រាជធានីភ្នំពេញ ៖ អ្នកនាំពាក្យគណបក្សប្រជាជនកម្ពុជាលោកសុខ ឥសាន បានអះអាងថា ពលរដ្ឋមានសិទ្ធិពេញលេញក្នុងការសម្រេចជ្រើសរើសអ្នកដឹកនាំខ្លួនតាមរយៈការបោះឆ្នោតមួយសន្លឹក ។ ការលើកឡើងរបស់អ្នកនាំពាក្យនេះស្របពេលដែរលោកសម រង្ស៊ី ដែលកំពុងរស់នៅក្រៅប្រទេសបានធ្វើការរអំពាវនាវជាច្រើនលើកច្រើនសារទៅកាន់អ្នកគាំទ្រកុំឲ្យទៅបោះឆ្នោតនៅពេលខាងមុខនេះ…
រាជធានីភ្នំពេញ ៖ អ្នកនាំពាក្យគណបក្សប្រជាជនកម្ពុជាលោកសុខ ឥសាន បានអះអាងថា ពលរដ្ឋមានសិទ្ធិពេញលេញក្នុងការសម្រេចជ្រើសរើសអ្នកដឹកនាំខ្លួនតាមរយៈការបោះឆ្នោតមួយសន្លឹក ។
ការលើកឡើងរបស់អ្នកនាំពាក្យនេះស្របពេលដែរលោកសម រង្ស៊ី ដែលកំពុងរស់នៅក្រៅប្រទេសបានធ្វើការរអំពាវនាវជាច្រើនលើកច្រើនសារទៅកាន់អ្នកគាំទ្រកុំឲ្យទៅបោះឆ្នោតនៅពេលខាងមុខនេះ ។
ទាក់ទិននឹងការករណីនេះដែរលោកសុខ ឥសានបានបញ្ជាក់ឲ្យដឹងនៅថ្ងៃទី៦ ខែឧសភា នេះថា « នៅក្នុងប្រទេសកម្ពុជា សិទ្ធិសេរីភាពទូទៅត្រូវបានបើកទូលាយ ។ ប្រជាពលរដ្ឋមានសិទ្ធិពេញលេញក្នុងការសម្រេចចិត្តធ្វើអ្វីមួយ ក្នុងក្របខណ្ឌបញ្ញត្តិនៃច្បាប់ » ។
លោកបន្តថា ក្នុងការប្រកួតប្រជែងបោះឆ្នោតក្នុងទីលានប្រជាធិបតេយ្យ គណបក្សនយោបាយនីមួយៗមានសិទ្ធិចូលរួម ឬមិនចូលរួមបោះឆ្នោតស្របទៅតាមលទ្ធភាព សមត្ថភាព និងឆន្ទៈរបស់ខ្លួនដោយគ្មានការបង្ខិតបង្ខំការសម្លុត0 ការគំរាមកំហែងណាមួយឡើយ ។ ដូច្នេះការប្រកាសមិនចូលរួមបោះឆ្នោតរបស់គណបក្សនយោបាយណាមួយនោះ គឺជាសិទ្ធិសម្រេចរបស់គណបក្សនយោបាយនោះ ។ ប៉ុន្តែបើមិនចូលរួម ហើយនិយាយថា ដោយសារគ្មានសិទ្ធិសេរីភាព មានការរំលោភសិទ្ធិមនុស្សនោះ គឺមិនមែនជាហេតុផលទេ វាគ្រាន់តែជាលេសប៉ុណ្ណោះ ។
ស្របពេលសម្រែកពីក្រៅប្រទេសរបស់លោកសម រង្ស៊ីនេះដែរ លោកសុខ ឥសានក៏បានលើកឡើងថា ការដែលគណបក្សនោះមិនចូលរួមបោះឆ្នោតនោះហើយជាសិទ្ធិរបស់គណបក្សនោះ ហេតុម៉េចបានជាថា អត់សិទ្ធិ ។ ព្រោះតែមានសិទ្ធិនេះហើយបានគណបក្សនោះអាចមិនចូលរួមបោះឆ្នោតបាន ។ ដូច្នេះការសម្រេចចិត្តមិនចូលរួមបោះឆ្នោត គឺជាសិទ្ធិមិនចូលរួមរបស់គណបក្សនោះ មិនអាចយកលេសនេះ នោះដាក់កំហុសលើអ្នកដទៃឡើយ ។
