Startupកម្ពុជាមានឱកាសបង្ហាញសមត្ថភាពលើឆាកអន្តរជាតិ
- ភ្នំពេញ
រាជធានីភ្នំពេញ ៖ ក្រុមអ្នកបង្កើតអាជីវកម្មថ្មី(Startups)ដែលទទួលបានជ័យលាភីពីការប្រកួតប្រជែងក្នុងកម្មវិធី «Echelon Trip for Cambodian Startups and Policy…
រាជធានីភ្នំពេញ ៖ ក្រុមអ្នកបង្កើតអាជីវកម្មថ្មី(Startups)ដែលទទួលបានជ័យលាភីពីការប្រកួតប្រជែងក្នុងកម្មវិធី «Echelon Trip for Cambodian Startups and Policy…
រាជធានីភ្នំពេញ ៖ ក្រុមអ្នកបង្កើតអាជីវកម្មថ្មី(Startups)ដែលទទួលបានជ័យលាភីពីការប្រកួតប្រជែងក្នុងកម្មវិធី «Echelon Trip for Cambodian Startups and Policy Maker» ដែលបានបើកដំណើរការកាលពីថ្ងៃទី២៥ មេសា ត្រូវបានជ្រើសរើសឲ្យចូលក្នុងវគ្គបណ្ដុះបណ្ដាលបន្ថែម ក៏ដូចជាចូលរួមតាំងបង្ហាញផលិតផលសក្ដានុពលរបស់ខ្លួនជាមួយបណ្ដាStartupចំនួន១០០ មកពីបណ្ដាប្រទេសនៅក្នុងតំបន់អាស៊ីប៉ាស៊ីហ្វិក ក្នុងកម្មវិធី «Echelon Asia Summit 2018» នៅប្រទេសសិង្ហបុរី នាអំឡុងខែមិថុនា ខាងមុខ ។ នេះបើយោងតាមសេចក្ដីជូនព័ត៌មានពីក្រសួងប្រៃសណីយ៍ និងទូរគមនាគមន៍ ។
សេចក្ដីជូនព័ត៌មានដដែលបានឲ្យដឹងថា នេះជាលើកទី១ហើយដែលStartupsរបស់កម្ពុជាចំនួន៥ មានឱកាសបង្ហាញសមត្ថភាពរបស់ខ្លួនលើឆាកអន្តរជាតិ ដែលជាកាលានុវត្តភាពរបស់ពួកគេក្នុងការទាក់ទាញវិនិយោគិនអន្តរជាតិ និងក្រុមហ៊ុនធំៗដើម្បីសហការ ក៏ដូចជាស្វែងរកប្រភពទុនសម្រាប់ដំណើរការអាជីវកម្មរបស់ខ្លួន។
រដ្ឋលេខាធិការក្រសួងប្រៃសណីយ៍ និងទូរគមនាគមន៍ លោកបណ្ឌិត កាន ច័ន្ទមេត្តា ត្រូវបានស្រង់សម្ដីថា ដោយមានកិច្ចសហការរវាងវិទ្យាស្ថានNIPTICT ក្រោមការឧបត្ថម្ភរបស់មូលនិធិនៃការកសាងសមត្ថភាព និងការស្រាវជ្រាវនិងការអភិវឌ្ឍវិស័យទូរគមនាគមន៍ បច្ចេកវិទ្យាគមនាគមន៍និងព័ត៌មាន ឬហៅកាត់ថា មូលនិធិ ស.អ នៃក្រសួងប្រៃសណីយ៍ និងទូរគមនាគមន៍ និងក្រុមហ៊ុនជាដៃគូនានា បានរៀបចំកម្មវិធីនេះឡើង ក្នុងគោលបំណងជ្រើសរើសអាជីវកម្មថ្មីនៅក្នុងប្រទេសកម្ពុជា ដើម្បីចូលរួមជាមួយអាជីវកម្មឈានមុខជាងគេទាំង១០០ ដែលបានជ្រើសរើសចេញពីប្រទេសចំនួន២១ ក្នុងតំបន់អាស៊ី ។
លោកថ្លែងថា ៖« ក្រសួងតែងឧបត្ថម្ភនិងគាំទ្រដើម្បីបង្កើត និងពង្រីកឱកាសដល់អាជីវកម្មក្នុងស្រុកឈានចូលទៅថ្នាក់តំបន់ និងពិភពលោក ព្រមទាំងដើម្បីបង្ហាញនូវសក្តានុពលនៃឧស្សាហកម្ម ទូរគមនាគមន៍ បច្ចេកវិទ្យាគមនាគមន៍ និងព័ត៌មាន » ។
លោកបណ្ឌិតបន្ដថា ៖« យើងចង់បង្កើតនូវ បរិយាកាសអំណោយផលអាជីវកម្មក្នុងស្រុក ដោយជំរុញការបង្កើតថ្មី ការប្រកួតប្រជែង និងការបង្កើតបណ្តាញទំនាក់ទំនងទៅក្នុងទីផ្សារផ្នែកបច្ចេកវិទ្យាដ៏ទូលំទូលាយនៅក្រៅ
ប្រទេស » ។
លោកបណ្ឌិតបញ្ជាក់ថា Startupដែលទទួលបានជ័យលាភីទាំង៥ ដែលត្រូវបានជ្រើសរើសឱ្យចូលរួមក្នុងវគ្គបណ្តុះបណ្តាលបន្ថែម និងការតាំងពិព័រណ៍ផលិតផលរបស់ខ្លួននៅលើឆាកអន្តរជាតិនេះ រួមមាន BookMeBus, Camboticket, Demine Robotics, SPARE និង Goama នឹងត្រូវបង្ហាញផលិតផលរបស់ខ្លួន ដែលបានបង្កើតឡើង ដើម្បីទាក់ទាញការវិនិយោគពីក្រុមហ៊ុនអន្តរជាតិ ក៏ដូចជាបង្កើតកិច្ចសហការដើម្បីដំណើរការអាជីវកម្មរបស់ពួកគេ ។
សូមបញ្ជាក់ថា កម្មវិធី «Echelon Asia Summit 2018» គឺជាកម្មវិធីពិព័រណ៍លំដាប់ថ្នាក់អន្តរជាតិសម្រាប់តំបន់អាស៊ីប៉ាស៊ីហ្វិកដែល ប្រព្រឹត្តទៅនៅចុងខែមិថុនា នៅសិង្ហបុរី។ កម្ម វិធីនេះនឹងមានការចូលរួមពីសំណាក់Starupមានសក្តានុពលមកពីប្រទេសផ្សេងៗក្នុងតំបន់ ដែលផ្តល់ឱកាសដល់ពួកគេបង្កើតទំនាក់ទំនងជាមួយអ្នកវិនិយោគ ក្រុមហ៊ុន និងសហគ្រាសធំៗ ដើម្បីបង្កើតបណ្តាញ និងស្វែងរកទុនសម្រាប់ការពង្រីកអាជីវកម្មរបស់ខ្លួន ។ កម្មវិធីនេះ ក៏មានការជួបពិភាក្សា និងផ្លាស់ប្តូរយោបល់គ្នាពីសំណាក់អ្នករៀបចំគោលនយោបាយសម្រាប់ប្រទេសនីមួយៗនៅក្នុងតំបន់លើគោលការណ៍ក្នុងការជួយគាំទ្រStartupsផងដែរ៕
ចែករំលែកព័តមាននេះ