រថយន្ដហោះដំបូងគេរបស់ពិភពលោក
រថយន្តហោះដំបូងគេរបស់ពិភពលោកដែលអ្នកអាចរកទិញបាននោះ ពេលនេះត្រូវបានគេដាក់តាំងបង្ហាញនៅកម្មវិធី Geneva International Motor Show នៅក្នុងប្រទេសស្វ៊ីស ។ ក្រុមហ៊ុនហូឡង់ PAL-V…
រថយន្តហោះដំបូងគេរបស់ពិភពលោកដែលអ្នកអាចរកទិញបាននោះ ពេលនេះត្រូវបានគេដាក់តាំងបង្ហាញនៅកម្មវិធី Geneva International Motor Show នៅក្នុងប្រទេសស្វ៊ីស ។
ក្រុមហ៊ុនហូឡង់ PAL-V បានបង្ហាញគំរូផលិតកម្មចុងក្រោយរបស់ខ្លួនកាលពីថ្ងៃអង្គារ ហើយឥឡូវនេះកំពុងទទួលការបញ្ជាទិញជាមុន តាមរយៈគេហទំព័ររបស់ក្រុមហ៊ុន សម្រាប់រថយន្តអាចហោះបាននេះ ។
ក្រុមហ៊ុន PAL-V បាននិយាយថា ការដឹកជញ្ជូនរថយន្តនេះដល់អតិថិជនលើកដំបូង នឹងត្រូវធ្វើឡើងនៅឆ្នាំ២០១៩ខាងមុខ ជាពេលវេលាមួយដែលទទួលបានការបញ្ជាក់ពីសុវត្ថិភាពចុងក្រោយ ។
ក្រុមហ៊ុននេះបានអះអាងថា រថយន្តហោះនេះមានសមត្ថភាពផ្ទុកមនុស្សបានពីរនាក់ និងមានល្បឿនបើកលើផ្លូវត្រឹម១០០ម៉ាយ(១ម៉ាយស្មើជាង១,៦គីឡូម៉ែត្រ)ប៉ុណ្ណោះក្នុង១ម៉ោង ខណៈវាអាចហោះលើអាកាសបានដល់ល្បឿន១១២ម៉ាយក្នុង១ម៉ោង និងកម្ពស់អតិបរមាជាង៣គីឡូម៉ែត្រ ។
ក្រុមហ៊ុននិយាយថា ការប្តូរពីបើកលើផ្លូវ ទៅហោះលើអាកាស មិនមែនគ្រាន់តែត្រូវចុចប៊ូតុងមួយនោះទេ គឺអ្នកបើកបរត្រូវតែចុះទៅផ្លាស់ប្តូរកន្លែងណាមួយនៅលើរថយន្ត ដែលពេលនេះយើងមិនទាន់ដឹងថាត្រូវធ្វើដូចម្តេចទេ ប៉ុន្ដែខាងក្រុមហ៊ុនប្រាប់ថា ការធ្វើបែបនេះប្រើពេលត្រឹមតែ១០នាទីប៉ុណ្ណោះ ។
ម៉ូដែលពិសេសដែលនឹងដាក់លក់ដំបូងគេនេះ ត្រូវបានប៉ាន់ប្រមាណថាមានតម្លៃប្រហែល ៦២១.៥០០ដុល្លារ ខណៈម៉ូដែលទាបជាងនេះមានតម្លៃតែ៣៦ម៉ឺនដុល្លារប៉ុណ្ណោះ ។
ចំណែកថ្លៃបង្រៀនបើកបរលើអាកាស វិញត្រូវបានគិតចូលជាមួយនឹងតម្លៃរបស់រថយន្តជាស្រេចអស់ហើយ ។ ទន្ទឹមនឹងនេះ ក្រុមហ៊ុនបានដាក់តម្លៃកក់លុយមុនពេលទិញ ហើយលុយដែលកក់រួចនោះ មិនអាចដកយកវិញបានទេ ៕
ចែករំលែកព័តមាននេះ