ខេត្តកំពង់ស្ពឺ ៖ ទន្សោងឈ្មោល១ក្បាលរស់នៅក្នុងព្រៃសហគមន៍ប្រាំបីមុម ត្រូវបានគេប្រទះឃើញរងរបួស ហើយប្រជាសហគមន៍ ក៏បានរាយការណ៍ទៅថ្នាក់លើ ដើម្បីអន្តរាគមន៍ជួយព្យាបាល ។ ប៉ុន្តែក្រុមគ្រូពេទ្យមិនទាន់ទៅដល់ផង ក្រុមព្រានព្រៃក៏នាំគ្នាលបចូលទៅកន្លែងទន្សោងរបួសនោះ…
ខេត្តកំពង់ស្ពឺ ៖ ទន្សោងឈ្មោល១ក្បាលរស់នៅក្នុងព្រៃសហគមន៍ប្រាំបីមុម ត្រូវបានគេប្រទះឃើញរងរបួស ហើយប្រជាសហគមន៍ ក៏បានរាយការណ៍ទៅថ្នាក់លើ ដើម្បីអន្តរាគមន៍ជួយព្យាបាល ។ ប៉ុន្តែក្រុមគ្រូពេទ្យមិនទាន់ទៅដល់ផង ក្រុមព្រានព្រៃក៏នាំគ្នាលបចូលទៅកន្លែងទន្សោងរបួសនោះ ពន្លះយកសាច់ស្មាមុខ និងភ្លៅចែកគ្នា រួចនាំគ្នារត់គេចខ្លួនបាត់អស់ ។
លោកវរសេនីយ៍ឯក ហ៊ុន សុខហុន អធិការនគរបាលស្រុកថ្ពងបានប្រាប់ កាលពីព្រឹកថ្ងៃទី២៣ មីនា ថា តាមការស្រាវជ្រាវទន្សោងនេះ ត្រូវក្រុមជនសង្ស័យបាញ់កាលពីយប់ថ្ងៃទី២២ ខែមីនា នៅចំណុចព្រៃសហគមន៍ប្រាំបីមុម ស្ថិតក្នុងស្រុកថ្ពង ។ លោកអធិការបន្តថា ទន្សោងឈ្មោលនេះ ត្រូវបានប្រជាសហគមន៍ប្រទះឃើញដួលនៅក្នុងព្រៃ ដោយមានស្នាមរបួសត្រូវគ្រាប់កាំភ្លើង ក៏រាយការណ៍ប្រាប់ទៅខាងរដ្ឋបាលព្រៃឈើដើម្បីអន្តរាគមន៍ ទៅខាងអភិរក្សសត្វព្រៃមកធ្វើការសង្គ្រោះ ។ ប៉ុន្តែ ពេលក្រុមសមត្ថកិច្ចជំនាញ ព្រមទាំងគ្រូពេទ្យ ធ្វើដំណើរទៅដល់ព្រៃសហគមន៍នោះ មិនដឹងថា ក្រុមព្រានព្រៃលបចូលទៅពន្លះស្មាមុខ និងភ្លៅក្រោយតាំងពីពេលណាទេ ដោយបន្សល់ទុកតែក្បាល និងដងខ្លួនប៉ុណ្ណោះ នៅកន្លែងកើតហេតុ ។
ក្រោយពីប្រទះឃើញដូច្នេះ ក្រុមការងារចម្រុះដែលមាននគរបាលក្រសួងមហាផ្ទៃចូលរួមផងដែរនោះ បានស្រាវជ្រាវយ៉ាងយកចិត្តទុកដាក់បំផុត ព្រោះថាការបាញ់សម្លាប់សត្វកម្របែបនេះ គឺជារឿងដែលមិនអាចព្រងើយកន្តើយបានឡើយ ។ ប្រជាសហគមន៍ប្រាំបីមុមជាច្រើននាក់ បានសម្តែងនូវការសោកស្តាយយ៉ាងខ្លាំងចំពោះការបាត់បង់នូវសត្វកម្រប្រភេទនេះ និងសំណូមពរដល់សមត្ថកិច្ចធ្វើយ៉ាងណា ស្រាវជ្រាវចាប់ក្រុមព្រានព្រៃទាំងនោះ យកមកផ្តន្ទាទោសតាមច្បាប់ ឲ្យខាងតែបានដោយកុំមានការអនុគ្រោះឱ្យសោះ។
តាមព័ត៌មានចុងក្រោយក្រៅផ្លូវការដែលភ្នាក់ងារយើងទទួលបាន គឺនគរបាលក្រសួងមហាផ្ទៃ បានឃាត់ខ្លួនជន ដែលបាញ់សម្លាប់សត្វទន្សោងនេះ បានម្នាក់ហើយ ។ ក្រោយពីឃាត់ខ្លួន ក៏បាននាំទៅកាន់ក្រសួងមហាផ្ទៃ ដើម្បីកសាងសំណុំរឿងចាត់ការបន្តតាមផ្លូវច្បាប់ ។ លោក រត្ន័ នាយសង្កាត់រដ្ឋបាលព្រៃឈើថ្ពងនិយាយថា នៅក្នុងព្រៃសហគមន៍ប្រាំបីមុមនេះ សព្វថ្ងៃមានទន្សោងរស់នៅចំនួន៣ហ្វូង សរុបជាង៥០ក្បាល និងបន្តពូជនៅក្នុងព្រៃសហគមន៍មួយនេះទៀតផង ។ មន្ត្រីកងរាជអាវុធហត្ថស្រុកថ្ពងបានឱ្យដឹងថា រថយន្ត២គ្រឿង កាំភ្លើង២ដើម កែវឆ្លុះ ៤ដែលជារបស់ព្រានព្រៃមួយក្រុមនេះ ត្រូវបានសមត្ថកិច្ចដកហូត ។ ប្រភពព័ត៌មានដដែលបានឱ្យដឹងទៀតថា ជនដែលបានបាញ់សម្លាប់សត្វព្រៃនេះឈ្មោះ សូ
ស៊ីណា ភេទប្រុស អាយុ៣៨ឆ្នាំ នៅភូមិអង្គ្រងឃុំស្វាយរំពារ ស្រុកស្វាយទាប ខេត្តស្វាយរៀង ។
សមត្ថកិច្ចបានដកហូតរថយន្តមួយគ្រឿងម៉ាក វីហ្គោ ពណ៌ទឹកប្រាក់ ពាក់ផ្លាកលេខ ភ្នំពេញ២M-៧៤៣៥ សាច់ទន្សោង១២០គីឡូក្រាម ជើងមុខ២ ភ្លៅក្រោយ១ ។ ជនឈ្មោះ សូ សុីណា រួមនឹងវត្ថុតាងត្រូវបាន
អង្គការសម្ព័ន្ធមិត្តសត្វព្រៃបញ្ជូនទៅមន្ទីរបរិស្ថានខេត្ត ។ ចំណែកកងរាជអាវុធហត្ថស្រុកថ្ពង មន្ត្រីរដ្ឋបាលព្រៃឈើ នគរបាលស្រុក និងមន្ត្រីបរិស្ថាន បានចុះធ្វើកំណត់ហេតុនៅកន្លែងកើតហេតុ ដើម្បីបំពេញសំណុំរឿងបញ្ជូនទៅសាលាដំបូងតាមនីតិវិធី ៕
ចែករំលែកព័តមាននេះ