ខេត្តស្វាយរៀង ៖ ឈើសុក្រំមុខកាត់៤តឹកប្រវែង២ម៉ែត្រចំនួន៧ដុំ និងក្តាងឿ២សន្លឹកក្រឡាប់ធ្លាក់ពីលើគោយន្តកែច្នៃមួយគ្រឿងហើយត្រូវម្ចាស់គោយន្តលើកគទុករួចយកក្រណាត់មកគ្របទុកហើយបើកគោយន្តគេចបាត់ទំនងរកគោយន្តថ្មីមកផ្ទេរតែត្រូវបែកធ្លាយដល់សមត្ថកិច្ចកងរាជអាវុធហត្ថខេត្តចុះទៅពិនិត្យ និងសួររកម្ចាស់ក៏ប៉ុន្តែពុំមានម្ចាស់ចេញមុខមកសមត្ថកិច្ចក៏នាំយកឈើទាំងនោះយកទៅរក្សាទុកនៅទីបញ្ជាការរដ្ឋានកងរាជអាវុធហត្ថខេត្តស្វាយរៀងដើម្បីរកម្ចាស់ចូលមកដោះស្រាយ ។
បើយោងតាមមន្ត្រីកងរាជអាវុធម្នាក់បានឲ្យដឹងថា ឈើទាំង៧ដុំនោះជាប្រភេទឈើសុក្រំដែលមានមុខកាត់៣ទៅ៤តឹកកំរាស់ប្រហែល១តឹកកន្លះបណ្តោយ២ម៉ែត្រជាងដឹកដោយគោយន្តកែច្នៃ ហើយលុះមកដល់ផ្លូវក្រាល កៅស៊ូ ស្ថិតក្នុងភូមិចុងព្រែក សង្កាត់ស្វាយរៀង ក្រុងស្វាយរៀងធ្លាក់ជង្ហុករលាក់បាស់គូថជ្រុះធ្លាក់ឈើមកលើថ្នល់ក៏ប៉ុន្តែអ្នកបើកគោយន្តមិនបានឈប់នោះទេ ដោយទុកបុរសម្នាក់នៅចាំកន្លែងឈើដោយយកក្រណាត់មកគ្របស្របពេលនោះសមត្ថកិច្ចយើងមកដល់ក៏សួរនាំរកម្ចាស់តែអ្នកចាំឈើថា ចាំដើរទៅហៅឱ្យស្រាប់តែទៅបាត់តែម្តង ។
ប្រភពដដែលបានបន្តទៀតថា ឈើនេះគេដឹកយកមកបានប្រហែលបន្លំដឹកតាមរ៉ឺម៉ក ឬដឹកតាមរថយន្តតួរីសហើយមកផ្ទេរដឹកតាមគោយន្តកែច្នៃទំនងបម្រុងដឹកបន្តទៅប្រទេសវៀតណាម ទើបមិនហ៊ានមកជួបជាមួយសមត្ថកិច្ចដើម្បីដោះស្រាយទេ ។ ករណីឈើប្រណិតជ្រុះនេះបានកើតឡើងកាលពីព្រឹកទៀបភ្លឺថ្ងៃទី៧ ខែមេសា ឆ្នាំ២០១៨ នៅភូមិចុងព្រែក សង្កាត់ស្វាយរៀង ក្រុងស្វាយរៀង ។
ទាក់ទិនករណីនេះដែរមិនអាចរកម្ចាស់ឈើមកបំភ្លឺបានទេ ល្ងាចថ្ងៃទី៧ ខែមេសា ឆ្នាំ២០១៨ ក៏ប៉ុន្តែសមត្ថកិច្ចបានទម្លាយថា សង្ស័យឈ្មួញប្រើរូបភាពបន្លំភ្នែកសមត្ថកិច្ច និងមហាជនដោយលែងដឹកតាមរថយន្តធំគឺដឹកតាមរ៉ឺម៉កតាមរថយន្តតួរីស និងតាមគោយន្តវិញពេលក្រឡាប់គោយន្តទើបបែកធ្លាយ ៕
ចែករំលែកព័តមាននេះ