ខេត្តកំពង់ធំ ៖ គោយន្តបើកៗរបូតខ្ចៅធ្លាក់ម៉ាស៊ីនបុកម៉ូតូរបួសធ្ងន់បាក់ជើងទាំងពីរនាក់ ឧប្បត្តិហេតុនេះបានកើតឡើងកាលពីព្រឹកថ្ងៃទី១១ ខែមេសា ឆ្នាំ២០១៨ ស្ថិតនៅលើផ្លូវ៥០C ដែលជាផ្លូវកាត់ពីខេត្តកំពង់ធំ ទៅកាន់ខេត្តកំពង់ឆ្នាំង ស្ថិតក្នុងភូមិស្រយ៉ូវត្បូង សង្កាត់ស្រយ៉ូវ ក្រុងស្ទឹងសែន ខេត្តកំពង់ធំ ។
លោកវរសេនីយ៍ឯក ញ៉ែម ឈុនលី អធិការនគរបាលក្រុងស្ទឹងសែនប្រាប់ថា ករណីគ្រោះថ្នាក់ចរាចរណ៍ខាងលើនេះបង្កឡើងដោយគោយន្ដកន្ត្រៃយ៍នៅក្នុងទិសដៅបញ្ច្រាសទិសគ្នា ខណៈគោយន្តកំពុងតែបើកបរក៏របូតខ្ចៅប៊ូឡុងរ៉េទៅបុកម៉ូតូមួយគ្រឿងម៉ាកហុងដា C100 វេវអាល់ហ្វា ពណ៌ខ្មៅ ពាក់ស្លាកលេខ កំពង់ចាម 1E-7649 បើកបរដោយឈ្មោះ ជា អេន ភេទប្រុស អាយុ៤២ឆ្នាំ រស់នៅភូមិអណ្តូងច្រុះ ឃុំរលាប្អៀរ ស្រុកកំពង់ឆ្នាំង ខេត្តកំពង់ឆ្នាំង របួសធ្ងន់បាក់ជើងឆ្វេង (មិនពាក់មួកសុវត្ថិភាព) និងអ្នករួមដំណើរឈ្មោះអ៊ុន ហ៊ាន ភេទស្រី អាយុ៥៦ឆ្នាំ (ធ្វើស្រែ) រស់នៅភូមិឃុំជាមួយគ្នារបួសធ្ងន់បាក់ជើងឆ្វេងដូចគ្នា (មិនពាក់មួកសុវត្ថិភាព) ។
អ្នកបើកបរគោយន្ដកន្ត្រៃយ៍ត្រូវបានគេស្គាល់ឈ្មោះ សិត ដែន ភេទប្រុស អាយុ១៨ឆ្នាំ នៅភូមិស្រយ៉ូវត្បូង សង្កាត់ស្រយ៉ូវ ក្រុងស្ទឹងសែន បានរត់គេចខ្លួនបាត់បន្ទាប់ពីបង្កហេតុរួច ។
មូលហេតុជាបឋមបង្កឡើងដោយគោយន្ដកន្ត្រៃយ៍កំពុងបើកបររបូតខ្ចៅម៉ាស៊ីន ហើយរេចង្កូតទៅបុកម៉ូតូដែលកំពុងចរាចរណ៍ក្នុងគន្លងផ្លូវបញ្ច្រាសទិសគ្នា វត្ថុតាងត្រូវបាននាំយកទៅរក្សាទុកនៅប៉ុស្តិ៍រដ្ឋបាលស្រយ៉ូវដើម្បីចាត់ការតាមច្បាប់ ៕
ចែករំលែកព័តមាននេះ