ខេត្តស្វាយរៀង ៖ លោកសន្តិបណ្ឌិត អ៊ុក គឹមលេខ រដ្ឋលេខាធិការក្រសួងមហាផ្ទៃ និងជាប្រធាន ក្រុមការងារអន្តរក្រសួង បានដឹកនាំគណៈប្រតិភូចុះធ្វើអធិការកិច្ច និងចុះសិក្សាស្ថានភាពតាមបណ្តាប៉ុស្តិ៍…
ខេត្តស្វាយរៀង ៖ លោកសន្តិបណ្ឌិត អ៊ុក គឹមលេខ រដ្ឋលេខាធិការក្រសួងមហាផ្ទៃ និងជាប្រធាន ក្រុមការងារអន្តរក្រសួង បានដឹកនាំគណៈប្រតិភូចុះធ្វើអធិការកិច្ច និងចុះសិក្សាស្ថានភាពតាមបណ្តាប៉ុស្តិ៍ ច្រកទ្វារព្រំដែនអន្តរជាតិ ច្រកទ្វេភាគី និងច្រកតំបន់ក្នុងខេត្តស្វាយរៀង ដើម្បីរកបញ្ហាប្រឈមនានា និងសំណូមពររាយការណ៍ទៅថ្នាក់លើធ្វើការដោះស្រាយ។ ការចុះសិក្សានេះធ្វើឡើងរយៈពេលមួយថ្ងៃ នៅថ្ងៃទី៩ មេសា ២០១៨ នៅច្រកទ្វារព្រំដែនអន្តរជាតិ ព្រៃវល្លិ៍ ឃុំថ្មី ស្រុកកំពង់រោទិ៍ ច្រកទ្វារព្រំដែនទ្វេភាគីសំរោង ឃុំសំរោង ស្រុកចន្ទ្រា ច្រកទ្វារតំបន់ព្រំដែនព្រៃតាអី ឃុំព្រៃតាអី ស្រុកស្វាយទាប និងច្រកទ្វារព្រំដែនអន្តរជាតិបាវិត ក្រុងបាវិត ហើយពេលរសៀលប្រជុំពិភាក្សា នៅសាលាក្រុងបាវិត។ សមាសភាពចូលរួមមាននាយឧត្តមសេនីយ៍អន្តរក្រសួងជាច្រើនរូប លោក ម៉ែន វិបុលអភិបាលនៃគណៈអភិបាលខេត្ត លោកអភិបាលរងខេត្ត លោកអភិបាលអភិបាលរងក្រុង ស្រុក មន្ទីរ វិស័យពាក់ពន្ធ័ ប្រធានទីស្នាក់ការច្រកទ្វារព្រំដែន និងនគបាលអន្តោប្រវេសន៍ ច្រកទ្វារព្រំដែនអន្តរជាតិ ទ្វេភាគី និងច្រកទា្វរតំបន់ចំនួន១៣ និងមន្ត្រីគយ កាំកុងត្រូលសរុបជាង១០០នាក់។
លោក លឹម សៀងហេង អភិបាលរងក្រុងបាវិត និងជាប្រធានស្នាក់ការច្រកទ្វារព្រំដែនអន្តរជាតិបាវិត មានប្រសាសន៍ ថា ច្រកទ្វារព្រំដែនអន្តរជាតិបាវិត មានកិច្ចសហការល្អជាមួយភាគីវៀតណាម ក្នុងមួយខែមានកិច្ចប្រជុំម្តង។ លោក លឹម សៀងហេង បានមានប្រសាសន៍ទៀតថា ច្រកទ្វារព្រំដែនអន្តរជាតិបាវិត មានផ្ទៃដីទំហំ៣ហិកតា ហើយបានសម្ពោធអាគារ ច្រកទ្វារនៅថ្ងៃទី១៥ ធ្នូ ២០០៥ មានមន្ត្រីតំណាងរដ្ឋបាលខេត្តក្រុង០៥នាក់ មន្ត្រីនគរបាលអគ្គនាយកដ្ឋានអន្តោប្រវេសន៍ ក្រសួងមហាផ្ទៃចំនួន១៦៤នាក់ មន្ត្រីគយ និងរដ្ឋាករចំនួន៣៧នាក់ មន្ត្រីកាំកុងត្រូល១៦នាក់ មន្ត្រី ទេសចរណ៍ក្រសួង៣នាក់ ពេទ្យចត្តាឡីសក័ ពេទ្យសត្វសរុប២០០នាក់ ស្រី២២នាក់។ ហើយភ្ញៀវទេសចរណ៍ជាតិ និងអន្តរជាតិចេញចូលឆ្លងកាត់ទៅប្រទេសវៀតណាម-កម្ពុជា ក្នុងមួយថ្ងៃជាង៤ពាន់នាក់។ រថយន្តកុងតឺន័រដឹកទំនិញឆ្លងកាត់ក្នុងមួយថ្ងៃជាង២០០គ្រឿង រថយន្ត ក្រុងដឹកអ្នកដំណើរ និងរថយន្តដឹកទំនិញមធ្យោបាយផ្សេងៗជាច្រើនទៀត ធ្វើឲ្យមានការប្រឈមកកស្ទះចរាចរណ៍ ដោយច្រកទ្វារព្រំដែនអន្តរជាតិបាវិតមានទីកន្លែងតូចចង្អៀត ហើយពេលចូលស្គែននៅម៉ាស៊ីនស្គែនកន្លែង មន្ត្រីគយគឺបណ្តាលឲ្យកកស្ទះ។
