រាជធានីភ្នំពេញ ៖ អ្នកនាំពាក្យគណបក្សប្រជាជនកម្ពុជាលោក សុខឥសានអះអាងថា គណបក្សកាន់អំណាចស្វាគមន៍ចំពោះការចូលរួមប្រកួតប្រជែងរបស់គណបក្សប្រជាធិបតេយ្យមូលដ្ឋាន ។
ការប្រកាសស្វាគមន៍នេះបន្ទាប់ពីគណបក្សមូលដ្ឋានបានប្រកាសចូលរួមប្រកួតប្រជែងការបោះឆ្នោតជ្រើសតាំងអ្នកតំណាងរាស្ត្រអាណត្តិទី៦ ដែលនឹងប្រព្រឹត្តិទៅថ្ងៃទី២៩ ខែកក្កដា ឆ្នាំ២០១៨ខាងមុខនេះ ។
លោកសុខ ឥសានបានឲ្យដឹងនៅថ្ងៃទី៧ ខែឧសភាថា ក្រោយពីបានពិនិត្យពិច្ច័យលើ សភាពការណ៍នយោបាយឃើញថា មានលក្ខណៈល្អគួរឲ្យទុកចិត្តបាន គណបក្សប្រជាធិបតេយ្យមូលដ្ឋានបានសម្រេចចិត្តចូលរួមការបោះឆ្នោតនាខែកក្កដាខាងមុខនេះ ។
លោកបញ្ជាក់ថា «ក្រុមអ្នកនាំពាក្យគណបក្សប្រជាជនកម្ពុជា សូមស្វាគមន៍ និងគោរព សិទ្ធិនយោបាយ និងសិទ្ធិពលរដ្ឋរបស់គណបក្សប្រជាធិបតេយ្យមូលដ្ឋានក្នុងការស ម្រេចចិត្តចូលរួមនេះ ។ ការមានគណបក្សនយោបាយច្រើនប្រកួតប្រជែងក្នុងការបោះឆ្នោត គឺ់ជាជម្រើសសម្រាប់ប្រជាពលរដ្ឋពិនិត្យពិចារណាបោះឆ្នោតគាំទ្រគណបក្ស ណាមួយដែលគួរឲ្យមានក្តីសង្ឃឹម ចំពោះទស្សនវិស័យអនាគតរបស់ប្រទេសជាតិ» ។
ជាមួយគ្នានោះដែរអ្នកនាំពាក្យកាន់អំណាចក៏បានលើកឡើងថា អ្នកដែលរិះគន់ និងរារាំងមិនឲ្យគណបក្សប្រជាធិបតេយ្យមូលដ្ឋានចូលរួមការបោះឆ្នោត គឺជាការរំលោ ភសិទ្ធិរបស់គណបក្សប្រកួតប្រជែង និងរំលោភច្បាប់ស្តីពីការបោះឆ្នោត ។
លោកបន្ថែមថា ក្រុមអ្នកនាំពាក្យគណបក្សប្រជាជនកម្ពុជាសូមអំពាវនាវកុំឲ្យអតីតបក្សប្រឆាំងរារាំង និងឃោសនាថា គណបក្សប្រជាធិបតេយ្យមូលដ្ឋានចូលរួមការបោះឆ្នោត គ្រាន់តែកំដរឆាកឲ្យគណបក្សប្រជាជនកម្ពុជា ។ ការនិយាយដូច្នេះ គឺជាការប្រមាថឆន្ទៈ របស់ប្រជាជនកម្ពជាដែលមិនទាន់បានបោះឆ្នោតផង ហើយមកថា អញ្ចេះអញ្ចុះ តាមការនឹកឃើញរបស់ខ្លួននោះមិនត្រឹមត្រូវឡើយ ។ ដូច្នេះដោយសារខ្លួនមិនបានចូ លរួមគិតតែពីរកគ្រប់វិធី និងឧបាយកលរារាំង ទប់ស្កាត់បក្សដទៃមិនឲ្យបានចូលរួមបោះឆ្នោតដូចខ្លួនដែរនោះមិនកើតទេ ។
