ខេត្តកណ្ដាល ៖ នគរបាលកោះធំបានធ្វើការឃាត់ខ្លួនជនសង្ស័យចំនួន៥នាក់មកសាកសួរសង្ស័យជាប់ពាក់ព័ន្ធករណីឃាតកម្មសំលាប់បុរសម្នាក់កាលពីម៉ោង៧និង៥០នាទីយប់ ថ្ងៃទី១៦ ខែមីនា ឆ្នាំ២០១៨ នៅចំណុច លើចិញ្ចើមផ្លូវជាតិលេខ២១ ភូមិព្រែកគង់ ឃុំសំពៅពូន ស្រុកកោះធំ ខេត្តកណ្ដាល ។ ជនរងគ្រោះឈ្មោះ ចេក ភាព ភេទប្រុស អាយុ២០ឆ្នាំ ជនជាតិខ្មែរ មានទីលំនៅភូមិក្បាលកោះទៀវ ឃុំសំពៅពូន ស្រុកកោះធំ ខេត្តកណ្ដាល មុខរបរកម្មករបើកម៉ូតូលក់ទឹកក ។
លោក ស៊ឹម ឃាង អធិការនគរបាលស្រុកកោះធំបានប្រាប់ឱ្យដឹងថា ក្រោយពីមានហេតុការណ៍ឃាតកម្មកើតឡើងនគរបាលជំនាញបានធ្វើការស្រាវជ្រាវឈានដល់កំណត់មុខសញ្ញាជនសង្ស័យមកដល់ថ្ងៃទី១៨ ខែមីនាឆ្នាំ២០១៨ នេះបានធ្វើការឃាត់ខ្លួនជនសង្ស័យ៥នាក់ជាប់ពាក់ព័ន្ធករណីឃាតកម្ម ។ ប៉ុន្តែលោកមិនបានប្រាប់ពីអត្តសញ្ញាណជនសង្ស័យនៅឡើយទេ លោកថា កំពុងសាកសួរ និងស្រាវជ្រាវបន្ត និងរកវត្ថុតាងមួយចំនួនទៀត ។
គួរបញ្ជាក់ថា កាលពីវេលាម៉ោងប្រមាណជា៦ល្ងាច ថ្ងៃទី១៦ ខែមីនា ឆ្នាំ២០១៨ ជនរងគ្រោះបានជិះម៉ូតូ១គ្រឿងម៉ាក SUZUKI Nex ពណ៌ស ពាក់ស្លាកលេខ ភ្នំពេញ ១DH-២០៣៩ តែម្នាក់ឯងចេញពីផ្ទះទៅលេងបុណ្យបញ្ចុះខណ្ឌសីមានៅវត្តកោះទៀវ ស្ថិតនៅភូមិកោះទៀវ(ខ) ឃុំសំពៅពូន ស្រុកកោះធំ ខេត្តកណ្ដាល ។ លុះនៅវេលាម៉ោង៧និង៥០នាទីយប់ ខណៈដែលជនរងគ្រោះជិះម៉ូតូចេញពីវត្តត្រលប់មកផ្ទះវិញដល់ចំណុចខាងត្បូងស្ពានព្រែកគង់ចម្ងាយប្រមាណ៥៥ម៉ែត្រ ស្ថិតនៅលើចិញ្ចើមផ្លូវជាតិ២១ ចំហៀងខាងកើតស្រាប់តែមានជនសង្ស័យពុំស្គាល់អត្តសញ្ញាណបានធ្វើសកម្មភាពកាប់ទៅលើជនរងគ្រោះចំ.កខាងឆ្វេងបណ្ដាលឱ្យស្លាប់ភ្លាមៗនៅនឹងកន្លែងកើតហេតុតែម្ដង ហើយជនសង្ស័យបានគេចខ្លួនអស់មិនយកសម្ភាររបស់ជនរងគ្រោះទៅទេ ៕
ចែករំលែកព័តមាននេះ