ប្រទេសអាចអភិវឌ្ឍន៍ទៅបាន គឺអាស្រ័យលើវិស័យអប់រំ
- ភ្នំពេញ
រាជធានីភ្នំពេញ ៖ តាមប្រសាសន៍សំខាន់ៗរបស់ ឯកឧត្តមបណ្ឌិត ហ៊ុន ម៉ាណែត តំណាងដ៏ខ្ពង់ខ្ពស់សម្តេចអគ្គមហាសេនាបតីតេជោ ហ៊ុន សែន និងសម្តេចកត្តិព្រឹទ្ធបណ្ឌិត…
រាជធានីភ្នំពេញ ៖ តាមប្រសាសន៍សំខាន់ៗរបស់ ឯកឧត្តមបណ្ឌិត ហ៊ុន ម៉ាណែត តំណាងដ៏ខ្ពង់ខ្ពស់សម្តេចអគ្គមហាសេនាបតីតេជោ ហ៊ុន សែន និងសម្តេចកត្តិព្រឹទ្ធបណ្ឌិត ក្នុងពិធីប្រគល់សញ្ញបត្រ និងវិញ្ញបនបត្រកម្រិតបរិញ្ញាបត្រជាន់ខ្ពស់ បរិញ្ញបត្រ និងបរិញ្ញាបត្ររង ជូនដល់និស្សិតជ័យលាភីនៃវិទ្យាស្ថានសហប្រតិបត្តិការអន្តរជាតិ កម្ពុជា នៅវិទ្យាស្ថានជាតិអប់រំ ។
នៅថ្ងៃសៅរ៏ ទី៣១ ខែមីនា ឆ្នាំ២០១៨ ទី១ – វិនិយោគវិស័យអប់រំ គឺជាការវិនិយោគលើអនាគតនៃធនធានមនុស្ស និងក្តីសង្ឃឹមនៃប្រទេសជាតិ ។
ប្រទេសអាចអភិវឌ្ឍន៍ទៅបាន គឺអាស្រ័យលើវិស័យអប់រំ ហេតុនេះហើយរាជរដ្ឋាភិបាលបានយកចិត្តទុកដាក់យ៉ាងខ្លាំងណាស់ លើវិស័យមួយនេះ ហើយបានចាត់ទុកការអភិវឌ្ឍន៍ធនធានមនុស្សប្រកបដោយគុណធម៌ និងការប្រើប្រាស់មូលធនបញ្ញរបស់ជាតិប្រកបដោយប្រសិទ្ធភាព ជាចក្ខុវិស័យរយៈពេលវែង សម្រាប់អភិវឌ្ឍន៍ប្រទេសជាតិ ។ ទី២ – យុវជនត្រូវហ៊ានធ្វើការសាកល្បងរៀនសព្វ រៀនគ្រប់ ពីអ្នកដែលពូកែនៅជុំវិញខ្លួន ដើម្បីភាពជោគជ័យរបស់ខ្លួន ហើយប្រទេសជាតិត្រូវការយុវជនដែលមានសមត្ថភាព ឆន្ទៈ និងទំនុកចិត្ត ។
ដូចនេះយុវជនត្រូវមានមោទនាភាព ចំពោះខ្លួនឯងក៏ដូចជាគ្រួសារ និងប្រទេសជាតិ ព្រោះអនាគតយុវជនយើងជាអនាគតរបស់ជាតិដូចច្នេះ ការចង់រីកចម្រើនអភិវឌ្ឍន៍ខ្លួនឯង ត្រូវមានគោលដៅច្បាស់លាស់ និងឲ្យស្របទៅនឹងការអភិវឌ្ឍន៍ប្រទេស សូមយុវជនទាំងឡាយកុំអភិវឌ្ឍន៍ខ្លួនឯង ដើម្បីបំផ្លាញជាតិឲ្យសោះ ។ ទី៣ – បើទោះបីយើងនៅក្រោយគេបន្តិចមែន តែយើងដើរបានលឿនជាងប្រទេសមួយចំនួនទៅហើយនេះ គឺដោយសារកត្តាសុខសន្តិភាពដែលផ្តល់ឱកាសឲ្យប្រជាពលរដ្ឋគ្រប់បែបយ៉ាង តែសុខសន្តិភាព គឺមិនត្រឹមតែបង្កើតឱកាសតែប៉ុណ្ណោះនោះទេ តែវាបានជម្រុញឲ្យប្រទេសយើងដើរទៅមុខបានលឿនដូចសព្វថ្ងៃនេះ គឺធនធានមនុស្សដែលពោរពេញទៅដោយវិជ្ជាជីវៈ ។ ទី៤ – យុវជនត្រូវចេះបង្កើតឱកាសដោយខ្លួនឯង មិនចាំបាច់រង់ចាំឱកាសដែលគេផ្តល់ឲ្យនោះទេ ត្រូវពង្រឹងខ្លួនឯងហើយ ត្រូវបង្កើនសមត្ថភាពចាប់យកឱកាសការងារ ស្វែងរកប្រាក់ចំណូល ដើម្បីពង្រឹងជីវភាពរស់នៅឲ្យកាន់តែរឹងមាំដែលនេះហើយ គឺជាការពង្រឹងជាតិ ព្រោះការពង្រឹងជាតិ គឺពង្រឹងសមត្ថភាពយុវជនផងដែរ ។ ទី៥- ថ្ងៃនេះពិធីប្រគល់សញ្ញាបត្រជូនដល់និស្សិតជ័យលាភី គឺបានបង្ហាញពីអត្ថន័យនៃការទទួលស្គាល់ចំពោះការខិតខំប្រឹងប្រែងរបស់និស្សិតដែលសម្រេចបាននូវលទ្ធផលល្អរបស់ខ្លួន។
លើសពីនេះទៅទៀតវាក៏បានបង្ហាញពីការលើកទឹកចិត្តទាំងអស់គ្នា ចំពោះការខិតខំប្រឹងប្រែងដែលនេះជាមូលដ្ឋានសម្រាប់កសាងផ្នត់គំនិត និងភាពជោគជ័យទាំងក្នុងជីវិត ទាំងការសិក្សា និងទាំងក្នុងសង្គមជាតិទាំងមូលផងដែរ ៕
ចែករំលែកព័តមាននេះ