រាជធានីភ្នំពេញ ៖ រាជរដ្ឋាភិបាលកម្ពុជា តាមរយៈក្រសួងទេសចរណ៍ និងរដ្ឋបាលខេត្តព្រះសីហនុ គ្រោងនឹងរៀបចំគម្រោងអភិវឌ្ឍន៍តំបន់ទេសចរណ៍នាគរាជនៅខេត្តព្រះសីហនុ ដើម្បីបង្កើនការទាក់ទាញភ្ញៀវទេសចរពីជុំវិញពិភពលោក ចូលមកទស្សនាកម្សាន្ដ និងស្នាក់នៅកាន់តែយូរនៅកម្ពុជា ។…
រាជធានីភ្នំពេញ ៖ រាជរដ្ឋាភិបាលកម្ពុជា តាមរយៈក្រសួងទេសចរណ៍ និងរដ្ឋបាលខេត្តព្រះសីហនុ គ្រោងនឹងរៀបចំគម្រោងអភិវឌ្ឍន៍តំបន់ទេសចរណ៍នាគរាជនៅខេត្តព្រះសីហនុ ដើម្បីបង្កើនការទាក់ទាញភ្ញៀវទេសចរពីជុំវិញពិភពលោក ចូលមកទស្សនាកម្សាន្ដ និងស្នាក់នៅកាន់តែយូរនៅកម្ពុជា ។ ទីតាំងដែលរាជរដ្ឋាភិបាលគ្រោងបង្កើតជាតំបន់អភិវឌ្ឍន៍ទេសចរណ៍នាគរាជនេះ មានទំហំ២.២១១ហិកតា មានទីតាំងនៅភូមិសាស្ត្របឹងកង្កែប និងតំបន់ពយម៉ាចូវ ក្នុងភូមិគគីរ ឃុំបិតត្រាំង ស្រុកព្រៃនប់ ខេត្តព្រះសីហនុ ។
មន្ត្រីជាន់ខ្ពស់ក្រសួងទេសចរណ៍បានមានប្រសាសន៍ក្នុងកិច្ចប្រជុំកាលពីពេលថ្មីៗនេះថា គោលដៅសំខាន់នៃការបង្កើតតំបន់ទេសចរណ៍នាគរាជនេះ ធ្វើឡើងដើម្បីបង្កើនការទាក់ទាញភ្ញៀវទេសចរអន្តរជាតិនានាមកពីជុំវិញពិភពលោក ចូលមកកម្សាន្ដនៅកម្ពុជា ជាពិសេសខេត្តព្រះសីហនុ និងស្នាក់នៅកាន់តែយូរនៅកម្ពុជា ។
លោក ថោង ខុន រដ្ឋមន្ត្រីក្រសួងទេសចរណ៍បានអះអាងថា ៖« ខេត្តព្រះសីហនុ អនាគតនឹងមានភ្ញៀវមកច្រើន និងមានការអភិវឌ្ឍលឿនជាងគេ ដោយហេតុថា ខេត្តព្រះសីហនុមានសក្តានុពលខ្លាំងលើវិស័យទេសចរណ៍ ឧស្សាហកម្ម ពាណិជ្ជកម្ម និងសេវាកម្មផ្សេងៗទៀត » ។
លោកបន្តថា ៖« សម្រាប់ដំណាក់កាលនេះ ក្រុមការងារពិសេសថ្នាក់ក្រសួង និងថ្នាក់ខេត្តព្រះសីហនុ នឹងចុះកំណត់ទីតាំងជាក់ស្តែងដែលគ្រោងអភិវឌ្ឍន៍ជាតំបន់ទេសចរណ៍នាគរាជ ការរស់នៅ កាន់កាប់ដីធ្លីក្នុងតំបន់នោះរបស់ប្រជាជន និងសិក្សាផលប៉ះពាល់បរិស្ថាន និងសង្គម ដើម្បីរកដំណោះស្រាយជូនពួកគាត់ ឱ្យទទួលបានផលប្រយោជន៍ដោយសមធម៌ » ។
លោក ហូ វណ្ឌី ទីប្រឹក្សាសមាគមទីភ្នាក់ងារទេសចរណ៍កម្ពុជា បានថ្លែងថា កម្ពុជាគួរតែមានការវិនិយោគលើរមណីយដ្ឋានកែច្នៃបន្ថែមទៀត ក្រៅពីប្រាសាទអង្គរវត្ត ដែលជាសម្បត្តិបេតិកភណ្ឌពិភពលោក ព្រោះការមានគោលដៅទេសចរណ៍ច្រើន និងមានរមណីយដ្ឋានទេសចរណ៍ច្រើន នឹងទាក់ទាញភ្ញៀវឲ្យស្នាក់នៅបានយូរ និងចំណាយប្រាក់ច្រើននៅទីនេះ ។
លោកបន្តថា ៖« ហេតុនេះ អ្នកវិនិយោគក្នុងស្រុក គួរវិនិយោគលើរមណីយដ្ឋានកែច្នៃឲ្យបានច្រើន ដើម្បីធ្វើពិពិធកម្មផលិតផលទេសចរណ៍កម្ពុជាឲ្យកាន់តែសម្បូរបែប និងទាក់ទាញភ្ញៀវទេសចរឲ្យបានកាន់តែច្រើន » ។
លើកឡើងស្រដៀងគ្នានេះ លោក ធួន ស៊ីណាន ប្រធានសមាគមទេសចរណ៍អាស៊ីប៉ាស៊ីហ្វិក បានថ្លែងថា កម្ពុជាហាក់រង់ចាំស៊ីកេរដូនតា គឺប្រាសាទអង្គរវត្ត ដើម្បីទទួលបានផលប្រយោជន៍ ដោយមិនសូវបានធ្វើអ្វីច្រើនទេ ។ ហេតុនេះ អ្នកវិនិយោគក្នុងស្រុក គួរវិនិយោគលើរមណីយដ្ឋានកែច្នៃឲ្យបានច្រើន និងរៀបចំរមណីយដ្ឋានដែលមានស្រាប់ឡើងវិញឲ្យបានល្អប្រសើរ ទាំងហេដ្ឋារចនាសម្ព័ន្ធ អនាម័យចំណីអាហារ និងបរិស្ថាននៅជុំវិញតំបន់នោះឲ្យមានភាពល្អប្រសើរ ដើម្បីទាក់ទាញអ្នកទេសចរជាតិ និងអន្តរជាតិ ។
លោកបន្តថា ៖« ការរៀបចំរមណីយដ្ឋានកែច្នៃ និងកែលម្អរមណីយដ្ឋានដែលមានស្រាប់ជារឿងចាំបាច់ ដើម្បីធ្វើពិពិធកម្មផលិតផលទេសចរណ៍កម្ពុជា និងកុំឲ្យពួកគេទៅកាន់តែខេត្តសៀមរាប ព្រោះយើងមានតំបន់ឆ្នេរ និងតំបន់អេកូទេសចរណ៍ជាច្រើន ដែលមិនទាន់ទាញយកមកប្រើប្រាស់អស់សក្តានុពលនៅឡើយ »៕
ចែករំលែកព័តមាននេះ