អាគារច្រកទ្វារចាស់ទ្រុឌទ្រោមត្រូវការគម្រោងជួសជុល សំណូមពរជួសជុលអាគារ និងរកទីតាំងដីធ្វើចំណតរថយន្តកុងតឺន័រ។ ក្នុងឱកិច្ចប្រជុំពិភាក្សានោះដែរក្រុមការងារអន្តរក្រសួងមហាផ្ទៃ បានលើកឡើងថា ច្រករបៀងជាប់ព្រំដែនវៀតណាមទូទាំងប្រទេសមាន៨៩ច្រករបៀង តាមរបាយការណ៍ ដោយឡែកខេត្តស្វាយរៀងរាយការណ៍ជូនក្រសួងមហាផ្ទៃមានចំនួន១៣ច្រករបៀង ច្រកទ្វេភាគី២ និងច្រកតំបន់ចំនួន៣ ក៏ប៉ុន្តែបើតាមការចុះស្រាវជ្រាវ និងសិក្សា រកឃើញច្រករបៀងមានរហូត៤៣ច្រករបៀង មិន១៣ច្រករបៀងទេសូមឲ្យបំភ្លឺ កុំឲ្យរបាយការណ៍របស់ខេត្តខុសរបាយការណ៍ក្រុមការងារច្រើនពេក។ ហើយការបង្កើតច្រករបៀងច្រើនពេក គឺនាំឲ្យខាតបង់នូវការប្រមូលពន្ធចូលរដ្ឋត្រូវតែលប់បំបាត់។ សម្តេចក្រឡាហោម ស ខេង បានដាក់ផែនការ និងធ្វើប្រតិភូកម្មមកអាជ្ញាធរថ្នាក់ក្រោមជាតិ ដែលមានលោកអភិបាលខេត្តស្រុកក្រុង ធ្វើការកែទម្រង់ដូចប្រសាសន៍របស់សម្តេចតេជោ ហ៊ុន សែន ឲ្យឆ្លុះកញ្ចក់រកឲ្យឃើញកំហុសឆ្គងដោយខ្លួនឯងរួចកែទម្រង់។
ក្នុងឱកាសនោះដែរលោក ម៉ែន វិបុល អភិបាលនៃគណអភិបាលខេត្តបានបំភ្លឺថា បញ្ហាច្រករបៀងគឺមានតែ១៥ទេ ហើយបង្កើតច្រកទ្វេភាគី២ និងច្រកតំបន់៣ គឺនៅសល់ច្រករបៀងតែ១០ទេ។ ដោយខេត្តស្វាយរៀងមានព្រំដែនវែងបង្កើតជាប៉ុស្តិ៍ការពារព្រំដែនមាន២៥៨ប៉ុស្ត៍ ក្នុងនោះប៉ុស្ត៍ធំចំនួន១៥ ធ្វើច្រកព្រំដែនទ្វេភាគី២ ច្រកតំបន់៣ និងដំណាក់ចំនួន២៨ សម្រាប់កម្លាំងស្នាក់នៅមិនមែនច្រករបៀងទេ។ បើតាមមហាជនវិញបានបង្ហើបឲ្យដឹងថា ច្រករបៀង និងដំណាក់គឺដូចគ្នា គ្រាន់តែតំណាក់ខ្លះមានឈ្មួញ និងប្រជាពលរដ្ឋចេញចូលដឹកទំនិញតិចជាងច្រករបៀងដែលជាប៉ុស្ត៍ធំៗ ចំនួន១៥នោះដូចជា ច្រកធ្លកឃុំច្រកម្ទេស មានចេញគោក្របីទាំងរថយន្ត និងមានបើកាស៊ីណូទៀតផង ដំណាក់ជាប់សាលាក្រុងបាវិតជាដើមរថយន្តដឹកអេតចាយរាប់សិបគ្រឿងក្នុងមួយថ្ងៃៗ ស្រុតខូចផ្លូវអស់ហើយ។ បើទំនិញវិញដឹកដូចគេហែកឋិន និងមានមន្ត្រីដាក់កុងត្រូលជជុះចាំយកប្រាក់ពីឈ្មួញ៥ស្ថាបន័ឯណោះទាន៕
https://youtu.be/ZI8U31FBQhw
ចែករំលែកព័តមាននេះ