រាជធានីភ្នំពេញ ៖ តាមប្រភពព័ត៌មានបឋមឲ្យដឹងថា កាលពីវេលាម៉ោងជាង១០ព្រឹក ថ្ងៃទី០២ មេសា ២០១៨ កម្លាំងសមត្ថកិច្ចមន្ទីរប្រឆាំងគ្រឿងញៀន បានសហការជាមួយនាយកដ្ឋានសន្តិសុខផ្ទៃក្នុង ក្រសួងមហាផ្ទៃ តំណាងក្រុមហ៊ុន DHL តំណាងប្រៃណីយ៍កម្ពុជា និងដោយមានការសម្របសម្រួលពីលោកព្រះរាជអាជ្ញារង សៀង សុខ តំណាងអយ្យការសាលាដំបូងរាជធានីភ្នំពេញ។ ក្រោមការចង្អុលបង្ហាញពីសំណាក់លោកនាយឧត្តមសេនីយ៍ផ្កាយ៤ ម៉ក់ ជីតូ ដែលមានលោកឧត្តសេនីយ៍ឯក ឡឹក វណ្ណៈ ជានាយកមន្ទីរប្រឆាំងគ្រឿងញៀន បានចុះទៅធ្វើការត្រួតពិនិត្យ នៅលើកេសបញ្ញើ ពណ៌គគីរចំនួន៧កេស (ក្នុងមួយកេសមាន៨ថង់ ក្នុងមួយថង់មានទម្ងន់២គីឡូក្រាម សរុបទាំងអស់មានទម្ងន់(២០០គីឡូក្រាម)។
ប្រភពបន្តថា ស្លឹកឈើជារុក្ខជាតិដែលគេស្គាល់ថា (ស្លឹកខាត) មានសារធាតុញៀនប្រមាណ១២៤គីឡូក្រាមនេះ ត្រូវបានជនមិនស្គាល់អត្តសញ្ញាណ ដឹកយកទៅផ្ញើនៅក្រុមហ៊ុន DHL ដែលមានទិសដៅបម្រុងផ្ញើចេញពីប្រទេសកម្ពុជាទៅកាន់រដ្ឋចចារ សហរដ្ឋអាមេរិក។ នៅពេលសមត្ថកិច្ចបើកកេស ត្រួតពិនិត្យ ឃើញមានថង់ពណ៌ទឹកប្រាក់ទម្ងន់២គីឡូក្រាម ដែលបិទស្លាក Ever Green Dried Bay Leaf នៅក្នុងនោះ និងពិនិត្យឃើញមានស្លឹករុក្ខជាតិក្រៀម ពណ៌បៃតងចាស់ បន្ទាប់ពីក្រុមប្រតិបត្តិការបានយកទៅធ្វើតេស្តបឋម លទ្ធផលអវិជ្ជមាន តែដល់ពេលបានដកយកសំណាកចំនួនមួយថង់តូច បញ្ជូនទៅមន្ទីរពិសោធន៍ដែលហៅថា(ឡាបូ) នៅអាជ្ញាធរជាតិប្រយុទ្ធប្រឆាំងគ្រឿងញៀន ដើម្បីបន្តវិភាគរកសារធាតុញៀន។
ក្រោយមកលទ្ធផលបានពិនិត្យឃើញ ស្លឹករុក្ខជាតិ២០០គីឡូក្រាម ពិតជាមានសារធាតុញៀនប្រាកដមែន ដូច្នោះសមត្ថកិច្ចបានសម្រេចចិត្តឃាត់ទុក តាមអនុសាសន៍សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និង បទបញ្ញាពីលោកនាយឧត្តមសេនីយ៍ផ្កាយមាស៤ នេត សារឿន អគ្គស្នងការនគរបាលជាតិ។ បន្ទាប់ពីដឹងថា ស្លឹករុក្ខជាតិនោះមានជាប់ពាក់ព័ន្ធ នឹងសារធាតុញៀន ហើយកេសវេចខ្ចប់វត្ថុតាងត្រូវបានរក្សាទុកនៅក្រុមហ៊ុនDHL ដើម្បីរង់ចាំអនុវត្តច្បាប់ ប៉ុន្តែរហូតមកដល់ពេលនេះសមត្ថកិច្ចបាន និងកំពុងបន្តនីតិវិធី៕
ចែករំលែកព័តមាននេះ