រាជធានីភ្នំពេញ ៖ បុរសម្នាក់បានបែកក្បាលផ្នែកខាក្រោយហូរឈាម.កក្លាក់ ខណៈដែលរូបគេបានជិះម៉ូតូម៉ាកហុងដា C១២៥ មួយគ្រឿង បោះពួយក្នុងល្បឿនយ៉ាងលឿនដូចហោះ ដោយខ្វះការប្រុងប្រយ័ត្នក៏បានទៅបុកជាមួយនឹងឡាំប្រឺតាឥណ្ឌាមួយគ្រឿង ក្រឡាប់សង្កត់ពីលើថែមទៀត រងរបួសធ្ងន់ ។ ករណីគ្រោះថ្នាក់ចរាចរនេះដែរ បានកើតឡើងកាលពីវេលាម៉ោង១០និង៤៥នាទីព្រឹក ថ្ងៃទី២១ ខែមីនា ឆ្នាំ២០១៨ នៅចំណុចផ្លូវលេខ៥៧ កែងនិងផ្លូវលេខ៣២២ ក្នុងសង្កាត់បឹងកេងកងទី១ ខណ្ឌចំការមន ។
តាមប្រភពព័ត៌មានពីនគរបាលបានប្រាប់ឱ្យដឹងថា បុរសរងគ្រោះមានឈ្មោះ តឹក ពន្លឺ អាយុ២៥ឆ្នាំ មុខរបរជាកម្មករសំណង់ ស្នាក់នៅក្នុងការដ្ឋានសំណង់មួយកន្លែងនៅម្តុំបេងកេងកងទី១ ។ មុនពេលកើតហេតុ គេបានឃើញបុរសជាកម្មករសំណង់ម្នាក់ខាងលើ បានជិះម៉ូតូម៉ាកហុងដា C១២៥ ពណ៌ខ្មៅ ស៊េរីឆ្នាំ២០១៥ ពាក់ផ្លាកលេខ បាត់ដំបង ១A-៦០៣៨ មួយគ្រឿង បោះពួយក្នុងល្បឿនយ៉ាងលឿនក្នុងពីជើងទៅត្បូង លុះមកដល់ចំណុចកើតហេតុខាងលើ ដែលជាផ្លូវបំបែកជា៤នោះ ។ ដោយមិនមានការប្រុងប្រយ័ត្ន ក៏ស្រាប់តែមានឡាំប្រឺតាផលិតនៅប្រទេសឥណ្ឌា ពណ៌លឿង គ្មានផ្លាកលេខ ដែលបើកបរដោយបុរសម្នាក់ក្នុងទិសដៅពីលិចទៅកើត បុកគ្នាពេញទំហឹង បណ្ដាលឲ្យក្រឡាប់សង្កត់ទៅលើម៉ូតូ និងជនរងគ្រោះ បណ្ដាលឲ្យបែកក្បាលផ្នែកខាងក្រោយរងរបួសធ្ងន់ខ្លួនឯងតែម្តង ។
តាមប្រភពដដែលបាន ប្រាប់បន្តទៀតថា ក្រោយពេលកើតហេតុភ្លាមៗ ក្រុមប្រជាពលរដ្ឋដែលនៅក្បែរខាងនោះនាំគ្នាទៅលើកឡាំប្រឺតាឥណ្ឌាដែលក្រឡាប់សង្កត់ទៅលើម៉ូតូ និងយកបុរសជាជនរងគ្រោះចេញទៅដាក់លើចិញ្ចើមផ្លូវ ។ ក្រោយពេលកើតហេតុ កម្លាំងមានសម្ថកិច្ចក៏បានចុះមកដល់ធ្វើការវាស់វែង និងឲ្យភាគីទាំងពីរធ្វើការដោះស្រាយគ្នា ដោយភាគីខាងឡាំប្រឺតាព្រមដឹកយកបុរសជាជនរងគ្រោះខាងម៉ូតូទៅកាន់មន្ទីរពេទ្យ និងចេញថ្លៃព្យាបាលឱ្យដល់ភាគីម៉ូតូ ដើម្បីជាការបញ្ចប់រឿងនៅនឹងកន្លែង ៕
ចែករំលែកព័តមាននេះ