រាជធានីភ្នំពេញ ៖ សន្តិសុខក្រុមហ៊ុនឯកជនដែលយាមនៅក្នុងក្រុមហ៊ុន លី ហួរ ពីរនាក់បានឈ្លោះប្រកែកគ្នារហូតឈានទៅដល់ការវាយតប់គ្នាផ្អើលដល់សមត្ថកិច្ចមូលដ្ឋានចុះមកអន្តរាគមន៍ ហេតុការណ៍នេះកើតឡើងកាលពីវេលាម៉ោង១១និង១០នាទីយប់ ថ្ងៃទី២២ ខែមេសា ឆ្នាំ២០១៨ ត្រង់ចំណុចក្នុងក្រុមហ៊ុន លី ហួរ តាមបណ្តោយផ្លូវ៥៩៨ ស្ថិតក្នុងសង្កាត់ទួលសង្កែទី២ ខណ្ឌឬស្សីកែវ ។
ជនបង្កមានឈ្មោះ យៃ សុខដឿន ភេទប្រុស អាយុ៣១ឆ្នាំ ជាសន្តិសុខឯកជនក្រុមហ៊ុនមួយ ស្នាក់នៅសង្កាត់ទឹកល្អក់ទី១ ខណ្ឌទួលគោក មានស្រុកកំណើតនៅស្រុកមេមត់ ខេត្តត្បូងឃ្មុំ ។ ចំណែកឯរងគ្រោះមានឈ្មោះកង វុទ្ធី ភេទប្រុស អាយុ២៧ឆ្នាំ ជាសន្តិសុខឯកជនក្រុមហ៊ុនដូចគ្នាស្នាក់នៅកន្លែងកើតហេតុ ។
តាមប្រភពព័ត៌មានពីកន្លែងកើតហេតុបានឱ្យដឹងថា នៅមុនពេលកើតហេតុជនរងគ្រោះ និងជនបង្កខាងលើរួមទាំងសន្តិសុខប៉ុន្មាននាក់ទៀតបានធ្វើការយាមកាមនៅក្រុមហ៊ុន លី ហួរ ខាងលើជាធម្មតា ។ លុះដល់វេលាកើតហេតុស្រាប់តែជនរងគ្រោះបានទៅដេកនៅលើប៉ៅអ៊ីនៅជាប់ទ្វារចក្រចូលក្រុមហ៊ុន លី ហួរ ខាងលើ ខណៈដែលជនបង្កមកពីដើរល្បាតវិញឃើញជនរងគ្រោះកំពុងដេក ។ ជនបង្កក៏បានទៅដាស់ និងស្តីឲ្យជនរងគ្រោះតែពេលនោះជនរងគ្រោះក៏បានងើបរួចហើយក៏ដេកទៅវិញបន្ទាប់មកជនបង្កក៏វាយជនរងគ្រោះមួយដៃចំភ្នែកខាងស្តាំទើបបង្កឲ្យជនរងគ្រោះខឹងក៏វាយតបតទៅវិញទៅមកបណ្តាលឱ្យជនបង្ករងរបួសខៀវភ្នែកខាងឆ្វេង ចំណែកឯជនរងគ្រោះរងរបួសខៀវភ្នែកខាងស្តាំបន្ទាប់មកក៏ឃើញមានសមត្ថកិច្ចមូលដ្ឋានចុះទៅអន្តរាគមន៍ភ្លាមៗ ។
បើតាមសម្តីពីជនបង្កបានឲ្យដឹងថា នៅមុនពេលកើតហេតុគាត់បានធ្វើការដើរល្បាតក្នុងក្រុមហ៊ុន លី ហួរ ខាងលើលុះដល់វេលាកើតហេតុក៏មានរថយន្តបើកចូលមកក្នុងក្រុមហ៊ុនតែមិនឃើញជនរងគ្រោះបើកទ្វារឱ្យរថយន្តចូលនោះទេ ។ បន្ទាប់មកគាត់ក៏រត់ទៅបើកទ្វារឲ្យរថយន្តចូលមកក្នុងក្រុមហ៊ុនហើយក៏ឃើញជនរងគ្រោះកំពុងដេកនៅលើប៉ៅអីជិតទ្វារពេលនោះគាត់ក៏បានដើរទៅដាស់ប្រាប់មិនឲ្យដេកនៅក្នុងម៉ោងការងារស្រាប់តែជនរងគ្រោះងើបមកហើយក៏ដេកទៅវិញដោយមិនស្តាប់គាត់នោះទេ ធ្វើឲ្យគាត់ខឹង និងជនរងគ្រោះហើយក៏វាយមួយដៃទើបបណ្តាលឲ្យមានកើតជាករណីហិង្សាវាយតបគ្នាតែម្តងទៅ ។
បើតាមសម្តីពីជនរងគ្រោះបានឲ្យដឹងថា នៅមុនពេលកើតហេតុគាត់ដើរល្បាតនៅក្នុងក្រុមហ៊ុនខាងលើ ហើយដោយគាត់អស់កម្លាំងពេកព្រោះគាត់ធ្វើការជាសន្តិសុខយាមពីរកន្លែងហើយគាត់ក៏បានសង្ងំដេកមួយសន្ធុះទៅ ។ បន្ទាប់មកស្រាប់តែជនបង្កដើរមកហើយវាយគាត់មួយដៃរួចគាត់ក៏វាយតបតទៅវិញតែម្តងទៅ ។ ជនរងគ្រោះបន្តថា ពីមុនជនបង្កក៏ធ្លាប់ប្រើអំពើហិង្សាដាក់មកលើរូបគាត់ពីរបីដងរួចមកហើយតែគាត់មិនតបតទៅវិញនោះទេ រហូតមកវេលាកើតហេតុដោយគាត់ទ្រាំលែងបានក៏វាយតបតទៅម្តងទៅ ៕
ចែករំលែកព័តមាននេះ