ខេត្តក្រចេះ ៖ អ្នកភូមិស្រែនននិងភូមិអាលច ក្នុងឃុំកន្ទួត ស្រុកចិត្របុរី បានជម្លៀសចេញពីភូមិទៅរស់នៅតំបន់ផ្សេងៗចោលផ្ទះសម្បែង គោក្របី ជ្រូក មាន់ទា និងបានអំពាវនាវឱ្យអាជ្ញាធរពន្លឿនការស្រាវជ្រាវរុក រកពីមូលហេតុជាក់លាក់ ដែលនាំឱ្យមានការពុលមនុស្សស្លាប់ និងមានវិធានការទប់ស្កាត់ឱ្យបានគ្រប់គ្រាន់ ដើម្បីឱ្យពួកគាត់ឆាប់បានចូលមករស់នៅក្នុងភូមិឋានចាស់នេះវិញ ។
ការអំពាវនាវរបស់អ្នកភូមិដែលភាគច្រើនជាជនជាតិភាគតិចព្នងនេះ បានធ្វើឡើងបន្ទាប់ពីមានអ្នកភូមិក្នុងចំនួនតិចតួច ដែលគេចផុតពីការពុល បានសម្រេចចិត្តជម្លៀសខ្លួនចេញពីភូមិមួយនេះមួយរយៈ ខណៈដែលស្ថានភាពពុលបានសម្លាប់អាយុជីវិតអ្នកភូមិប្រុសស្រីក្មេងចាស់កាន់តែធ្ងន់ធ្ងរទៅៗពីមួយថ្ងៃទៅមួយថ្ងៃ ។
បើគិតត្រឹមរសៀលថ្ងៃទី៧ ឧសភា គឺមានចំនួន៥ថ្ងៃហើយ ដែលការពុលនេះបានវាយលុកយ៉ាងខ្លាំងមកលើអ្នកភូមិស្រែននន និងភូមិអាលច ឃុំកន្ទួត ។ ការពុលដែលអាជ្ញាធរបានកំណត់ថា បណ្តាលមកពីទឹកព្រែកនិងទឹកអូរនោះ បានធ្វើឱ្យចំនួនអ្នកភូមិស្លាប់កើនឡើងរហូតដល់១៣នាក់ ក្នុងនោះស្រី៩នាក់ ។ ស្របគ្នានេះ ចំនួនអ្នករងគ្រោះដោយសារការពុលដែលកើតមានអាការងងឹតមុខ តឹងណែនដើមទ្រូង ស្រវាំងភ្នែក ទន់ដៃទន់ជើង បានកើនឡើងរហូតដល់ជាង២០០នាក់ហើយ ។
រថយន្តសាមុយជាច្រើនគ្រឿង ដែលបញ្ជូនមកពីតាមអង្គភាពសង្គ្រោះផ្សេងៗ នៅតែបង្កើនសកម្មភាពដឹកជញ្ជូនអ្នកភូមិយកទៅសង្គ្រោះនៅមន្ទីរពេទ្យ ក៏ដូចជាដឹកសពពីមន្ទីរពេទ្យត្រឡប់មកភូមិវិញ ខណៈដែលការពុលអ្នកភូមិថា បណ្តាលមកពីទឹកអូរនិងទឹកព្រែកទេរនោះ នៅតែមិនទាន់ថមថយនៅឡើយ ។ មន្ត្រីអាជ្ញាធរនិយាយថា ព្រែកទេរជាព្រែកធំមួយ លាតសន្ធឹងពីតំបន់ភ្នំប៉ែកខាងលើគឺពីខេត្តមណ្ឌលគិរី ចែកចេញជាអូរ ស្ទឹងតូចធំ ហូរមកចូលទន្លេមេគង្គខេត្តក្រចេះ ។ ពលរដ្ឋជាច្រើន រយគ្រួសារ សព្វថ្ងៃពឹងផ្អែកលើប្រភពទឹកព្រែកទេរនេះ ទាំងការធ្វើកសិកម្ម និងបរិភោគប្រចាំ ថ្ងៃ ។ ខណៈរដូវនេះជារដូវវស្សា ជំនន់ទឹក ភ្លៀងនៅប៉ែកខាងលើបានហូរជន់តាមអូរតូចធំសំដៅចូលព្រែកទេរ ធ្វើឱ្យទឹកព្រែកមានសភាពល្អក់ ។
