រាជធានីភ្នំពេញ ៖ លោក សុខ ឥសាន អ្នកនាំពាក្យគណបក្សប្រជាជនកម្ពុជា (CPP) បានបញ្ជាក់ថា ព្រះរាជាណាចក្រកម្ពុជា គឺអនុវត្តរបបនយោបាយប្រជាធិបតេយ្យសេរីពហុបក្ស ដែលប្រជាពលរដ្ឋកម្ពុជាមានសិទ្ធិនយោបាយយ៉ាងទូលំទូលាយ និងស្មើភាពគ្នាចំពោះមុខច្បាប់ ។ ដូច្នេះការបង្កើតគណបក្សនយោបាយ ដើម្បីចូលរួមលើកកម្ពស់លទ្ធិប្រជាធិបតេយ្យនៅកម្ពុជា គឺជាសិទ្ធិសេរីភាពរបស់ពលរដ្ឋគ្រប់រូប ។
អ្នកនាំពាក្យគណបក្សកាន់អំណាចរូបនេះមានប្រសាសន៍បន្តថា៖ «ការនិយាយថា បណ្តាគណបក្សនយោបាយដែលត្រូវបានបង្កើតឡើង គឺជាអាយ៉ងរបស់គណបក្សកាន់អំណាច ឬដោយការគាបសង្កត់ណាមួយ ឬដោយសារក្រោមឥទ្ធិពលពីខាងណាមួយ គឺជាការរំលោភរដ្ឋធម្មនុញ្ញ គឺជាការប្រមាថលើសិទ្ធិនយោបាយរបស់ពលរដ្ឋ និងជាការប្រមាថដល់លទ្ធិប្រជាធិបតេយ្យនៅកម្ពុជាយ៉ាងជាក់ស្តែង។ ការនិយាយថា គណបក្សនយោបាយដែលត្រូវបានបង្កើតឡើង គឺជាអាយ៉ងរបស់គណបក្សប្រជាជនកម្ពុជា និងគ្រាន់តែជាការប្រថាប់ត្រាឲ្យគណបក្សកាន់អំណាចបន្តកាន់អំណាច គឺជាវប្បធម៌លាបពណ៌ ដែលពួកអតីតបក្សប្រឆាំងតែងតែប្រើកន្លងមកតែប៉ុណ្ណោះ» ។
លោក សម រង្ស៊ី ប្រធានចលនាសង្គ្រោះជាតិ និងជាអតីតមេបក្សប្រឆាំង កាលពីថ្ងៃទី ២៩ ខែមេសា បានផ្សព្វផ្សាយនូវខិត្តប័ណ្ណ ក្នុងគោលបំណងរារាំងអ្នកបោះឆ្នោតកុំឲ្យទៅបោះឆ្នោតនៅថ្ងៃទី២៩ ខែ កក្កដា ឆ្នាំ២០១៨ ខាងមុខនេះ ហើយបានសរសេរសារចោទប្រកាន់ថា៖ «នរណាខ្លាចជាប់គុក ឬចង់រួចពីគុក សូមបង្កើតគណបក្សថ្មីឲ្យឆាប់ ដើម្បីចូលរួមជាឡប់ឡែ ក្នុងការបោះឆ្នោតក្លែងក្លាយ រៀបចំដោយ ហ៊ុន សែន ថ្ងៃ ២៩ កក្កដា ២០១៨» ។
ទោះបីជាយ៉ាងណាក៏ដោយ ប្រមុខដឹកនាំរាជរដ្ឋាភិបាលកម្ពុជា ក៏ដូចជាគណៈកម្មាធិការជាតិរៀបចំការបោះឆ្នោត (គ.ជ.ប) បានបញ្ជាក់ថា ការបោះឆ្នោតគ្មានការពន្យាពេលនោះទេ ហើយ គ.ជ.ប បាននិងកំពុងទទួលពាក្យពីបណ្តាគណបក្សនយោបាយដែលចង់ប្រកួតប្រជែងក្នុងការបោះឆ្នោតដណ្តើមអាសន្នៈ១២៥ កៅអីនៅរដ្ឋសភា ដើម្បីចុះឈ្មោះបេក្ខជនដែលឈរឈ្មោះបោះឆ្នោត ចាប់ពីថ្ងៃទី ៣០ ខែមេសា ដល់ថ្ងៃទី ១៤ ខែឧសភា ឆ្នាំ២០១៨ ៕
ចែករំលែកព័តមាននេះ