ទីក្រុងតូក្យូ ៖ ប្រភពមួយឲ្យដឹងថា ប្រទេសជប៉ុនបានផ្តល់ដំណឹងដល់អង្គការពាណិជ្ជកម្មពិភពលោក (WTO) ពីគោលបំណងរបស់ខ្លួន ក្នុងការធ្វើជាភាគីទី៣ក្នុងពាក្យបណ្តឹងរបស់សហរដ្ឋអាមេរិក ដែលចោទប្រកាន់ប្រទេសចិនថា លួចកម្មសិទ្ធិបញ្ញា ។…
ទីក្រុងតូក្យូ ៖ ប្រភពមួយឲ្យដឹងថា ប្រទេសជប៉ុនបានផ្តល់ដំណឹងដល់អង្គការពាណិជ្ជកម្មពិភពលោក (WTO) ពីគោលបំណងរបស់ខ្លួន ក្នុងការធ្វើជាភាគីទី៣ក្នុងពាក្យបណ្តឹងរបស់សហរដ្ឋអាមេរិក ដែលចោទប្រកាន់ប្រទេសចិនថា លួចកម្មសិទ្ធិបញ្ញា ។
ប្រភពខាងលើបាននិយាយកាលពីថ្ងៃសុក្រកន្លងមកថា ប្រសិនបើចិន និងសហរដ្ឋអាមេរិកយល់ព្រមឲ្យជប៉ុនចូលរួមនោះ ប្រទេសនេះនឹងអាចបង្ហាញពីមតិយោបល់របស់ខ្លួនក្នុងការប្រឹក្សានៅ WTO ។
គួរបញ្ជាក់ថា ការិយាល័យអ្នកតំណាងពាណិជ្ជកម្មសហរដ្ឋអាមេរិក បានផ្ញើពាក្យបណ្តឹងកាលពីថ្ងៃទី២៣ ខែមីនា ដែលចោទប្រកាន់ថា ប្រទេសចិនបានប្រើប្រាស់លក្ខខណ្ឌផ្តល់ប័ណ្ណអនុញ្ញាតរើសអើង ដោយបង្ខំឲ្យក្រុមហ៊ុនបរទេសបញ្ជូនបច្ចេកវិទ្យារបស់ខ្លួនមកកាន់ក្រុមហ៊ុនចិន ។
ការិយាល័យនេះនិយាយថា ប្រទេសចិនប្រៀបដូចជាល្មើសនឹងច្បាប់របស់ WTO ដោយមិនទទួលស្គាល់សិទ្ធិមូលដ្ឋានរបស់ម្ចាស់ប៉ាតង់ រួមមាន ក្រុមហ៊ុនអាមេរិក ដែលប្រទេសនេះមិនអនុញ្ញាតឲ្យជនជាតិចិនប្រើប្រាស់បច្ចេកវិទ្យារបស់អាមេរិក បន្ទាប់ពីបញ្ចប់កិច្ចសន្យា ។
យោងតាមការផ្តល់ដំណឹងខាងលើឲ្យដឹងថា នារយៈពេលប៉ុន្មានឆ្នាំថ្មីៗនេះ ប្រទេសជប៉ុនក៏ព្រួយបារម្ភពីបញ្ហាដូចគ្នាដែរ ហើយក៏បានចេញសកម្មភាពដោះស្រាយ ។
ប្រភពឲ្យដឹងថា ប្រសិនបើមានការអនុញ្ញាតឲ្យជប៉ុនចូលរួមនោះ ប្រទេសនេះនឹងអាចនិយាយថា យុទ្ធសាស្ត្ររបស់ចិនទាក់ទងនឹងការបញ្ជូនបច្ចេកវិទ្យា គឺកំពុងតែប៉ះពាល់ដល់បរិស្ថានប្រកួតប្រជែងរវាងក្រុមហ៊ុន ។ សហភាពអឺរ៉ុប ក៏នឹងស្នើចូលធ្វើជាភាគីទី៣ ក្នុងការប្រឹក្សានេះដែរ ។
គួរបញ្ជាក់ថា ក្រោមដំណើរការដោះស្រាយជម្លោះរបស់ WTO សហរដ្ឋអាមេរិក និងចិន ជាដំបូង គឺត្រូវចរចាគ្នាពីបញ្ហានេះសិន ។ ប្រសិនបើពួកគេមិនយល់ស្របលើដំណោះស្រាយមួយបានទេ សហរដ្ឋអាមេរិកអាចនឹងស្នើឲ្យមានការបង្កើតគណៈកម្មការដោះស្រាយជម្លោះ WTO ដើម្បីពិនិត្យលើបញ្ហានេះ ៕
ចែករំលែកព័តមាននេះ