សូមជម្រាបថា គណបក្សប្រជាធិបតេយ្យមូលដ្ឋានសម្រេចចិត្តចូលរួមបោះឆ្នោត គណបក្សប្រជាធិបតេយ្យមូលដ្ឋានប្រកាសជំហរនៅថ្ងៃនេះថា ចូលរួមបោះឆ្នោតនៅថ្ងៃទី២៩ ខែកក្កដាខាងមុខនេះ ដោយយោងតាមការសម្រេចរបស់សមាជិក ។ នេះបើតាមការលើកឡើងរបស់លោក យ៉ង សាំងកុមារគណៈកម្មការនាយកគណបក្សប្រជាធិបតេយ្យមូលដ្ឋានបានលើកឡើងនៅក្នុងកិច្ចប្រជុំនៅព្រឹកនេះ នៅស្នាក់ការកណ្តាលដែលស្ថិតនៅក្នុងខណ្ឌសែនសុខ រាជធានីភ្នំពេញ កាលពីថ្ងៃទី៦ ខែឧសភាថា ដោយមានអ្នកចូលរួមពីថ្នាក់ដឹកនាំថ្នាក់ជាតិ និងអ្នកតំណាងខេត្តនៃគណបក្សនេះប្រមាណ១០០នាក់ ថាគណមូលដ្ឋានសម្រេចចូលរួមការបោះឆ្នោតនៅពេលខាងមុខនេះ ។
លោកសម្រេចថា មុនបោះឆ្នោតមានការឡើងថ្លែងជំហររបស់តំណាងខេត្តនីមួយៗ។ តំណាងខេត្តភាគច្រើនដែលថ្លែងបញ្ជាក់ជំហរចង់ចូលរួមដោយសំអាងថា ខ្លួនមាន គោលនយោបាយល្អមានការគាំទ្រពីពលរដ្ឋ និងជាការផ្តល់ជម្រើសថ្មីដល់ប្រជាពលរដ្ឋ ជាដើម ។
លទ្ធផលនៃការបោះឆ្នោតសមាជិកគណៈកម្មាធិការនាយក៣២រូប មានសំឡេងគាំទ្រ៣១ និងមិនគាំទ្រ១ ។ គណបក្សប្រជាធិបតេយ្យមូលដ្ឋានបង្កើតឡើងកាលពីឆ្នាំ២០១៥ ដែលមានស្ថាបនិកពីថ្នាក់ដឹកនាំអង្គការសង្គមស៊ីវិល និងអ្នកស្រាវជ្រាវការអភិវឌ្ឍន៍សង្គមក្នុងនោះក៏មានលោក កែម ឡី ដែរ ។
លោក ឌឹម សុវណ្ណរុំ អ្នកនាំពាក្យ គ.ជ.ប បានឲ្យដឹងថា រហូតដល់ពេលនេះមានគណបក្សចំនួន២ បានបញ្ចប់ការចុះឈ្មោះបោះឆ្នោត និងចុះបញ្ជីបេក្ខជនសម្រាប់ការបោះ ឆ្នោតជ្រើសតាំងតំណាងរាស្ត្រអាណត្តិទី៦ និងមានគណបក្សចំនួន៨ បានយកពាក្យដើម្បីរៀបចំឯកសារតម្កល់លុយ ខណៈដែលគណបក្សជាច្រើនទៀតបានយកបែបបទពីគ.ជ.ប ទៅត្រួតពិនិត្យ និងបំពេញ ។
ចំណែកគណបក្សចំនួន៣បានចុះឈ្មោះបញ្ជីរួចរួមមាន ៖ គណបក្សយុវជនកម្ពុជា, គណបក្សប្រជាជនកម្ពុជា និងគណបក្សសញ្ជាតិកម្ពុជា ។
រហូតមកដល់ពេលនេះគណបក្សនយោបាយចំនួន១៣បានស្នើសុំតម្កល់ប្រាក់មកគ.ជ.ប ដើម្បី ចូលរួមបោះឆ្នោតនៅពេលខាងមុខនេះ ។
សូមជម្រាបថា គណៈកម្មាធិការជាតិរៀបចំការបោះឆ្នោត បានចាប់ផ្តើមការចុះបញ្ជី គណ បក្សនយោបាយឈរឈ្មោះបោះឆ្នោត និងបញ្ជីឈ្មោះបេក្ខជនតំណាងរាស្ត្រសម្រាប់ការ បោះឆ្នោតជ្រើស តាំងតំណាងរាស្ដ្រនីតិកាលទី៦ ឆ្នាំ២០១៨ ក្នុងរយៈពេល១៥ថ្ងៃ ចាប់ពីថ្ងៃទី៣០ ខែមេសា ដល់ថ្ងៃទី១៤ ខែឧសភា ឆ្នាំ២០១៨ ៕
ចែករំលែកព័តមាននេះ