ចុះសួរសុខទុក្ខកងទ័ពនៅសមរភូមិមុខក្នុងឱកាលសង្ក្រាន្តឆ្នាំថ្នី
- សៀមរាប
ខេត្តសៀមរាប ៖ គណៈប្រតិភូខេត្តសៀមរាប ដឹកនាំដោយ លោក ឃឹម ប៊ុនសុង អភិបាល នៃគណៈអភិបាលខេត្ត និងលោក…
ខេត្តសៀមរាប ៖ គណៈប្រតិភូខេត្តសៀមរាប ដឹកនាំដោយ លោក ឃឹម ប៊ុនសុង អភិបាល នៃគណៈអភិបាលខេត្ត និងលោក នូ ផល្លា ប្រធានក្រុមប្រឹក្សាខេត្ត រួមទាំងអស់លោក លោកស្រី ជាសមាជិកក្រុមប្រឹក្សាខេត្ត គណៈអភិបាលខេត្ត ថ្នាក់ដឹកនាំមន្ទីរ អង្គភាពជុំវិញខេត្ត បាននាំយកអំណោយជាគ្រឿងឧបភោគបរិភោគ សម្ភារ និង ថវិកាមួយចំនួន ចុះសួរសុខទុក្ខកងទ័ពប្រចាំសមរភូមិមុខ យោធភូមិភាគទី៤ ប្រចាំទិសទី២ និង អង្គភាពវរសេនាតូចលេខ១ ចំណុះឲ្យតំបន់ប្រតិបត្តិការណ៍សឹករងសៀមរាប ឈរជើងតំបន់អូរកូនតឹង នៅរសៀលថ្ងៃទី០៣ ខែមេសា ឆ្នាំ២០១៨ ស្ថិតនៅភូមិត្រពាំងក្រសាំង ឃុំស្រែណូយ ស្រុកវ៉ារិន ខេត្តសៀមរាប តំបន់ព្រៃស្អាក ក្នុងឱកាសបុណ្យចូលឆ្នាំថ្មី ឆ្នាំច សំរឹទ្ធិស័ក ព.ស ២៥៦២ ប្រពៃណីជាតិខ្មែរយើងខាងមុខ ។
លោកឧត្តមសេនីយ៍ត្រី កា ដែត មេបញ្ជាការរង តំបន់ប្រតិបត្តិការសិករងសៀមរាប ធ្វើសេចក្តីរាយការណ៍អំពីស្ថានភាពសន្តិសុខនៅក្នុងតំបន់ភូមិសាស្ត្រតាមបណ្ដោយខ្សែព្រំដែន និងស្ថានភាពជីវភាពរស់នៅរបស់កងទ័ព ។ ក្រោយពេលដែលសភាពការណ៍នៅតាមបណ្ដោយបន្ទាន់ព្រំដែនមានសភាពស្ងប់ស្អាត់ បានក្លាយជាសមរភូមិកំពុងអភិវឌ្ឍន៍តំបន់ព្រំដែនសន្តិភាព និងបានធ្វើឲ្យអង្គភាពធ្វើការពង្រឹងបណ្តុះបណ្តាល ហ្វឹកហ្វឺនដល់នាយ និងពលទាហាន ឲ្យកាន់យល់ច្បាស់អំពីយុទ្ធសាស្ត្ររបស់កងទ័ព ក្នុងការលើកកម្ពស់ដល់វិស័យកងទ័ព ព្រមទាំងបានធ្វើការកសាងអង្គភាព តាមរយៈសម្ព័ន្ធមេត្រីភាព ក្នុងការឧបត្ថម្ភគាំទ្រដល់សមរភូមិមុខ ពីបណ្តាក្រសួង មន្ទីរ ស្ថាប័ន សប្បុរសជនផងដែរ ។
មានប្រសាសន៍សំណេះសំណាលជាមួយនាយទាហាន និងពលទាហាន ក្នុងឱកាសប្រជាជនកម្ពុជា រៀបចំទទួលសាទរទេវតាឆ្នាំថ្មី ឆ្នាំច សំរឹទ្ធិស័ក ព.ស ២៥៦២ ខាងមុខ លោក ឃឹម ប៊ុន សុង អភិបាលខេត្ត ក៏បានពាំនាំនូវប្រសាសន៍ផ្តាំផ្ញើ សាកសួរសុខទុក្ខពីសំណាក់ សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និង សម្តេចកិតិ្តព្រឹទ្ធបណ្ឌិត ប៊ុន រ៉ានី ហ៊ុន សែន ដ៏ដូច សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងអគ្គបញ្ជាការ តែងតែនឹកគិតដល់បងប្អូនជានាយទាហាន ពលទាហាននៅសមរភូមិមុខ តាមបន្ទាត់ព្រំដែនកម្ពុជា-ថៃ អំពីសុខភាព និងជីវភាពរស់នៅរបស់បងប្អូនកងយោធពលខេមរភូមិន្ទយើង ។
