រាជធានីភ្នំពេញ ៖ កម្លាំងមានសម្ថកិច្ចបង្ក្រាបល្បែងស៊ីសងប្រភេទហ្គេមបាញ់ត្រីទ្រង់ទ្រាយធំនៅផ្សារសុរិយាម៉ល ឃាត់ខ្លួនមនុស្សជាង៧០នាក់ និងដកហូតទូរហ្គេមបានចំនួន៨៤ទូ ។ លោក សៀង សុខ ព្រះរាជអាជ្ញារងអមសាលាដំបូងរាជធានីភ្នំពេញ ដោយមានការសហការណ៍អំពីសំណាក់ លោក ប៊ុន សត្យា ប្រធានការិយាល័យនគរបាលព្រហ្មទណ្ឌកំរិតស្រាល នៃស្នងការនគរបាលរាជធានីភ្នំពេញ បានចុះបង្ក្រាបល្បែងស៊ីសងខុសច្បាប់ប្រភេទហ្គេមបាញ់ត្រីដែលមានទ្រង់ទ្រាយធំមួយដោយបានធ្វើឡើងទៅលើទីតាំងចំនួន៣ទីតាំង ដោយបានធ្វើការឃាត់ខ្លូនមនុស្សប្រុសស្រីចំនួន៧១នាក់ និងដកហូតទូរហ្គេមរហូតទៅដល់ចំនួន៨៤ទូផងដែរ ។
ប្រតិបត្តិការណ៍នេះដែរ បានធ្វើឡើងកាលពីវេលាម៉ោង០៤និង៣០នាទីល្ងាច ថ្ងៃទី២០ ខែមេសា ឆ្នាំ២០១៨ ទៅតាមទីតាំងហ្គេមបាញ់ត្រីចំនួន៣ទីតាំង ក្នុងផ្សារសុរិយាម៉ល ដែលស្ថិតនៅតាមបណ្តោយផ្លូវលេខ១៧២ ក្នុងសង្កាត់ផ្សារថ្មីទី៣ ខណ្ឌដូនពេញ ។
តាមប្រភពព័ត៌មានពីសម្ថកិច្ចបានប្រាប់ឱ្យដឹងថា ក្នុងថ្ងៃនេះដែរ ក្រោមការដឹកនាំ និងដឹកនាំដោយផ្ទាល់អំពីសំណាក់លោក សៀង សុខ ព្រះរាជអាជ្ញារងអមសាលាដំបូងរាជធានីភ្នំពេញ ធ្វើការសហការណ៍ជាមួយនិងកម្លាំងនគរបាលការិយាល័យព្រហ្មទណ្ឌកំរិតស្រាល ដែលដឹកនាំដោយ លោក ប៊ុន សត្យា ជាប្រធានបានចុះធ្វើការបង្ក្រាបជាក់ស្តែងនូវប្រភេទហ្គេមបាញ់ត្រីដែលជាល្បែងស៊ីសងខុសច្បាប់ចំនួន៣ទីតាំងនៅផ្សារសុរិយាម៉លនេះ ។
ក្នុងប្រតិបត្តិការណ៍បង្ក្រាបល្បែងស៊ីសងប្រភេទហ្គេមបាញ់ត្រីដ៏ធំនេះដែរ កម្លាំងរបស់លោកបានធ្វើកាតឃាត់ខ្លួនមនុស្សប្រុសស្រីចំនួន៧១នាក់ក្នុងនោះក៏មានមេកា ប្រុសស្រីចំនួន៤នាក់ក៏ត្រូវវាយខ្នោះផងដែរ ។ តាមប្រភពដដែលបានប្រាប់បន្តទៀតថា ក្រៅពីធ្វើការឃាត់ខ្លួនទាំងអ្នកលេង និងមេកាទាំង៧១នាក់នេះ កម្លាំងមានសម្ថកិច្ចរបស់លោកក៏បានធ្វើការដកហូតទូហ្គេមបាញ់ត្រីចំនួន៥៨ទូ និងទូបៀចំនួន២៦ទូ សរុបទាំងអស់មានរហូតទៅដល់ចំនួន៨៤ទូឯណ្ណោះ និងម៉ូតូចំនួនជាង១០គ្រឿងផងដែរ ។ ក្រោយពីប្រតិបត្តិការណ៍បង្ក្រាបហ្គេមបាញ់ត្រីខុសច្បាប់ទាំង៣ទីតាំងខាងលើរួចមក មនុស្សប្រុសស្រីចំនួន៧១នាក់ ទូហ្គេមបាញ់ត្រីចំនួន៥៨ទូ និងទូហ្គេបបៀចំនួន២៦ទូ សរុបមានចំនួន៨៤ទូ និងម៉ូតូចំនួនជាង ១០គ្រឿងនោះ បានបញ្ជូនយកទៅកាន់ការិយាល័យនគរបាលព្រហ្មទណ្ឌកំរិតស្រាលរាជធានីភ្នំពេញ ដើម្បីចាត់ការទៅតាមនីតិវិធីជាបន្តទៅទៀត ចំណែកឯទីតាំងទាំង៣កន្លែងនោះ ក៏ត្រូវបានបិទផងដែរ ៕
ចែករំលែកព័តមាននេះ