រាជរដ្ឋាភិបាលនៃព្រះរាជាណាចក្រកម្ពុជាបច្ចុប្បន្ន ដែលប្រសូតចេញពីគណបក្សប្រជា ជនកម្ពុជា បានដឹកនាំប្រទេសជាតិប្រកបដោយមហាជោគជ័យ ដោយបាននិងកំពុងទាក់ទាញ សមានចិត្តប្រជាពលរដ្ឋគ្រប់ស្រទាប់វណ្ណ:ទាំងក្នុងនិងក្រៅប្រទេស ទាំងជាតិនិងអន្តរជាតិចូលរួមគាំទ្រកាន់តែច្រើនឡើងៗ ។ មូលដ្ឋានគ្រឹះដ៏រឹងមាំរបស់គណបក្សកាន់អំណាចមួយនេះ ត្រូវបានគេមើលឃើញថាបានឈរលើបុព្វហេតុដ៏ត្រឹមត្រូវ គឺថ្ងៃ ៧ មករា ឆ្នាំ១៩៧៩ ដែលជាថ្ងៃសង្គ្រោះជាតិឲ្យរស់ឡើងវិញរួចផុតពីរបបប្រល័យពូជសាសន៍ បានប្រគល់ជូនប្រជាពលរដ្ឋ នូវសិទ្ធិរស់រានមានជីវិត សិទ្ធិសេរីភាព កិត្តិយស សេចក្តីថ្លៃថ្នូរ និងលទ្ធិប្រជាធិបតេយ្យ ។
អ្នកតាមដាននិងវិភាគព្រឹត្តិការណ៍សង្គមកម្ពុជា បានវាយតម្លៃយ៉ាងច្បាស់ទុកជាមុនថាគណបក្សប្រជាជនកម្ពុជា នឹងឈ្នះការបោះឆ្នោតតំណាងរាស្រ្តអាណត្តិទី៥ ឆ្នាំ២០១៣ ជាថ្មីទៀតដោយផ្អែកលើមរតកថ្ងៃ៧ មករា ឆ្នាំ១៩៧៩ ដែលមានតម្លៃលេចធ្លោជាទូទៅ រួមជាមួយស្នាដៃធំៗដទៃទៀតរបស់រាជរដ្ឋាភិបាលដែលដឹកនាំដោយគណបក្សប្រជាជនកម្ពុជា ។ គណបក្សប្រជាជនកម្ពុជា ក៏ដូចរាជរដ្ឋាភិបាលត្រូវបានគេសម្លឹងឃើញថា បានទប់ស្កាត់មិនឲ្យរបបដ៏យង់ឃ្នងវិលត្រឡប់មកវិញ និងបានធ្វើឲ្យអង្គការចាត់តាំងរបស់ពួកប៉ុល ពត ត្រូវរលំរលាយទាំងស្រុងដោយបានអនុវត្តនយោបាយឈ្នះ=ឈ្នះលើមូលដ្ឋានការបង្រួបបង្រួមជាតិបាននាំមកនូវសន្តិភាព ឯកភាពជាតិ និងឯកភាពទឹកដីទាំងស្រុងជាលើកដំបូង ដោយអនុញ្ញាតឲ្យប្រជាពលរដ្ឋខ្មែរមានសិទ្ធិសេរីភាពក្នុងការធ្វើដំណើរទៅគ្រប់ទីកន្លែង និង គ្រប់ពេលវេលានៅទូទាំងកម្ពុជា ។