ទាក់ទិននឹងការបោះឆ្នោតជ្រើសរើសតាំងសមាជិករដ្ឋសភានេះដែរ លោកសម រង្ស៊ី អតីតប្រធានគណបក្សសង្គ្រោះជាតិ បានសរសេលើបណ្តាញសង្គមថា ការទៅបោះឆ្នោត គឺជាសិទ្ធិរបស់ពលរដ្ឋម្នាក់ៗ ។ តែការមិនទៅបោះឆ្នោតក៏ជាសិទ្ធិរបស់ពលរដ្ឋម្នាក់ៗដែរ ។ មិនមានច្បាប់ណាតម្រូវ ឬបង្ខំឲ្យពលរដ្ឋម្នាក់ៗ ទៅបោះឆ្នោតឡើយ ។ កាលពីបោះឆ្នោតមុនៗម្តងៗមានពលរដ្ឋរាប់លាននាក់ដែលមិនបានទៅបោះឆ្នោត ហើយក៏គ្មាននរណាបានមករករឿងពួកគាត់ដែរ ។
លោកក៏បានសរសេថា សម្តេចតេជោហ៊ុន សែន និងគណបក្សគាត់ជាអ្នកបំផ្លាញការបោះឆ្នោតត្រឹមត្រូវ ក្រោយពីពួកគេបានរំលាយគណបក្សសង្គ្រោះជាតិ ដើម្បីកុំឲ្យគណបក្សនេះ ចូលរួមក្នុងការបោះឆ្នោត ។ ដូច្នេះប្រជាពលរដ្ឋមានសិទ្ធិមិនទទួលយកការបោះឆ្នោតមិនត្រឹមត្រូវ ដោយមិនទៅបោះឆ្នោតតែម្តង ។
លោកបញ្ជាក់ថា«ក្នុងស្ថានភាពបែបនេះ ការមិនទៅបោះឆ្នោតគ្មានអ្វីខុសច្បាប់ទេ ហើយក៏ជាកាយវិការមួយសម្តែងការគាំទ្រចំពោះគណបក្សសង្គ្រោះជាតិ ដោយសារចង់ឃើញគណបក្សនេះដឹកនាំប្រទេស ដើម្បីមានការផ្លាស់ប្តូរជាវិជ្ជមាន ។ ឯការទៅបោះឆ្នោតជាកាយវិការមួយទៀតសម្តែងការគាំទ្រចំពោះគណបក្សប្រជាជនកម្ពុជា ដោយសារចង់ឃើញ គណបក្សនេះកាន់អំណាចតទៅទៀតដូចសព្វថ្ងៃ ឬក៏ជាការគាំទ្រ ចំពោះគណបក្សថ្មីណាមួយហៅថា គណបក្សអំពិលអំពែក ដែលចូលមកប្រកួតជាលេងសើច ដើម្បីបោកបញ្ឆោតប្រជាពលរដ្ឋតាមបំណង សម្តេច តេជោហ៊ុន សែន ដែលចង់ឲ្យយើង ជឿថា ការបោះឆ្នោតក្លែងក្លាយនេះ ជាការបោះឆ្នោតមែនទែន» ។
លោក សុខ ឥសានក៏បានលើកឡើងថា ទស្សនៈរបស់អតីតៈបក្សប្រឆាំងផ្លាស់ប្តូរជាវិជ្ជមានតាមរយៈការអនុវត្តផែនការមហាអំណាចបរទេសក្នុងការផ្តួលរំលំរាជរដ្ឋាភិបាលកម្ពុជាតាមរយៈបដិវត្តន៍ពណ៌យកគម្រូតាមប្រទេសយូហ្គោស្លាវី និងស៊ែបី ។ ផ្លាស់ប្តូរតាមការលោតរំលងលទ្ធិប្រជាធិបតេយ្យ បើដើរតាមលទ្ធិប្រជាធិបតេយ្យពិតជាមិនអាចយកឈ្នះគណបក្សប្រជាជនកម្ពុជាឡើយ
លោកបញ្ជាក់ថា «ដោយសារទស្សនៈរបស់គណបក្សប្រជាជនកម្ពុជា និងការធ្វើស្របតាមបំណងប្រាថ្នារបស់ប្រជាជនកម្ពុជា ទើបបានជាប្រជាជនកម្ពុជាដ៏ច្រើនលើសលុបគាំទ្រការដឹកនាំរបស់គណបក្សប្រជាជនកម្ពុជា
សម្រាប់ការបោះឆ្នោតជ្រើសតាំងអ្នកតំណាងរាស្ត្រនៅពេលខាងមុខនេះដែរមន្ត្រីជាន់ខ្ពស់គណៈកម្មាធិការជាតិរៀបចំការបោះឆ្នោតបានសម្តែងក្តីសង្ឃឹមថា ចំនួនពលរដ្ឋនឹងទៅចូលរួមបោះឆ្នោតលើសពី៥០% នៃចំនួនអ្នកដែលបានចុះឈ្មោះក្នុងបញ្ជីបោះឆ្នោត ៕
ចែករំលែកព័តមាននេះ