អាជ្ញាធរសន្និដ្ឋានថា ការពុលរបស់អ្នកភូមិ គឺផ្តើមចេញពីទឹកព្រែកទេរ ដែលមានសារធាតុគីមីបណ្តាលមកពីការប្រើប្រាស់ថ្នាំបាញ់សម្លាប់ស្មៅ ហើយហូរតាមទឹកភ្លៀងចូលក្នុងព្រែក ។ មួយវិញទៀត សារធាតុគីមីទាំង នេះ អាចបណ្តាលមកពីការបំពុលទឹកចាប់ត្រីនៅប៉ែកខាងលើ ហើយទឹកហូរមកក្រោម ឯពលរដ្ឋប្រើប្រាស់ទឹកនេះក៏បណ្តាលឱ្យពុល ។ ជាមួយនឹងស្ថានភាពបែបនេះ សាលាខេត្តក៏បានចេញសេចក្តីប្រកាសមួយជាបន្ទាន់ឱ្យពលរដ្ឋរស់នៅតាមដងព្រែកទេរ ក្នុងភូមិសាស្ត្រខេត្តក្រចេះ ត្រូវបញ្ឈប់ការបរិភោគ និងប្រើ ប្រាស់ទឹកព្រែកទេរ និងទឹកអូរតាមដៃព្រែកទេរ ព្រមទាំងប្រភពទឹកផ្សេងទៀត ដែលមិនមានអនាម័យនៅតាមតំបន់នោះ ។
បុរសជនជាតិព្នងម្នាក់អាយុ៥៥ឆ្នាំ ឈ្មោះព្រាត នាត រស់នៅក្នុងភូមិស្រែនន និយាយថា អ្នកភូមិនេះសព្វថ្ងៃពឹងផ្អែកប្រភពទឹកពីព្រែកទេរ ក៏ដូចជាអូរជាដៃព្រែកតូចៗផ្សេងទៀតដែលនៅក្បែរៗភូមិ ។ បងថ្លៃគាត់មិនបានហូបទឹកព្រែកទេរ តែកើតអាការពុលស្លាប់ដែរ ។បុរសរូបនេះនិយាយថា ផ្អែកលើជំនឿអរូបីខ្មោចព្រាយបិសាច គឺអ្នកភូមិបានធ្វើពិធីសែនព្រេនរួចហើយ តែការពុលនៅតែមិនថមថយ ។ ដោយសារមានបាតុភាពចម្លែកក្នុងភូមិ គឺពុលមនុស្សស្លាប់នៅនឹងមុខស្រស់ៗបែបនេះ ធ្វើឱ្យរូបគាត់ក៏ដូចជាអ្នកភូមិផ្សេងទៀត សម្រេចបិទទ្វារផ្ទះចាក់សោចោល លែងគោក្របីចេញពីក្រោល និងសម្រេចជម្លៀសខ្លួនទៅនៅក្រៅភូមិមួយរយៈ ។ ជាមួយនេះ ក៏សូមអំពាវនាវដល់អាជ្ញាធរ ពន្លឿនការស្រាវជ្រាវរកមូលហេតុ និងវិធានការទប់ស្កាត់ឱ្យបានឆាប់រហ័ស ។ បុរសរូបនេះនិយាយថា ដោយសារទំនៀមទម្លាប់ជនជាតិភាគតិច ហើយម្យ៉ាងក៏គ្មានមនុស្សមកចូលរួមបុណ្យផងនោះ សពអ្នកភូមិត្រូវបានជីកដីបញ្ចុះដោយមិនមានធ្វើបុណ្យ ចាក់មេក្រូ ដូចសព្វដងទេ ហើយមានសពខ្លះមិនទាំងដាក់ចូលក្តារមឈូសទៀតផង។
