ខេត្តសៀមរាប ៖ ប្រជាការពារភូមិ ឃុំស្វាយលើ ស្រុកស្វាយលើ ខេត្តសៀមរាប បានប្រទះគ្រាប់យុទ្ធភណ្ឌ មិនទាន់ផ្ទុះចំនួន៣គ្រាប់ ខណៈដើរទៅមើលស្រែ រួចហៅនគរបាលប៉ុស្តិ៍រដ្ឋបាលឃុំស្វាយលើ ជួយអន្តរាគមន៍ យកចេញពីវាលស្រែរបស់ខ្លួន ដើម្បីធ្វើការប្រគល់ឱ្យអង្គការកំចាត់មីនកម្ពុជា ខេត្តសៀមរាប យកទៅកម្ទេចចោលភ្លាមៗផងដែរ។ ហេតុការប្រទះឃើញគ្រាប់យុទ្ធភណ្ឌមិនទាន់ផ្ទុះនោះ បានកើតឡើងនៅថ្ងៃច័ន្ច ៣កើត ខែចេត្រ ឆ្នាំរកា នព្វស័ក ព.ស២៥៦១ត្រូវនឹងថ្ងៃទី១៩ ខែមីនា ឆ្នាំ២០១៨ ស្ថិតនៅចំណុចមាត់អូរក្នុងភូមិបិតផ្កា ឃុំស្វាយលើ ស្រុកស្វាយលើ ខេត្តសៀមរាប។
លោកវរសេនីយ៍ត្រី ស៊ុន អេង អធិការស្រុកស្វាយលើបានប្រាប់នៅល្ងាចថ្ងៃទី១៩ ខែមីនា ឆ្នាំ២០១៩នេះថា បន្ទាប់ពីមានប្រជាការពារភូមិ ម្នាក់ឈ្មោះ ម៉ាន់ ឆៃ រស់នៅភូមិបិតផ្កា ឃុំស្វាយលើ ស្រុកស្វាយលើ ខេត្តសៀមរាប ប្រទះឃើញគ្រាប់យុទ្ធភណ្ឌមិនទាន់ផ្ទុះចំនួន៣គ្រាប់ ខណៈដែលគាត់ បានដើរទៅមើលស្រែរបស់គាត់ រួចត្រលប់មកវិញ រាយការជូនមន្ត្រីប៉ុស្តិ៍នគរបាលរដ្ឋបាល ឃុំស្វាយលើ ចំណុះអធិការដ្ឋាននគរបាលស្រុកស្វាយលើ ដើម្បីជួយអន្តរាគមន៍យកចេញពីក្នុងស្រែគាត់។
លោកបានបន្តថា ក្រោយពីកម្លាំងជំនាញយើងបានចុះទៅដល់កន្លែងកើតហេតុភ្លាម ក៏រាយការណ៍បន្ត ទៅឱ្យអង្គការកំចាត់មីនកម្ពុជាខេត្តសៀមរាប ដើម្បីយកទៅកម្ទេចចោល នៅចំណុចមាត់អូរ ក្នុងភូមិបិតផ្កា ឃុំស្វាយលើ ស្រុកស្វាយលើ នៅកន្លែងកើតហេតុនោះផងដែរ។ លោកបានបញ្ជាក់ថា គ្រាប់យុទ្ធភណ្ឌមិនទាន់ផ្ទុះដែលនៅសេសសល់ពីសម័យសង្គ្រាមចំនួន៣គ្រាប់នោះមានប្រភេទ៖ គ្រាប់មីន៦០មីល្លីម៉ែត្រ ចំនួន២គ្រាប់ គ្រាប់៦០មីល្លីម៉ែត្រ ចំនួន១គ្រាប់៕
ចែករំលែកព័តមាននេះ