រាជធានីភ្នំពេញ ៖ នារីម្នាក់ចូលទៅទិញសាច់ជ្រូកដោយមិនបានយកម៉ូតូទៅផ្ញើរគេហើយចូលទៅទិញមួយភ្លែតចេញមកវិញចោរលួចម៉ូតូបាត់ដោយសុវត្ថិភាព បង្កឱ្យមានការភ្ញាក់ផ្អើលកាលពីវេលាម៉ោង៦ព្រលប់ ថ្ងៃទី១៨ ខែមីនា ឆ្នាំ២០១៨ នៅមុខផ្សារកាណាឌីយ៉ា ភូមិត្រពាំងថ្លឹង សង្កាត់ចោមចៅ១ ខណ្ឌពោធិ៍សែនជ័យ ។
នារីរងគ្រោះមានឈ្មោះ ស.ស.ត អាយុ២២ឆ្នាំ មុខរបរកម្មកររោងចក្រ ស្នាក់នៅ សង្កាត់ស្ទឹងមានជ័យ ខណ្ឌមានជ័យ មានភូមិកំណើតនៅខេត្តស្វាយរៀង ។ ម៉ូតូដែលជនសង្ស័យលួចម៉ាកហុងដាឌ្រីម ស៊េរីឆ្នាំ២០១៦ ពណ៌ខ្មៅ ពាក់ផ្លាកលេខ ភ្នំពេញ ១FT-០៣៦៦ ។
តាមប្រភពព័ត៌មានពីជនរងគ្រោះបានបញ្ជាក់ប្រាប់ថា នៅមុនពេលកើតហេតុរូបនាងបានទៅផ្សារកាណាឌីយាដើម្បីទិញម្ហូបពេលនាងចូលទៅទិញសាច់ជ្រូកនៅផ្សារខាងលើដោយទុកម៉ូតូនៅតាមផ្លូវវេងស្រេងមុខផ្សារកាណាឌីយ៉ាចម្ងាយពីកន្លែងទិញសាច់ជ្រូកប្រហែល១០ម៉ែត្រ ដោយនាងបែរខ្នងដាក់ម៉ូតូកំពុងតែទិញសាច់ជ្រូក រយៈពេលប្រមាណជិត១០នាទីទម្រាំនិយាយតថ្លៃហើយអ្នកលក់សាច់ជ្រូកកាត់សាច់ជ្រូកឱ្យ ហើយដើរចេញមកយកម៉ូតូវិញចោលួចម៉ូតូបាត់ ។
បើតាមប្រភពព័ត៌មានពីប្រជាពលរដ្ឋនៅកន្លែងកើតហេតុបាននិយាយប្រាប់ថា នៅមុនពេលកើតហេតុម្ចាស់ម៉ូតូមិនបានយកម៉ូតូទៅផ្ញើរទេគឺចតទុកមុខផ្សារ ស្រាប់តែមានជនសង្ស័យ២នាក់ជិះម៉ូតូម៉ាក Zoomer-X បានទៅឈប់ជិតម៉ូតូជនរងគ្រោះហើយស្មានថា ជាម្ចាស់ម៉ូតូក៏បានជិះចេញទៅបាត់ ។ ក្រោយពេលកើតហេតុជនរងគ្រោះបានមកដាក់ពាក្យបណ្តឹងនៅប៉ុស្តិ៍នគរបាលរដ្ឋបាលចោមចៅ២ដើម្បីឱ្យសមត្ថកិច្ចស៊ើបអង្កេតរកមុខសញ្ញាមកផ្តន្ទាទោសតាមច្បាប់ ៕
ចែករំលែកព័តមាននេះ