ខេត្តកំពង់ធំ ៖ នៅវេលាម៉ោង១១ និង៣០នាទីយប់ ថ្ងៃទី០៩ ខែមេសា ឆ្នាំ២០១៨ មានបុរសវ័យចំណាស់ម្នាក់បានដេកស្លាប់នៅក្នុងផ្ទះរបស់ខ្លួនបានបង្កឲ្យមានការភ្ញាក់ផ្អើល។ លោកវរសេនីយ៍ឯក យ៉ង សំ អធិការនគរបាលស្រុកស្ទោង បានឲ្យដឹងថា ជនរងគ្រោះមានឈ្មោះ ឈន ជីង ភេទប្រុស អាយុ៥៨ឆ្នាំ រស់នៅភូមិប្រាសាទ ឃុំព្រះដំរី ស្រុកស្ទោង ខេត្តកំពង់ធំ។ បើយោងតាមការបំភ្លឺពីឈ្មោះ ជីង ហួ ភេទស្រី អាយុ៣១ឆ្នាំ ត្រូវជាកូនបង្កើតរបស់ជនរងគ្រោះប្រាប់ថា ឪពុកនាងក្នុងមួរយៈនេះគាត់ផឹកស្រាសជាប្រចាំ ហើយពេលខ្លះធ្លាប់ឈឺសន្លប់ដឹកទៅព្យាបាល នៅមន្ទីរពេទ្យបង្អែក ស្រុកស្ទោងក៏មាន។
លុះដល់ថ្ងៃទី០៩ ខែមេសា ឆ្នាំ២០១៨ វេលាម៉ោងប្រហែល ៨យប់ ឪពុកនាងបានជិះកង់ទៅមើលគេរាំធុងបាស់នៅក្នុងភូមិ រហូតដល់ម៉ោងប្រហែល១០យប់ ទើបគាត់ត្រលប់មកវិញ ហើយបានខ្ទាស់ទ្វារផ្ទះ រួចក៏សម្រាន្តមើលទូរទស្សន៍ រហូតដេកលក់ស្រមុកឮខ្លាំងៗ លុះដល់ម៉ោងប្រហែល ១១ និង៣០នាទីយប់ ស្រាប់តែឮសំឡេងខក់ៗជាច្រើនដង នាងក៏ស្ទះទៅមើល ឃើញឪពុកមានសភាពមិនស្រួល ប្លែកខុសពីធម្មតា ក៏ចុះរត់ទៅហៅបងប្អូនជិតខាងឲ្យជួយគាត់។
ដល់ពេលត្រលប់មកវិញស្រាប់តែ ឃើញឪពុកនាងបានដាច់ខ្យល់ស្លាប់បាត់ទៅហើយ លុះនៅព្រឹកថ្ងៃទី១០ ខែមេសា ឆ្នាំ២០១៨ សមត្ថកិច្ចបានសហការណ៍ជាមួយសាច់ញាតិ ដោយមានការចូលរូមពីមេភូមិ ក្រុមប្រឹក្សាឃុំ និងគ្រូពេទ្យបង្អែកស្រុកស្ទោង ចុះទៅពិនិត្យសព ឃើញថាពុំមានស្លាកស្នាមអ្វីទេ ទើបសន្និដ្ឋានថា ការស្លាប់របស់ជនរងគ្រោះគឺបណ្ដាលមកពីគាំងបេះដូង ឬក៏ខ្យល់គស្លាប់។ ក្រោយពីពិនិត្យរួច សមត្ថកិច្ចក៏ប្រគល់សពឲ្យក្រុមគ្រួសារធ្វើបុណ្យតាមប្រពៃណី៕
ចែករំលែកព័តមាននេះ