មានថ្ងៃ ៧ មករា ឆ្នាំ១៩៧៩ ទើបមានកិច្ចព្រមព្រៀងទីក្រុងប៉ារីស នាថ្ងៃទី២៣ ខែ តុលា ឆ្នាំ១៩៩១ ទើបឈានដល់មានការបោះឆ្នោតជាសាកលជ្រើសរើសសភាធម្មនុញ្ញឆ្នាំ១៩៩៣ ដែលកសាងបានរដ្ឋធម្មនុញ្ញឆ្នាំ១៩៩៣ ប្រកាន់យកប្រព័ន្ធនយោបាយប្រជាធិបតេយ្យសេរីពហុ បក្ស ។ កសាងខឿនសេដ្ឋកិច្ចសង្គមឡើងវិញជាជំហានៗរហូតមានការរីកចម្រើនយ៉ាងខ្លាំងដូចបច្ចុប្បន្ន ។ វិនិយោគទុនក្នុងនិងក្រៅប្រទេស រោងចក្រ សហគ្រាស ពាណិជ្ជកម្ម កសិដ្ឋាន សំណង់ធំៗ សេវាកម្មទេសចរណ៍ត្រូវបានគេវាយតម្លៃថា បានរីកចម្រើនយ៉ាងឆាប់រហ័សក្រោម របបរាជរដ្ឋាភិបាលបច្ចុប្បន្ន ដោយបានបង្កើនការងារធ្វើ និងមុខរបរជូនពលរដ្ឋកម្ពុជា ។ លើសពីនេះ គេប្រទះឃើញសមិទ្ធផលលើគ្រប់វិស័យរួមមាន ផ្លូវ ស្ពាន ទំនប់ប្រឡាយ ស្រះទឹក អណ្តូងទឹក សាលារៀន មន្ទីរពេទ្យ វត្តអារាម ។ល។
ធ្វើឲ្យជីវភាពប្រជាជនកាន់តែបានល្អប្រសើរឡើង ។ ជាកាលានុវត្តន៍ភាពដល់រាជរដ្ឋាភិបាលធ្វើកំណែទម្រង់រដ្ឋដ៏ស៊ីជម្រៅធ្វើឲ្យការងារគ្រប់គ្រងរដ្ឋ គ្រប់គ្រងសង្គម គ្រប់គ្រងសេដ្ឋកិច្ច និងគ្រប់គ្រងធនធានធម្មជាតិកាន់តែមាន ប្រសិទ្ធភាពឡើង ដែលធានាបាននូវកំណើនសេដ្ឋកិច្ចខ្ពស់ប្រកបដោយចីរភាព ។ ការពង្រឹងលទ្ធិ ប្រជាធិបតេយ្យ និងនីតិរដ្ឋ ការពង្រឹងយុត្តិធម៌ សមធម៌ សង្គម និងការលើកកម្ពស់ជីវភាពប្រជា ជន មន្រ្តីរាជការ និងកងកម្លាំងប្រដាប់អាវុធ ។ តាមរយ:នេះធ្វើឲ្យកម្ពុជាទទួលបាននូវកិតិ្តយស កិត្យានុភាពលើឆាកអន្តរជាតិ ស្មើភាព និងស្មើសិទិ្ធជាមួយបណ្តាប្រទេសក្នុងតំបន់ និងលើពិភពលោកមានទំនាក់ទំនងមិត្តភាព និងសហប្រតិបត្តិការល្អជាមួយគ្រប់ប្រទេស និងដៃគូអន្តរជាតិនានា ដែលជាការជំរុញការអភិវឌ្ឍន៍សង្គមជាតិយ៉ាងខ្លាំងក្លា ។
រួមសេចក្តីមកថ្ងៃ ៧ មករា ឆ្នាំ១៩៧៩ ជាមរតកដ៏មានតម្លៃមហាសាល រួមជាមួយនឹង ស្នាដៃគណបក្សប្រជាជនកម្ពុជា ក៏ដូចរាជរដ្ឋាភិបាលបច្ចុប្បន្នជាច្រើនទៀត ដែលនឹងធានាឲ្យ គណបក្សកាន់អំណាចមួយនេះឈ្នះការបោះឆ្នោតតំណាងរាស្រ្តអាណត្តិទី៥ ឆ្នាំ២០១៣ ជាថ្មីបន្តទៀតយ៉ាងពិតប្រាកដ ៕
ចែករំលែកព័តមាននេះ