិចារណា នៅពេលដែលជីវភាពរស់នៅរបស់ខ្ញុំនៅមានកម្រិតនៅឡើយ ណាមួយខ្ញុំនៅស្រឡាញ់សិល្ប:ខ្លាំងណាស់ ម្យ៉ាងវិញទៀតបរិយាកាសនយោបាយសព្វថ្ងៃហាក់ពុំទាន់មានអំណោយផលដល់រូបខ្ញុំនៅឡើយ ។
ខ្ញុំសូមយោបល់ពីពុកម៉ែ មីងមា បងប្អូន មិត្តទាំងអស់ ជួយជាមតិយោបល់ថាតើគួរ ឬពុំគួរ »?
ពាក់ព័ន្ធទៅនឹងរឿងនេះលោកសុះ ម៉ាច អះអាងប្រាប់កោះសន្តិភាពតាមសារអេឡិចត្រូនិកបន្ថែមកាលពីថ្ងៃទី៧ ឧសភា ២០១៨ថា ទាំងនោះគឺជាការគិតពិចារណារបស់លោកនៅឡើយ ព្រោះមានមិត្តភក្តិម្នាក់មានបំណងចង់ឲ្យលោកចូលរួម ។ គណបក្សដែលលោកមានបំណងនឹងចូលរួមនោះគឺមិនមែនជាបក្សធំណាមួយឡើយ ប៉ុន្តែគេមានគោលការណ៍ដើម្បីជាតិមាតុភូមិជាធំ ។
បើសិនចូលរួមនៅក្នុងឆាកនយោបាយជាមួយគណបក្សនោះមែន លោកសុះ ម៉ាច បារម្ភពីអាជីពសិល្បៈរបស់លោកដែរ ក្នុងពេលដែលជីវភាពគ្រួសារនៅទន់ខ្សោយ ។
បើតាមលោកសុះ ម៉ាច បច្ចុប្បន្នការងារសិល្បៈនៅតាមទូរទស្សន៍របស់លោកមិនសូវមានទេ គឺមានម្តងម្កាលប៉ុណ្ណោះ ។ ការងារសិល្បៈរបស់លោកសព្វថ្ងៃ គឺមានតែច្រៀងប្រចាំភោជនីយដ្ឋាន២ និងធ្វើជាគ្រូបង្ហាត់នៅសាលាតន្ត្រីមួយប៉ុណ្ណោះ ៕
ចែករំលែកព័តមាននេះ