ខេត្តបន្ទាយមានជ័យ ៖ ក្រុមក្មេងទំនើងចំនួន៧នាក់ ជើងខ្លាំងខាងបង្ហោះម៉ូតូ ត្រូវបានកម្លាំងនគរបាលខេត្តបង្ក្រាប ចាប់យកមកអប់រំ ក្រុមក្មេងទំនើងដែលខ្វះការអប់រំពីឪពុកម្តាយឲ្យបានដឹតដល់ បានធ្វើឲ្យសង្គមល្អក់កករដោយសារ តែពួកគេមួយក្តាប់តូច។ តែទោះជាយ៉ាងនេះក្តី…
ខេត្តបន្ទាយមានជ័យ ៖ ក្រុមក្មេងទំនើងចំនួន៧នាក់ ជើងខ្លាំងខាងបង្ហោះម៉ូតូ ត្រូវបានកម្លាំងនគរបាលខេត្តបង្ក្រាប ចាប់យកមកអប់រំ ក្រុមក្មេងទំនើងដែលខ្វះការអប់រំពីឪពុកម្តាយឲ្យបានដឹតដល់ បានធ្វើឲ្យសង្គមល្អក់កករដោយសារ តែពួកគេមួយក្តាប់តូច។ តែទោះជាយ៉ាងនេះក្តី ក៏កងកម្លាំងនគរបាលខេត្តបន្ទាយមានជ័យ មិនទុកឲ្យពួកគេបង្កជាព្យុះ ភ្លៀង ដែលនាំឲ្យខូចនូវសណ្តាប់ធ្នាប់សារធារណៈ និងបង្កគ្រោះថ្នាក់ដល់អ្នកដទៃនោះទេ។ គឺតាមប្រមាញ់ចាប់យកមក ដើម្បីបង្ហាញសាធារណៈជនថា នេះជក្រុមក្មេងបង្ហោះម៉ូតូ។ ជាក់ស្តែងនៅយប់ថ្ងៃទី១៩ ខែមីនា ឆ្នាំ២០១៨ កម្លាំងនគរបាលព្រហ្មទណ្ឌ និងកម្លាំងនគរបាលក្រុងសិរីសោភ័ណ ក្រោមការការដឹកនាំបញ្ជារបស់លោកឧត្តមសេនីយ៍ទោ អាត់ ខែម ស្នងការនគរបាលខេត្ត បន្ទាយមានជ័យ បានចេញល្បាតស្ទាក់ចាប់ក្រុមក្មេងទំនើងបង្ហោះម៉ូតូនៅក្នុងភូមិសាស្ត្រ ក្រុងសិរីសោភ័ណ បានជាបន្តបន្ទាប់ចំនួន៧នាក់ ម៉ូតូចំនួន៤គ្រឿង។ 
លោកវរសេនីយ៍ទោ ខែម សុភ័ណ នាយការិយាល័យនគរបាលព្រហ្មទណ្ឌកម្រិតស្រាលបានឲ្យដឹងថា ក្រុមក្មេងបង្ហោះម៉ូតូនេះ ច្រើនជានីតិជនពូកគេរៀននៅ វិទ្យាល័យសម្តេចឪ ស្ថិតក្នុងសង្កាត់កំពង់ស្វាយ ក្រុងសិរីសោភ័ណ ខេត្តបន្ទាយមានជ័យ មានឈ្មោះ១/-ហេង រ៉ាវី ភេទប្រុស អាយុ១៦ឆ្នាំ នៅភូមិកំពង់ស្វាយ សង្កាត់កំពង់ស្វាយ,២/-ឆាន់ហូ លីហុង ភេទប្រុស អាយុ១៥ឆ្នាំ នៅភូមិតារាងបាល់ សង្កាត់កំពង់ស្វាយ,៣/-សៀន ម៉ាន់ហ្វុង ភេទប្រុស អាយុ១៦ឆ្នាំ នៅភូមិសូភី សង្កាត់កំពង់ស្វាយ,៤/-ខន ភារម្យ ភេទប្រុស អាយុ១៥ឆ្នាំ នៅភូមិកំពង់ស្វាយ សង្កាត់កំពង់ស្វាយ, ៥/-សោម លីគង់ ភេទប្រុស អាយុ១៦ឆ្នាំ នៅភូមិសូភី សង្កាត់កំពង់ស្វាយ, ៦/-យៀង សុវណ្ណហ្វីលីប ភេទប្រុស អាយុ១៥ឆ្នាំ នៅភូមិកំព្រីង សង្កាត់ភ្នៀតនិង៧/-ឈ្មោះ ពៅ ឆៃហុង ភេទប្រុស អាយុ១៥ឆ្នាំ នៅភូមិគាប សង្កាត់ទឹកថ្លា។
លោកឧត្តមសេនីយ៍ត្រី សិទ្ធ ឡោះ ស្នងការរងទទួលផែននគរបាលព្រហ្មទណ្ឌ បានបញ្ជាក់ឲ្យដឹងថា ក្រុមក្មេងទាំងនេះ គឺតែងតែបង្ហោះម៉ូតូជាញឹកញាប់ នៅក្នុងភូមិសាស្ត្រក្រុងសិរីសោភ័ណ ដែលជាបេះដូងរបស់ខេត្ត។ ដូច្នេះដើម្បីលុបបំបាត់ចំពោះក្រុមក្មេងទំនើងបង្ហោះម៉ូតូ ក៏ដូចជាក្រុមក្មេងកែច្នៃបំពង់សឺម៉ាំងម៉ូតូជិះបង្កឲ្យលាន់ឮ រថយន្តដឹកដី កែច្នៃបំពង់សឺម៉ាំងដែរ ដែលរំខានអារម្មណ៍របស់ ប្រជាពលរដ្ឋនោះ។ លោកឧត្តមសេនីយ៍ទោ អាត់ ខែម បានដាក់ចេញនូវបទបញ្ជាដល់ការិយាល័យជំនាញ ក៏ដូចជាអធិការដ្ឋាននគរបាលក្រុង ស្រុក ត្រូវតែចាត់វិធានការជាបន្ទាន់ គឺឃាត់ចាប់ អ្នកបើកបរ និងរថយន្តម៉ូតូមក ស្នងការដ្ឋាន ដើម្បីធ្វើការដោះដូរបំពង់សឺម៉ាំងកែច្នៃ យកបំពង់សឺម៉ាំង ដែលត្រឹមត្រូវតាមលក្ខណៈបច្ចេកទេសមកដាក់ និងធ្វើការអប់រំ ហើយធ្វើកិច្ចសន្យាផងដែរ។
លោកឧត្តមស្នងការរងបានបញ្ជាក់ថា ចំពោះក្រុមក្មេងទំនើងទាំង៧នាក់នេះ ក្រោយពីសមត្ថកិច្ចបានធ្វើការអប់រំ ធ្វើកិច្ចសន្យារួចហើយ បានកោះអញ្ជើញអាជ្ញាធរភូមិ អាណាព្យាបាល ឪពុកម្តាយ មកធានាយកទៅអប់រំបន្ត ប្រសិនបើក្នុងករណីមិនរាងចាល ចាប់ឃាត់បានជាលើកទី២ សមត្ថកិច្ចនឹងចាត់វិធានការ តាមរដ្ឋបាលកសាងសំណុំរឿងបញ្ជូនទៅសាលាដំបូងខេត្តដើម្បីចាត់វិធានការតាមច្បាប់៕
ចែករំលែកព័តមាននេះ