ចំណែកឯស្ត្រីឈ្មោះ ភឿន រាំអី អាយុ៣៨ឆ្នាំ ដែលមានម្តាយអាយុជាង៧០ឆ្នាំស្លាប់ដោយសាររងការពុលនេះនិយាយថា មុននឹងកើតមានការពុលនេះ អ្នកភូមិបានទៅដងទឹកពីព្រែកទេរមកប្រើ និងឃើញមានត្រីពុលងាប់អណ្តែតពេញក្នុងព្រែក ។ អ្នកភូមិបានយកត្រីទាំងនោះមកហូប ដោយខ្លះយកមកប្រឡាក់ ឬធ្វើប្រហុក និងផ្អក ។ ក្រោយពីនាំគ្នាហូបទឹក និងហូបត្រីនោះមក ស្រាប់តែអ្នកភូមិកើតអាការបែបនេះ។ ប៉ុន្តែអ្នកភូមិខ្លះនិយាយថា ពួកគាត់មិនបានហូបទឹក និងហូបត្រី ឬហូបស្រាទេ តែក៏បានពុលដែរ។
បើទោះជាបែបណា ក្រុមមន្ត្រីបានប្រាប់ឱ្យដឹងថា សំណាកផ្សេងៗដែលសង្ស័យថាពុល រួមមានទឹកព្រែក ស្រា.ស និងគ្រឿងបរិភោគផ្សេងទៀត ត្រូវបានអាជ្ញាធរយកទៅធ្វើកោសល្យវិច័យ តែលទ្ធផលនៅមិនទាន់បានបង្ហាញនៅឡើយទេ ។អភិបាលខេត្ត លោក វ៉ា ថន ត្រូវបានគេមើលឃើញថា កំពុងតែបង្កើនសកម្មភាពយ៉ាងសស្រាក់សស្រាំលើការដឹកនាំមន្ត្រីតាមមន្ទីរអង្គភាពពាក់ព័ន្ធចុះទៅដល់ភូមិកើតហេតុ ដើម្បីជួយសង្គ្រោះអ្នកភូមិ ក៏ដូចជាបង្កើនការស្រាវជ្រាវរកមូលហេតុ ។ ក្នុងការដឹកនាំក្រុមមន្ត្រីចុះទៅពិនិត្យយ៉ាងដុតដៃដុតជើងដែលមានរយៈពេល៤ថ្ងៃជាប់ៗគ្នា លោកអភិបាលខេត្តក៏បាននាំយកទឹកស្អាត ថវិកា និងសម្ភារប្រើប្រាស់មួយចំនួន ទៀតទៅចែកជូនដល់អ្នកភូមិដែរ សម្រាប់ប្រើប្រាស់ជាបណ្តោះ អាសន្ន ។
លោកអភិបាលខេត្តថ្លែងថា អាជ្ញាធរនៅមិនទាន់សន្និដ្ឋានឱ្យបានច្បាស់ពីដើមចម ដែលនាំឱ្យអ្នកភូមិធ្លាក់ ខ្លួនឈឺ និងស្លាប់ក្នុងចំនួនគួរឱ្យព្រួយបារម្ភដូច្នេះនៅឡើយទេ ដោយសារមន្ត្រីក្រសួងសុខាភិបាលមិនទាន់បានបង្ហាញលទ្ធផលពីការពិសោធជាផ្លូវការ ។ ប៉ុន្តែភ្លាមៗ អាជ្ញាធរបានប្រាប់អ្នកភូមិឱ្យឈប់ប្រើប្រាស់ទឹកដែលដងពីព្រែកនោះមកប្រើជាបណ្តោះអាសន្នសិន ដោយមិនត្រូវងូត បោកគក់ លាងដៃ និងបរិភោគឡើយ ។
ចែករំលែកព័តមាននេះ