ខេត្តបាត់ដំបង៖ អំពើចោរកម្ម ហាក់មិនទាន់មានសញ្ញាថមថយឡើយ ខណ:កម្លាំងសមត្ថកិច្ចទាំងកងរាជអាវុធហត្ថ ទាំងនគរបាលហាក់បរាជ័យក្នុងការគ្រប់គ្រងមុខសញ្ញា ការទប់ស្កាត់ និងការបង្ក្រាបដែលនាំឲ្យជនល្មើស រឹតតែបង្កើនសកម្មភាពមិនឈប់ឈរ ទាំងនៅក្នុងក្រុងបាត់ដំបង និងតាមបណ្ដាស្រុកមួយចំនួន។
ជាក់ស្ដែង នៅចន្លោះម៉ោង៣ ទៅ៤ទៀបភ្លឺថ្ងៃទី១៤ មីនា នេះ ស្ថិតក្នុងភូមិពោធិបាត់ដំបង ឃុំរកា ស្រុកសង្កែ មានជនមិនស្គាល់មុខ បានដាក់ថ្នាំបំពុលសត្វឆ្កែងាប់អស់ចំនួន២ក្បាល ហើយជនសង្ស័យបានធ្វើសកម្មភាពគាស់បង្អូចខាងក្រោយចូលលួចយកម៉ូតូមួយគ្រឿង ខណ:ម្ចាស់កំពុងដេកលង់លក់ ។ បើតាមមន្ត្រីមូលដ្ឋានបានឲ្យដឹងថា ម៉ូតូដែលត្រូវចោរលួចនោះ ម៉ាកហុងដាឌ្រីមសេ១២៥ ពណ៌ខ្មៅ ស៊េរីឆ្នាំ២០១៨ ពាក់ស្លាកលេខបាត់ដំបង1AC-6056 ដែលមានឈ្មោះសុខ សារ៉ុម ភេទស្រី អាយុ៥៥ឆ្នាំ។ ជនសង្ស័យបានអូសម៉ូតូចេញក្រៅផ្ទះ រួចជិះគេចខ្លួនដោយសុវត្ថិភាព លុះព្រឹកឡើងទើបម្ចាស់ផ្ទះដឹងនៅពេលងើបពីដំណេក។
ខណ:ដែលកម្លាំងនគរបាលស្រុកសង្កែ មិនទាន់បញ្ចប់ការសួរនាំអំពីករណីបំពុលឆ្កែលួចយកម៉ូតូខាងលើនេះផង ស្រាប់តែនៅម៉ោងប្រមាណ០៩ និង៣០នាទីព្រឹកថ្ងៃដដែល មានការភ្ញាក់ផ្អើលមួយករណីទៀត ចោរបានធ្វើសកម្មភាពកាច់សោ.ក លួចយកម៉ូតូមួយគ្រឿងទៀត ដែលទុកនៅក្បែរការិយាល័យសាលាបឋមសិក្សាវត្តពោធិក្នុង ដែលស្ថិតបរិវេណក្នុងវត្តពោធិក្នុង នៅក្នុងសង្កាត់រតន: ក្រុងបាត់ដំបង ។ ម៉ូតូនោះម៉ាកហុងដាឌ្រីមសេ១២៥ស៊េរី ឆ្នាំ២០១៨ ពណ៌ខ្មៅ គ្មានស្លាកលេខទេ ដែលមានម្ចាស់ឈ្មោះអុល ស៊ាងហៃ ភេទប្រុស អាយុ៣២ឆ្នាំ មានមុខរបរជាគ្រូបង្រៀន រស់នៅភូមិរំចេក៤ សង្កាត់រតនៈ ក្រុងបាត់ដំបង។ ពាក់ព័ន្ធករណីនេះ បើតាមជនរងគ្រោះបាននិយាយថា គាត់បានទុកម៉ូតូនៅក្បែទីចាត់ការ ហើយចូលធ្វើការងារធម្មតា ខណ:សិស្សានុសិស្សចូលរៀនស្ងាត់អស់។ ម្ចាស់ម៉ូតញបានបញ្ជាក់ថា ទំនងពេលស្ងាត់នោះហើយ ទើបជាឱកាសសម្រាប់ជនល្មើសធ្វើសកម្មភាពកាច់សោលួចយកម៉ូតូរបស់គាត់។
គួរំលឹកថា នេះជាម៉ូតូទី៩ហើយ ដែលត្រូវក្រុមចោរធ្វើសកម្មភាពកាច់សោ.កលួច និងប្លន់យកនាពេលកន្លងមក ដែលកើតឡើងនៅតាមបណ្ដាស្រុកមួយចំនួន និងនៅក្នុងក្រុងបាត់ដំបង ចាប់តាំងពីអំឡុងចុងខែកុម្ភ: រហូតដល់ថ្ងៃទី១៤ មីនា ២០១៨ នេះ ។ ក្នុងចំណោមបទល្មើស ដែលបានកើតឡើងកន្លងមក គឺមានតែអំពើកាប់ប្លន់យកម៉ូតូ១ករណីគត់ ដែលសមត្ថកិច្ចស្នងការខេត្តបង្ក្រាបបាន ដែលឃាត់ខ្លួនជនសង្ស័យ៣នាក់ និងដកហូតម៉ូតូ២គ្រឿង ក្រៅពីនេះ គឺសេរ៉ូតែម្ដង។
ចែករំលែកព័តមាននេះ