លោកក៏បានធ្វើការក្រើនរំឭកដល់នាយទាហាន ពលទាហានទាំងអស់ ដោយបញ្ជាក់ថា ក្រោយពីបងប្អូនបានវិលត្រលប់ពីការបំពេញភារកិច្ចនៅតាមបណ្ដោយព្រំដែនកម្ពុជា-ថៃ មកឈរជើងនៅលើទីតាំងចាស់របស់ខ្លួនវិញ សូមបងប្អូនត្រូវយកចិត្តទុកដាក់ ក្នុងការហ្វឹកហាត់ឲ្យបានជាប្រចាំ នូវយុទ្ធវិធីយុទ្ធសាស្ត្ររបស់កងទ័ព ព្រមទាំងបានលើកឡើងពីសភាពការណ៍នយោបាយក្នុង និងក្រៅប្រទេស និងបានគូសបញ្ជាក់ថា កងទ័ពគឺជាកងកម្លាំងការពារបូរណភាពទឹកដី ការពារប្រមុខរាជរដ្ឋាភិបាលស្របច្បាប់ ដែលកើតចេញពីការបោះឆ្នោតរបស់ប្រជាពលរដ្ឋ ។ ម្យ៉ាងទៀតទោះបីស្ថានការណ៍នៅតាមបណ្ដោយព្រំដែនកម្ពុជា-ថៃ បានវិលមករកដូចសភាពដើមក៏ដោយ បងប្អូនទាំងអស់ក៏ត្រូវត្រៀមលក្ខណៈនៅគ្រប់វិនាទី ក្នុងការជួយអន្តរាគមន៍នូវពេលមានសភាពការណ៍ណាមួយកើតឡើង ។
លោក ឃឹម ប៊ុនសុង ក៏បានធ្វើការផ្តាំផ្ញើដល់បងប្អូនទាំងអស់ ត្រូវយកចិត្តទុកដាក់ខ្ពស់ទៅលើបញ្ហាសុខភាព អនាម័យ និងធ្វើការកសាងជម្រកក្នុងអង្គភាព ព្រមទាំងធ្វើការដាំដុះដំណាំ បន្លែ និងចិញ្ចឹមសត្វ ដើម្បីផ្គត់ផ្គង់ជីវភាពកងទ័ព ក្នុងអង្គភាព និងគ្រួសារកងទ័ព សំខាន់លើការគ្រប់គ្រង និងថែរក្សានូវគ្រឿងបំពាក់សម្ភារកងទ័ពឲ្យបានល្អក្នុងការទ្រទ្រង់នៅពេលមាន សភាពការណ៍ណាមួយកើតឡើង ។
លោកក្នុងនាមជាប្រធានគណៈបញ្ជាការឯកភាពរដ្ឋបាលខេត្ត ក៏បានធ្វើការថ្លែងអំណរគុណ សម្តេចតេជោ ហ៊ុន សែន និង សម្តេចកិត្តិព្រឹទ្ធបណ្ឌិ ប៊ុន រ៉ានី ហ៊ុន សែន ក្នុងនាមជាអគ្គភស្តុភារជាន់ខ្ពស់ នៃកងយោធពលខេមរភូមិន្ទ បានយកចិត្តទុកដាក់ខ្ពស់ ចំពោះកងទ័ពដែលបានកំពុងបំពេញកាតព្វកិច្ចការពារជាតិមាតុភូមិកម្ពុជា ទាំងជីវភាពរស់នៅ និងសុខភាព ។ ម្យ៉ាងទៀតថ្ងៃនេះ គណៈប្រតិភូខេត្តបានផ្តល់នូវជាគ្រឿងឧបភោគបរិភោគដល់បងប្អូនជានាយទាហាន ពលទាហាននៃយោធភូមិភាគទី៤ ប្រចាំទិសទី២ និងអង្គភាពវរសេនាតូចលេខ១ នៃតំបន់ប្រតិបត្តិការសឹករងខេត្តសៀមរាប ក្នុងស្ថានភាពកសាងទីតាំង និងហ្វឹកហ្វឺន ព្រមទាំងបានបួងសួងដល់បារមីដ៏ស័ក្ដិសិទ្ធិដែលគង់ប្រថាប់នៅលើទឹកដីប្រវត្តិសាស្ត្រខេត្តសៀមរាប តាមជួយបីបាច់ថែរក្សាដល់កងកម្លាំងទាំងអស់ ឲ្យជួបតែសេចក្តីសុខចម្រើន ដើម្បីចូលរួមអនុវត្តនូវគោលនយោបាយភូមិឃុំ មានសុវត្ថិភាព សំដៅឆ្ពោះទៅការអភិវឌ្ឍន៍រីកចម្រើនជូនដល់ប្រជាពលរដ្ឋ ឲ្យដល់ត្រើយសុភមង្គមតទៅថ្ងៃអនាគត ។
សូមបញ្ជាក់ផងដែរថា អំណោយដែលគណៈប្រតិភូយកមកប្រគល់ជូនដល់ទីបញ្ជាការប្រចាំទិសទី២ នៃយោធភូមិភាគទី៤ នាពេលនេះមាន ស្រាបៀរ៤០កេស, មី៤០កេស, មាន់២០ក្បាល, ជ្រូក១ក្បាល, ថវិកា៥លានរៀល, អង្គភាពវរសេនាតូចលេខ១ មានគ្រឿងឧបភោគបរិភោគចំនួន២៣មុខ និងថវិកា សរុប៦លានរៀល ក្នុងនោះបានចែកជូនយោធិនម្នាក់ៗ៤ម៉ឺនរៀលផងដែរ ៕
ចែករំលែកព័តមាននេះ