ខេត្តមណ្ឌលគិរី ៖ អាជ្ញាធរខេត្តមណ្ឌលគិរីជម្រុញដល់កសិករចដាំដុះគ្រាប់ពូជដំណាំដែលមន្ត្រីនៃមន្ទីរកសិកម្មរុក្ខាប្រមាញ់ និងនេសាទខេត្តចែកជូន ត្រូវដាំដុះឲ្យទាន់ពេលវេលា ជៀសវាងទុកដីទំនេរចោល ។ លោក ស្វាយ សំអ៊ាង…
ខេត្តមណ្ឌលគិរី ៖ អាជ្ញាធរខេត្តមណ្ឌលគិរីជម្រុញដល់កសិករចដាំដុះគ្រាប់ពូជដំណាំដែលមន្ត្រីនៃមន្ទីរកសិកម្មរុក្ខាប្រមាញ់ និងនេសាទខេត្តចែកជូន ត្រូវដាំដុះឲ្យទាន់ពេលវេលា ជៀសវាងទុកដីទំនេរចោល ។
លោក ស្វាយ សំអ៊ាង អភិបាលខេត្តបានបញ្ជាក់ថា បច្ចុប្បន្ននេះ ក្រោមការដឹកនាំរបស់ប្រមុខរាជរដ្ឋាភិបាលកម្ពុជាដែលមានសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានធ្វើឲ្យប្រជាពលរដ្ឋទូទៅ មានសុខសន្តិភាព និងមានការអភិវឌ្ឍន៍រីកចម្រើនលើគ្រប់វិស័យ រួមមានបញ្ហាហេដ្ឋារចនាសម្ព័ន្ធទឹក ភ្លើង និងធនធានមនុស្ស ។
ដូច្នេះរាជរដ្ឋាភិបាលកម្ពុជាក៏ដូចជា ក្រសួងកសិកម្មរុក្ខាប្រម៉ាញ់ និងនេសាទបានយកចិត្តទុកដាក់ជម្រុញ និងលើកកម្ពស់វិស័យកសិកម្មដែលជាវិស័យបង្កើតនូវចំណូលសេដ្ឋកិច្ចជាតិ និងបង្កើនកម្រិតជីវភាពរស់នៅរបស់ប្រជាពលរដ្ឋគ្រប់ទីកន្លែង ។ ជាមួយគ្នានេះដែរអភិបាលខេត្តបានជម្រុញបន្ថែមដល់ប្រជាកសិករទាំងអស់ដែលមានផ្ទៃដីដាំដុះត្រូវខិតខំដាំដុះដំណាំផ្សេងៗ រួមទាំងគ្រាប់ពូជដំណាំដែលមន្ទីរកសិកម្មផ្តល់ឲ្យទាំងអស់នេះ ទៅដាំដុះឲ្យទាន់ពេលវេលា ដើម្បីជៀសវាងទុកដីទំនេរចោល ។
ម្យ៉ាងទៀតគ្រាប់ពូជដំណាំទាំងនេះត្រូវយកទៅដាំដុះតាមបច្ចេកទេសដែលមន្ត្រីជំនាញនៃមន្ទីរកសិកម្មរុក្ខាប្រមាញ់ និងនេសាទខេត្ត បានធ្វើការណែនាំ ដើម្បីទទួលបានទិន្នផលល្អព្រោះ ផ្ទៃដីដាំដុះនៅក្នុងស្រុកពេជ្រាដា គឺសំបូរទៅដោយជីវជាតិ ដែលអាចធ្វើឲ្យប្រជាកសិករដាំដុះដំណាំគ្រប់ប្រភេទបានល្អផងដែរ ។ ក្រៅពីដំណាំបន្លែប្រជាពលរដ្ឋទាំងអស់ក៏ត្រូវខិតខំចិញ្ចឹមសត្វ និងដាំដំណាំរួមផ្សំផ្សេងៗបន្ថែមទៀត ដើម្បីចៀសវាងការចំណាយថវិកាទៅទិញបន្លែដែលបាននាំចូលមកពីប្រទេសជិតខាង ។
តាមការលើកឡើងរបស់ប្រធានមន្ទីរកសិកម្ម រុក្ខាប្រមាញ់ និងនេសាទខេត្តមណ្ឌលគិរី លោកសុង ឃាង បានឲ្យដឹងថា កាលពីថ្ងៃទី២៧ ខែមេសា ឆ្នាំ២០១៨ មន្ទីរបានចែកគ្រាប់ពូជដំណាំជូនដល់ប្រជាកសិកររួមមាន ៖ គ្រាប់ពូជសណ្ដែកបាយចំនួន២១៨គីឡូក្រាម គ្រាប់ពូជដំណាំពោតចំនួន១០៩គីឡូក្រាម ពូជបន្លែ និងឯកសារបច្ចេកទេសកសិកម្មមួយចំនួនទៀតចែកជូនដល់ប្រជាកសិករសរុបចំនួន១០៩គ្រួសារ នៅឃុំពូជ្រៃ ស្រុកពេជ្រាដា ខេត្តមណ្ឌលគិរី ដោយក្នុង០១គ្រួសារ ទទួលបានពូជសណ្ដែកបាយចំនួន០២គីឡូក្រាម និងគ្រាប់ពូជដំណាំពោតចំនួន០១គីឡូក្រាមផងដែរ ។
លោកបានបន្ថែមថា នៅពេលដែលប្រជាកសិករបានទទួលផល ត្រូវយកគ្រាប់ពូជដំណាំទាំងនេះទៅចែកបន្តដល់ប្រជាកសិករផ្សេងទៀត ដែលពួកគាត់មិនបានទទួល ដើម្បីធ្វើយ៉ាងណាឲ្យប្រជាកសិករដទៃទៀតបានដាំដុះនូវគ្រាប់ពូជដំណាំទាំងនេះក្នុងការពង្រីកផ្ទៃដីដាំដុះឲ្យបានច្រើន ៕
ចែករំលែកព័តមាននេះ