ខេត្តសៀមរាប ៖ បើតាមការស្រាវជ្រាវរបស់អ្នកបុរាណវិទ្យារកឃើញថា កំណាត់ផ្លូវជាតិលេខ៦ ពីបាគងទៅទីប្រជុំជនកំពង់ក្តី គឺរត់លើកំណាត់ផ្លូវបុរាណពីសម័យអង្គរនេះមានស្ពានបុរាណចំនួន២១ ក៏ប៉ុន្តែបច្ចុប្បន្នស្ពានបុរាណចំនួន១០ខូចបាត់រូបរាង ហើយមាននៅ សល់តែស្ពានចំនួន១១ប៉ុណ្ណោះ ដែលអាចនៅប្រើប្រាស់បាន ។
ការខូចខាតបាត់បង់ស្ពាននេះក៏ព្រោះតែកត្តាពេលវេលា ការខ្វះខាតកិច្ចការគាំពារនាពេលប្រទេសស្ថិតក្នុងស្ថានប្រទាញប្រទង់ដោយសារសង្គ្រាមស៊ីវិល ហើយស្ពានដែលមាននៅសល់ទាំង១១នោះមានដូចជា ស្ពានអូរចិញ្ជៀន ស្ពានតូច ស្ពានថ្មបាយក្រៀម ស្ពានថ្ម ស្ពានតាមាស ស្ពានភូមិអូរ ស្ពានថ្នល់ដាច់ ស្ពានស្វាយ ស្ពានបឹងអំពិល ស្ពានខ្ពស់ និងស្ពានព្រះទិស ។
កន្លងមកស្ពានបុរាណទាំង១១នេះ មានការទ្រុឌទ្រោមខ្លាំង ទើបនៅឆ្នាំ២០១៣ នៅពេលជួសជុលផ្លូវជាតិលេខ៦ឡើងវិញ ទើបអាជ្ញាធរជាតិអប្សរាបានស្នើសុំក្រសួងសាធារណការ និងដឹកជញ្ជូន និងក្រុមហ៊ុនចិនដែលទទួលម៉ៅការធ្វើផ្លូវវាងស្ពានបុរាណទាំងនោះ ដើម្បីថែរក្សា អភិរក្សស្ពានទាំងនោះឱ្យបានគង់វង្សតកូនចៅ និងសម្រាប់បម្រើវិស័យទេសចរណ៍ផងដែរ ។
ក្នុងន័យថែរក្សា និងលើកតម្លៃស្ពានបុរាណទាំងនោះ នាយកដ្ឋានអភិរក្សប្រាសាទក្រៅឧទ្យានអង្គរនៃអាជ្ញាធរជាតិអប្សរា បានយកចិត្តដាក់ថែទាំ និងលើកតម្លៃស្ពានបុរាណ ដូចជា ស្ពានព្រះទិស ដោយដាក់ឱ្យមានភ្នាក់អភិរក្សចំនួន៤នាក់ បំពេញការងារជាអចិន្ត្រៃយ៍ បានកសាងរោងឆ្មាំ១ខ្នង បង្គន់អនាម័យ១ខ្នង មាន៤បន្ទប់ សម្រាប់បម្រើទេសចរ ។
ដោយឡែកស្ពានបុរាណចំនួន១០ទៀត បានដាក់ស្លាកឈ្មោះស្ពានបុរាណតាមស្ពាន នីមួយៗ ដើម្បីឱ្យភ្ញៀវទេសចរបានស្គាល់ ព្រមទាំងសម្អាតជារៀងរាល់ខែ រួមមាន៖ ការកាប់ឆ្ការរុក្ខជាតិតូចធំ រើសសំរាមជុំវិញស្ពាន និងមើលស្ថានភាពស្ពានជាដើម ៕
ចែករំលែកព័តមាននេះ